Sir 22
1ⲉⲣⲉⲡⲣⲉϥϫⲛⲁⲁⲩ ⲧⲛⲧⲱⲛ ⲉⲩⲱⲛⲉ ⲉϥϩⲟⲣϣ ⲁⲩⲱ ⲟⲩⲟⲛ ⲛⲓⲙ ⲛⲁϥⲓϣⲙϣⲏϭⲉ ⲉϫⲛ ⲡⲉϥϣⲱⲥ 2ⲉⲣⲉⲡⲣⲉϥϫⲛⲁⲁⲩ ⲧⲛⲧⲱⲛ ⲉⲩϩⲟⲉⲓⲣⲉ ⲛⲥⲟⲧ [… ]ⲉϣⲁϥⲛⲉϩⲧⲟⲟⲧϥ ⲉⲃⲟⲗ 3ⲟⲩ]ϣⲓⲡⲉ ⲛⲟⲩⲉⲓⲱⲧ ⲡⲉ ⲟⲩϣⲏⲣⲉ ⲛⲁⲧⲥⲃⲱ ⲧϣⲉⲉⲣⲉ ⲇⲉ ⲉⲑⲟⲟⲩ ⲟⲩϫⲡ[ⲟ ⲛⲟⲩ]ϭⲣⲱϩ ⲧⲉ 4ⲧϣⲉⲉⲣⲉ ⲛⲥⲁⲃⲏ ⲛⲁⲕⲗⲏⲣⲟⲛⲟⲙⲉⲓ ⲙⲡⲉⲥϩⲁⲓ ⲁⲩⲱ ⲧⲣⲉϥϯϣⲓⲡⲉ ⲟⲩⲗⲩⲡⲏ ⲧⲉ ⲙⲡⲉⲥⲉⲓⲱⲧ 5ϣⲁⲣⲉⲧⲛⲁϣⲧⲙⲙⲉ ϯϣⲓⲡⲉ ⲙⲡⲉⲥⲉⲓⲱⲧ ⲙⲛ ⲡⲉⲥϩⲁⲓ ⲁⲩⲱ ϣⲁⲥϫⲓⲥⲱϣ ϩⲓⲧⲟⲟⲧⲟⲩ ⲙⲡⲉⲥⲛⲁⲩ 6ⲟⲩϣⲁϫⲉ ⲛⲁⲧⲟⲩⲟⲉⲓϣ ⲡⲉ ϩⲛⲟⲩⲗⲗⲉ ϩⲛ ⲟⲩϩⲏⲃⲉ ⲙⲙⲁⲥⲧⲓⲅⲝ ⲇⲉ ⲁⲩⲱ ⲧⲉⲥⲃⲱ ⲉⲩϩⲛ ⲟⲟⲩⲟⲉⲓϣ ⲛⲓⲙ ⲙⲛ ⲟⲩⲥⲟⲫⲓⲁ 7 9ⲉⲣⲉⲡⲉⲧϯⲥⲃⲱ ⲛⲟⲩⲥⲟϭ ⲟ ⲛⲑⲉ ⲙⲡⲉⲧⲧⲉϭⲃⲗϫⲉ ⲉⲃⲗϫⲉ ⲁⲩⲱ ⲛⲑⲉ ⲙⲡⲉⲧⲧⲟⲩⲛⲟⲥ ⲙⲡⲉⲧⲛⲕⲟⲧⲕ ϩⲛ ⲟⲩϩⲓⲛⲏⲃ ⲉϥϩⲟⲣϣ 10ⲉⲣⲉⲡⲉⲧϣⲁϫⲉ ⲙⲛ ⲟⲩⲥⲟϭ ⲟ ⲛⲑⲉ ⲙⲡⲉⲧϣⲁϫⲉ ⲙⲛ ⲟⲩⲁ ⲉϥϩⲓⲛⲏⲃ ⲁⲩⲱ ⲑⲁⲏ ϣⲁϥϫⲟⲟⲥ ϫⲉ ⲟⲩ ⲡⲉⲧϣⲟⲟⲡ 11ⲣⲓⲙⲉ ⲉϫⲛ ⲟⲩⲕⲱⲱⲥ ϫⲉ ⲁϥⲕⲁⲡⲟⲩⲟⲉⲓⲛ ⲛⲥⲱϥ ⲁⲩⲱ ⲣⲓⲙⲉ ⲉϫⲛ ⲟⲩⲥⲟϭ ϫⲉ ⲁϥⲕⲱ ⲛⲥⲱϥ ⲛⲧⲙⲛⲧⲥⲁⲃⲉ ⲛⲁⲛⲟⲩⲣⲓⲙⲉ ⲉϫⲛ ⲟⲩⲕⲱⲱⲥ ϫⲉ ⲁϥⲙⲟⲧⲛⲉϥ ⲡⲱⲛϩ ⲇⲉ ⲙⲡⲥⲟϭ ϩⲟⲟⲩ ⲉϩⲟⲩⲉ ⲡⲉϥⲙⲟⲩ 12ⲥⲁϣϥ ⲛϩⲟⲟⲩ ⲡⲉ ⲡϩⲏⲃⲉ ⲛⲟⲩⲕⲱⲱⲥ ⲡⲁⲡⲥⲟϭ ⲇⲉ ⲙⲛ ⲡⲁⲥⲉⲃⲏⲥ ⲡⲉ ⲡⲉϥⲁϩⲉ ⲧⲏⲣϥ 13ⲙⲡⲣⲧⲁϣⲉϣⲁϫⲉ ⲙⲛ ⲟⲩⲥⲟϭ ⲁⲩⲱ ⲙⲡⲣⲃⲱⲕ ⲉⲣⲁⲧϥ ⲛⲟⲩⲁⲑⲏⲧ ⲁⲣⲉϩ ⲉⲣⲟⲕ ⲉⲣⲟϥ ϫⲉⲕⲁⲥ ⲛⲛⲉⲕϣⲡϩⲓⲥⲉ ⲁⲩⲱ ⲛⲛⲉⲕⲧⲱⲗⲙ ⲉϥϣⲁⲛⲛⲉϩϥ ⲉⲃⲟⲗ ⲥⲁϩⲱⲕ ⲉⲃⲟⲗ ⲙⲙⲟϥ ⲧⲁⲣⲉⲕϩⲉ ⲉⲩⲙⲧⲟⲛ ⲁⲩⲱ ⲛⲛⲉⲕⲙⲕⲁϩ ⲛϩⲏⲧ ϩⲛ ⲧⲉϥⲁⲡⲟⲛⲟⲓⲁ 14ⲟⲩ ⲡⲉⲧϩⲟⲣϣ ⲉⲡⲧⲁϩⲧ ⲁⲩⲱ ⲟⲩ ⲡⲉ ⲡⲉϥⲣⲁⲛ ⲛⲥⲁ ⲥⲟϭ 15ⲥⲙⲟⲧⲛ ⲉϥⲓ ϩⲁ ⲟⲩϣⲱ ⲙⲛ ⲟⲩϩⲙⲟⲩ ⲙⲛ ⲟⲩⲧⲁϭ ⲙⲡⲉⲛⲓⲡⲉ ⲉϩⲟⲩⲟ ⲉⲩⲣⲱⲙⲉ ⲛⲁⲑⲏⲧ 16ⲛⲑⲉ ⲛⲟⲩⲗⲟϭⲗⲉϭ ⲛϣⲉ ⲉϥⲙⲏⲣ ϩⲛ ⲟⲩⲕⲱⲧ ⲉⲛϥⲛⲁⲕⲓⲙ ⲁⲛ ϩⲛ ⲟⲩⲕⲙⲧⲟ ⲧⲁⲓ ⲧⲉ ⲑⲉ ⲛⲟⲩϩⲏⲧ ⲉϥⲧⲁϫⲣⲏⲩ ⲉϫⲛ ⲟⲩⲙⲉⲉⲩⲉ ⲛϣⲟϫⲛⲉ 17ⲙⲛ ⲟⲩϩⲏⲧ ⲉϥⲧⲁϫⲣⲏⲩ ⲉϫⲛ ⲟⲩⲙⲉⲉⲩⲉ ⲙⲙⲛⲧⲣⲙⲛϩⲏⲧ ⲉⲛϥⲛⲁⲣϩⲟⲧⲉ ⲁⲛ ⲉⲛⲉϩ ⲛⲑⲉ ⲙⲡⲥⲁ ⲛⲟⲩϫⲟ ⲉⲥϫⲏϩ 18ⲏ ⲛⲑⲉ ⲛϩⲛⲕⲁϣ ⲉⲩϩⲓϫⲛ ⲟⲩⲙⲁ ⲉϥϫⲟⲥⲉ [ⲉⲛⲛⲉⲩ]ϭⲱ ⲛⲛⲁϩⲣⲛ ⲧⲏⲩ ⲛⲓⲙ ⲧⲁⲓ ⲧⲉ ⲑⲉ ⲛⲟⲩϩⲏⲧ ⲛϭⲱⲃ [ϩⲛ ⲟ]ⲩⲙⲉⲉⲩⲉ ⲛⲥⲟϭ ⲉⲛⲛⲉϥϭⲱ ⲛⲛⲁϩⲣⲛ ϩⲟⲧⲉ ⲛⲓⲙ 19ⲡⲉⲧⲛⲁⲧⲃⲥⲟⲩⲃⲁⲗ ϥⲛⲁⲑⲉⲓ[ⲉ]ϩⲉⲛⲣⲙⲉⲓⲏ ⲁⲩⲱ ⲡⲉⲧⲛⲁⲧⲃⲥⲟⲩϩⲏⲧ ϥⲛⲁⲟⲩⲱⲛϩ ⲉⲃⲟⲗ ⲛⲟⲩⲁⲓⲥⲑⲏⲥⲓⲥ 20ⲡⲉⲧⲛⲁⲛⲉϫⲟⲩⲱⲛⲉ ⲉϩⲛϩⲁⲗⲏⲧ ϥⲛⲁⲛⲟϣⲡⲟⲩ ⲉⲃⲟⲗ ⲁⲩⲱ ⲡⲉⲧⲛⲁⲛⲉϭⲛⲉϭⲡⲉϥϣⲃⲏⲣ ϥⲛⲁⲃⲱⲗ ⲉⲃⲟⲗ ⲛⲧⲉϥⲙⲛⲧϣⲃⲏⲣ 21ⲉⲕϣⲁⲛⲣⲡⲕⲉⲧⲉⲕⲙⲧⲉⲕⲥⲏϥⲉ ⲉϫⲛ ⲡⲉⲕϣⲃⲏⲣ ⲙⲡⲣⲉⲓⲁⲧⲟⲟⲧⲕ ⲛⲥⲱϥ ⲟⲩⲛⲑⲉ ⲅⲁⲣ ⲉⲧⲣⲉⲛⲕⲟⲧⲕ ⲉⲣⲟϥ 22ⲉⲕϣⲁⲛⲟⲩⲱⲛ ⲛⲣⲱⲕ ⲉϫⲙ ⲡⲉⲕϣⲃⲏⲣ ⲙⲡⲣⲣϩⲟⲧⲉ ⲟⲩⲛⲑⲉ ⲅⲁⲣ ⲛϩⲱⲧⲡ ⲉⲣⲟϥ ϣⲁⲧⲛ ⲛⲉϭⲛⲟⲩϭϥ ⲁⲩⲱ ⲉϫⲓⲥⲉ ⲛϩⲏⲧ ⲉϫⲱϥ ⲁⲩⲱ ⲉϭⲗⲡⲡⲉϥⲙⲩⲥⲧⲏⲣⲓⲟⲛ ⲉⲃⲟⲗ ⲁⲩⲱ ⲉⲣⲟⲩⲡⲗⲏⲅⲏ ⲉⲣⲟϥ ⲛⲕⲣⲟϥ ϣⲃⲏⲣ ⲛⲓⲙ ⲛⲁⲕⲁⲁⲕ ⲉⲧⲃⲉ ⲛⲁⲓ 23ϫⲡⲟ ⲛⲁⲕ ⲛⲟⲩⲛⲁϩⲧⲉ ⲙⲛ ⲡⲉⲕϣⲃⲏⲣ ϩⲛ ⲧⲉϥⲙⲛⲧϩⲏⲕⲉ ϫⲉ ⲉⲕⲉⲉⲩⲫⲣⲁⲛⲉ ϩⲛ ⲛⲉϥⲁⲅⲁⲑⲟⲛ ⲙⲟⲩⲛ ⲉⲃⲟⲗ ⲛⲉⲙⲁϥ ϩⲙ ⲡⲉⲟⲩⲟⲉⲓϣ ⲛⲛⲉϥⲑⲗⲓⲯⲓⲥ ϫⲉ ⲉⲕⲉⲕⲗⲏⲣⲟⲛⲟⲙⲓ ⲛⲙⲙⲁϥ ϩⲛ ⲧⲉϥⲕⲗⲏⲣⲟⲛⲟⲙⲓⲁ 24ⲛⲑⲉ ⲉⲧⲉⲣⲉⲟⲩⲗϩⲱⲃ ⲛϩⲣⲱ ⲙⲛ ⲟⲩⲕⲁⲡ[ⲛⲟⲥ] ⲡⲃⲟⲗ ⲛⲟⲩⲕⲱϩⲧ ⲧⲁⲓ ⲧⲉ ⲑⲉ ϩⲛⲥⲁϩⲟⲩ ⲛⲉⲧϩⲁⲑⲏ ⲙⲡⲉϩⲧⲥⲛⲟϥ ⲉⲃⲟⲗ 25ⲛϯⲛⲁϣⲓⲡⲉ ⲁⲛ ⲉϩⲉⲡⲡⲁϣⲃⲏⲣ ⲁⲩⲱ ⲛⲛⲁϩⲟⲡⲧ ϩⲏⲧϥ 26ⲕⲁⲛ ⲉϣⲱⲡⲉ ⲟⲩⲛϩⲛⲡⲉⲑⲟⲟⲩ ⲛⲁⲧⲁϩⲟⲓ ⲉⲧⲃⲏⲧϥ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ ⲛⲁⲁⲣⲉϩ ⲉⲣⲟϥ ⲉⲣⲟϥ 27ⲛⲓⲙ ⲡⲉⲧⲛⲁϯ ⲛⲁⲓ ⲛⲟⲩⲁⲣⲉϩ ⲉⲣⲛ ⲣⲱⲓ ⲁⲩⲱ ⲟⲩⲥⲫⲣⲁⲅⲓⲥ ⲙⲙⲛⲧⲣⲙⲛϩⲏⲧ ⲉϫⲛ ⲛⲁⲥⲡⲟⲧⲟⲩ ϫⲉⲕⲁⲁⲥ ⲉⲛⲛⲁϩⲉ ϩⲛ ⲣⲱⲓ ⲁⲩⲱ ⲛⲧⲉⲡⲁⲗⲁⲥ ⲧⲁⲕⲟⲓ
Copyright information for
CopSahBible2