Sir 21

1 ⲡⲁϣⲏⲣⲉ ⲁⲕⲣⲛⲟⲃⲉ ⲙⲡⲣⲟⲩⲱϩ ⲉⲧⲟⲟⲧⲕ ⲁⲩⲱ ⲥⲟⲡⲥ ϩⲁ ⲛⲉⲕⲛⲟⲃⲉ ⲛϣⲟⲣⲡ 2 ⲡⲱⲧ ⲉⲃⲟⲗ ⲙⲡⲛⲟⲃⲉ ⲛⲑⲉ ⲙⲡⲉⲧⲡⲏⲧ ϩⲏⲧϥ ⲛⲟⲩϩⲟϥ ⲉϥϣⲁⲛϯ ⲙⲡⲉⲕⲟⲩⲟⲓ ⲉϩⲟⲩⲛ ⲉⲣⲟϥ ϥⲛⲁⲗⲟⲕⲥⲕ ϩⲛⲛⲁϫϩⲉ ⲙⲙⲟⲩⲓ ⲛⲉ ⲛⲉϥⲛⲁϫϩⲉ 3 ⲉⲣⲉⲁⲛⲟⲙⲓⲁ ⲛⲓⲙ ⲟ ⲛⲑⲉ ⲛⲟⲩⲥⲏϥⲉ ⲛϩⲟ ⲥⲛⲁⲩ ⲉⲙⲛⲧⲁⲗϭⲟ ϩⲛ ⲧⲉⲥⲡⲗⲏⲅⲏ 4 ϣⲁⲣⲉⲟⲩⲛⲟⲩϣⲥ ⲙⲛ ⲟⲩⲥⲱϣ ϣⲉϥⲟⲩⲙⲛⲧⲣⲙⲙⲁⲟ ⲧⲁⲓ ⲧⲉ ⲑⲉ ⲉⲣⲉⲡⲏⲓ ⲛⲛϫⲁⲥⲓϩⲏⲧ ⲛⲁϣⲱϥ ⲙⲙⲟⲥ {ⲁⲩⲱ …} 5 ⲡⲥⲟⲡ[ⲥ ⲙⲡϩ]ⲏⲕⲉ ϫⲓⲛ ⲣⲱϥ ⲡⲉ ϣⲁ ⲛⲉϥ[ⲙⲁⲁϫⲉ] ⲁⲩⲱ ⲡ[ⲉϥϩ]ⲁⲡ ⲛⲛⲏⲩ ϩⲛ ⲟⲩϭⲉⲡⲏ 6 ⲉϥⲙⲟⲥ[ⲧⲉ] ⲙⲡⲉⲧϫⲡⲓⲟ ϩⲙ ⲡⲟⲩⲱⲛϩ ⲉⲃⲟⲗ ⲙⲡⲣⲉϥⲣⲛⲟⲃⲉ ⲁⲩⲱ ⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲁⲕⲧⲉⲡⲉϥϩⲏⲧ 7 ⲡⲇⲩⲛⲁⲧⲟⲥ ϩⲙ ⲡⲉϥⲗⲁⲥ ⲟⲩⲟⲛϩ ⲉⲃⲟⲗ ⲙⲡⲟⲩⲉ ⲡⲣⲉϥⲛⲟⲉⲓ ⲇⲉ ⲉⲓⲙⲉ ⲉϥϣⲁⲛⲥⲗⲁⲁⲧⲉ 8 ⲉⲣⲉⲡⲉⲧⲕⲱⲧ ⲙⲡⲉϥⲏⲓ ϩⲛ ϩⲛⲭⲣⲏⲙⲁ ⲉⲛⲛⲟⲩϥ ⲁⲛ ⲛⲉ ⲉϥⲟ ⲛⲑⲉ ⲙⲡⲉⲧⲥⲱⲟⲩϩ ⲉϩⲟⲩⲛ ⲛϩⲛⲱⲛⲉ ⲉⲩⲭⲓⲙⲱⲛ 9 ⲟⲩⲗⲁⲥ ⲉϥϩⲟⲟⲩ ⲡⲉ ⲧⲥⲩⲛⲁⲅⲱⲅⲏ ⲛⲛⲁⲛⲟⲙⲟⲥ ⲁⲩⲱ ⲧⲉⲩϩⲁⲏ ⲡⲉ ⲟⲩϣⲁϩ ⲛⲕⲱϩⲧ 10 ⲧⲉϩⲓⲏ ⲛⲛⲣⲉϥⲣⲛⲟⲃⲉ ⲟⲩⲉⲃⲟⲗ ⲧⲉ ϩⲛ ϩⲛⲱⲛⲉ ⲉⲥⲥⲏϣ ⲁⲩⲱ ⲧⲉⲥϩⲁⲏ ⲡⲉ ⲡⲉϩⲓⲉⲓⲧ ⲛⲁⲙⲛⲧⲉ 11 ⲡⲉⲧⲁⲣⲉϩ ⲉⲡⲛⲟⲙⲟⲥ ⲛⲁⲁⲙⲁϩⲧⲉ ⲛⲛⲉϥⲙⲉⲉⲩⲉ ⲁⲩⲱ ⲧⲉϥϩⲁⲏ ⲡⲉ ⲑⲟⲧⲉ ⲙⲡϫⲟⲉⲓⲥ 12 ⲙⲁⲣⲉⲡⲁⲧϩⲏⲧ ϫⲓⲥⲃⲱ ⲟⲩⲛⲟⲩⲙⲛⲧⲣⲙⲛϩⲏⲧ ⲇⲉ ⲉϣⲁⲥⲧⲁϣⲉⲡⲓⲕⲣⲓⲁ 13 ⲡⲥⲟⲟⲩⲛ ⲛⲟⲩⲥⲟⲫⲟⲥ ⲛⲁⲁϣⲁⲓ ⲛⲑⲉ ⲛⲟⲩ[ⲕⲁⲧⲁⲕⲗⲩⲥⲙⲟ]ⲥ ⲁⲩⲱ ⲉⲣⲉⲡⲉϥϣⲟϫⲛⲉ ⲟ ⲛⲑⲉ ⲛⲟⲩⲡⲏⲅⲏ ⲛⲱⲛϩ 14 ⲉⲣⲉⲛⲥⲁ ⲛϩⲟⲩⲛ ⲛⲟⲩⲥⲟϭ ⲟ ⲛⲑⲉ ⲛⲟⲩϩⲛⲁⲁⲩ ⲉϥⲟⲩⲟϣϥ ⲉⲛⲛⲉϥⲉϣⲁⲙⲁϩⲧⲉ ⲛⲥⲟⲟⲩⲛ ⲛⲓⲙ 15 ⲉⲣϣⲁⲛⲟⲩⲥⲁⲃⲉ ⲥⲉⲧⲙⲟⲩϣⲁϫⲉ ⲙⲙⲛⲧⲣⲙⲛϩⲏⲧ ϣⲁϥⲧⲁⲉⲓⲟϥ ⲛϥⲟⲩⲱϩ ⲉⲣⲟϥ ϣⲁⲣⲉⲡⲉⲧⲥⲡⲁⲧⲁⲗⲁ ⲇⲉ ⲥⲟⲧⲙⲉϥ ⲙⲁϥⲣⲁⲛⲁϥ ⲁⲩⲱ ϣⲁϥⲛⲟϫϥ ϩⲓⲡⲁϩⲟⲩ ⲙⲙⲟϥ 16 ⲉⲣⲉⲡϣⲁϫⲉ ⲛⲟⲩⲥⲟϭ ⲟ ⲛⲑⲉ ⲛⲟⲩⲉⲧⲡⲱ ϩⲓ ⲟⲩϩⲓⲏ ϣⲁⲩϩⲉ ⲇⲉ ⲉⲩⲭⲁⲣⲓⲥ ϩⲓ ⲛⲉⲥⲡⲟⲧⲟⲩ ⲙⲡⲥⲁⲃⲉ 17 ϣⲁⲩϣⲓⲛⲉ ⲛⲥⲁ ⲧⲧⲁⲡⲣⲟ ⲛⲟⲩⲥⲁⲃⲉ ϩⲛ ⲟⲩⲙⲏⲏϣⲉ ⲁⲩⲱ ϣⲁⲩⲙⲉⲕⲙⲟⲩⲕⲟⲩ ⲉⲛⲉϥϣⲁϫⲉ ϩⲙ ⲡⲉⲩϩⲏⲧ 18 ⲛⲑⲉ ⲛⲟⲩⲏⲓ ⲉϥⲧⲁⲕⲏⲩ ⲧⲁⲓ ⲧⲉ ⲑⲉ ⲛⲧⲥⲟⲫⲓⲁ ⲛⲛⲥⲟϭ ⲁⲩⲱ ϩⲛϣⲁϫⲉ ⲉⲙⲡⲟⲩϫⲛϫⲱⲛⲟⲩ ⲛⲉ ⲡⲥⲟⲟⲩⲛ ⲛⲟⲩⲥⲟϭ 19 ⲉⲣⲉⲧⲉⲥⲃⲱ ⲛⲟⲩⲥⲟϭ ⲟ ⲛⲑⲉ ⲛⲛⲓⲡⲁⲓⲇⲉⲥ ϩⲛ ⲛⲉϥⲟⲩⲉⲣⲏⲧⲉ ⲁⲩⲱ ⲛⲑⲉ ⲛⲛⲓⲡⲁⲓⲇⲉⲥ ϩⲛ ⲧⲉϥϭⲓϫ ⲛⲟⲩⲛⲁⲙ 20 ϣⲁⲣⲉ[ⲟⲩⲥⲟϭ ………] ⲟⲩⲣⲱⲙ[ⲉ ⲇⲉ ⲛⲥ]ⲁⲃⲉ ⲙ[ⲟⲅⲓⲥ] ⲛϥⲛⲉⲧϥ 21 ⲉⲣⲉⲧⲉ[ⲥⲃⲱ] ⲟ ⲛⲑⲉ ⲛ[ⲟⲩ]ⲕⲟⲥⲙⲟⲥ ⲛⲛ[ⲟⲩⲃ] ⲙⲡⲥⲁⲃⲉ ⲁⲩⲱ ⲛⲑ[ⲉ] ⲛϩⲛⲧⲱⲧⲉ ϩⲓϫⲛ ⲟⲩϭⲃⲟⲓ ⲛⲟⲩⲛⲁⲙ 22 ϣⲁⲣⲉⲛⲟⲩⲉⲣⲏⲧⲉ ⲙⲡⲥⲟϭ ϭⲉⲡⲏ ⲉϩⲟⲩⲛ ⲉⲡⲏⲓ ϣⲁⲣⲉⲟⲩⲣⲱⲙⲉ ⲇⲉ ⲉϥⲧⲥⲁⲃⲏⲩ ϣⲓⲡⲉ ϩⲏⲧϥ ⲛⲛⲣⲱⲙⲉ 23 ϣⲁⲣⲉⲡⲁⲑⲏⲧ ⲥⲟⲩⲧⲛϫⲱϥ ⲉϩⲟⲩⲛ ⲙⲡⲣⲟ ⲙⲡⲏⲓ ⲟⲩⲣⲱⲙⲉ ⲇⲉ ⲉϥⲧⲥⲁⲃⲏⲩ ϣⲁϥⲱϩⲉⲣⲁⲧϥ ϩⲓⲣⲛ ⲡⲣⲟ 24 ⲟⲩⲙⲛⲧⲁⲧⲥⲃⲱ ⲛⲟⲩⲣⲱⲙⲉ ⲡⲉ ϫⲓⲥⲙⲏ ϩⲓⲣⲛ ⲟⲩⲣⲟ ⲡⲥⲁⲃⲉ ⲇⲉ ⲛⲧⲟϥ ϣⲁϥϥⲓ ϩⲁ ⲡⲉϥϣⲱⲥ 25 ⲛⲉⲥⲡⲟⲧⲟⲩ ⲛϩⲁϩ ⲛⲁϣⲁϫⲉ ⲉⲣⲟϥ 26 ⲉⲣⲉⲫⲏⲧ ⲛⲟⲩⲥⲟϭ ϩⲛ ⲧⲉϥⲧⲁⲡⲣⲟ ⲫⲏⲧ ⲇⲉ ⲛⲛⲥⲁⲃⲉ ⲡⲉ ⲣⲱⲟⲩ 27 ϩⲙ ⲡⲧⲣⲉⲡⲁⲥⲉⲃⲏⲥ ⲥⲁϩⲟⲩ ⲙⲡⲥⲁⲧⲁⲛⲁⲥ ⲉϥⲥⲁϩⲟⲩ ⲛⲧⲉϥⲯⲩⲭⲏ ⲙⲙⲓⲛ ⲙⲙⲟϥ 28 ⲡⲣⲉϥⲕⲁⲥⲕⲥ ⲛⲁⲧⲱⲗⲙ ⲛⲧⲉϥⲯⲩⲭⲏ ⲁⲩⲱ ⲥⲉⲛⲁⲙⲉⲥⲧⲱϥ ϩⲙ ⲡⲉϥⲙⲁ ⲛϭⲟⲉⲓⲗⲉ