Sir 44

1 ⲙⲁⲣⲛⲥⲙⲟⲩ ⲉⲛⲣⲱⲙⲉ ⲉⲧⲧⲁⲉⲓⲏⲩ [……]ⲡⲧⲁⲉⲓⲟ 2 [ⲡⲛⲟⲩⲧⲉ ⲁϥⲥⲛ]ⲧⲟⲩⲛⲟϭ ⲛⲉⲟⲟⲩ ⲛⲧⲉϥ[ⲙⲛ]ⲧⲛⲟϭ ϫⲓⲛ ⲉⲛⲉϩ 3 [ⲉ]ⲩⲟ ⲛϫⲟⲉⲓⲥ ϩⲛ ⲧⲉⲩⲙⲛⲧⲣⲣⲟ ⲁⲩⲱ ϩⲛⲣⲱⲙⲉ ⲛⲥⲟⲉⲓⲧ ⲛⲉ ϩⲛ ⲧⲉⲩϭⲟⲙ ⲉⲩⲟ ⲛⲣⲣⲟ ϩⲛ ⲧⲉⲩⲙⲛⲧⲣⲙⲛϩⲏⲧ ⲉⲩϣⲁϫⲉ ⲉⲣⲟⲟⲩ ϩⲛ ⲛⲉⲡⲣⲟⲫⲏⲧⲏⲥ 4 ⲉⲩⲟ ⲛⲁⲡⲉ ⲉϩⲛⲗⲁⲟⲥ ϩⲛ ⲛⲉⲩϣⲟϫⲛⲉ ⲉⲩⲟ ⲛⲅⲣⲁⲙⲙⲁⲧⲉⲩⲥ ⲙⲡⲗⲁⲟⲥ ϩⲛ ⲛⲉⲩⲙⲛⲧⲣⲙⲛϩⲏⲧ ϩⲛϣⲁϫⲉ ⲛⲥⲁⲃⲉ ⲛⲉⲧϩⲛ ⲧⲉⲩⲥⲃⲱ 5 ⲉⲩϣⲓⲛⲉ ⲛⲥⲁ ϩⲛⲟⲩⲗⲗⲉ ⲙⲙⲟⲩⲥⲓⲕⲟⲛ ⲉⲩϫⲱ ⲛϩⲛϣⲁϫⲉ ϩⲛ ⲟⲩⲥϩⲁⲓ 6 ϩⲛⲣⲱⲙⲉ ⲛⲣⲙⲙⲁⲟ ⲛⲉ ⲉⲩⲙⲉϩ ⲛϭⲟⲙ ⲉⲩⲟ ⲛⲉⲓⲣⲏⲛⲏ ϩⲛ ⲛⲉⲩⲙⲁⲛϣⲱⲡⲉ 7 ⲁⲛⲁⲓ ⲧⲏⲣⲟⲩ ϫⲓⲉⲟⲟⲩ ϩⲛ ⲛⲉⲩⲅⲉⲛⲉⲁ ⲁⲩⲱ ⲁⲩϣⲱⲡⲉ ⲛϣⲟⲩϣⲟⲩ ϩⲛ ⲛⲉⲩϩⲟⲟⲩ 8 ⲟⲩⲛⲟⲩⲟⲛ ⲛϩⲏⲧⲟⲩ ⲉⲁⲩⲕⲱ ⲙⲛⲛⲥⲱⲟⲩ ⲙⲡⲉⲩⲣⲁⲛ ⲉϫⲱ ⲛⲛⲉⲩⲧⲁⲓⲟ 9 ⲁⲩⲱ ⲟⲩⲟⲛ ⲛϩⲏⲧⲟⲩ ⲉⲙⲛⲧϥⲣⲡⲙⲉⲉⲩⲉ ⲁⲩⲱ ⲁⲩⲧⲁⲕⲟ ⲛⲑⲉ ⲛⲛⲉⲧⲉⲛⲥⲉϣⲟⲟⲡ ⲁⲛ ⲁⲩⲱ ⲁⲩⲣⲑⲉ ⲛⲛⲉⲧⲉⲙⲡⲟⲩϣⲱⲡⲉ ⲁⲩⲱ ⲛⲉⲩϣⲏⲣⲉ ⲙⲛⲛⲥⲱⲟⲩ 10 ⲁⲗⲗⲁ ⲛⲁⲓ ϩⲛⲣⲱⲙⲉ ⲛⲛⲁⲁ ⲛⲉ ⲛⲁⲓ ⲉⲧⲉⲙⲡⲟⲩⲣⲡⲱⲃϣ ⲛⲛⲉⲩⲇⲓⲕⲁⲓⲟⲥⲩⲛⲏ 11 ⲥⲛⲁϣⲱⲡⲉ ⲙⲛ ⲡⲉ[ⲩ……] ⲛⲁⲛⲟⲩⲧⲉⲕⲗⲏⲣⲟⲛⲟⲙⲓⲁ [ … ] 12 ⲁⲡⲉⲩⲥⲡⲉⲣⲙⲁ ⲁϩⲉⲣⲁⲧϥ ϩⲛ [ⲛⲇⲓⲁⲑⲏ]ⲕⲏ 13 ⲡⲉⲩⲥⲡⲉⲣⲙⲁ ϣⲟⲟⲡ ϣⲁ ⲛⲓⲉⲛⲉϩ ⲁⲩⲱ ⲡⲉⲩⲉⲟⲟⲩ ⲛⲁϥⲱⲧⲉ ⲉⲃⲟⲗ ⲁⲛ 14 ⲁⲩⲧⲱⲙⲥ ⲛⲛⲉⲩⲥⲱⲙⲁ ϩⲛ ⲟⲩⲉⲓⲣⲏⲛⲏ ⲁⲩⲱ ⲡⲉⲩⲣⲁⲛ ⲟⲛϩ ϣⲁ ϩⲛϫⲱⲙ ⲛϫⲱⲙ 15 (b) ⲁⲩⲱ ⲟⲩⲛⲟⲩⲥⲟⲟⲩϩⲥ ⲛⲁϫⲱ ⲙⲡⲉⲩⲧⲁⲓⲟ 16 ⲁⲉⲛⲱⲭ ⲣⲁⲛⲁϥ ⲙⲡϫⲟⲉⲓⲥ ⲁϥⲡⲟⲟⲛⲉϥ ⲉⲃⲟⲗ ⲛⲥⲙⲟⲧ ⲛ⟨ⲣ⟩ϩⲏⲧ ⲛⲛⲅⲉⲛⲉⲁ 17 ⲁⲩϭⲛⲛⲱϩⲉ ⲛⲧⲉⲗⲓⲟⲥ ⲛⲇⲓⲕⲁⲓⲟⲥ ⲁϥϣⲱⲡⲉ ⲛϣⲃⲃⲓⲱ ϩⲙ ⲡⲉⲟⲩⲟⲉⲓϣ ⲛⲧⲟⲣⲅⲏ ⲉⲧⲃⲉ ⲡⲁⲓ ⲁⲡⲕⲁⲧⲁⲕⲗⲩⲥⲙⲟⲥ ϣⲱⲡⲉ ϩⲓⲧⲛ ⲡⲁⲓ ⲛⲧⲁⲩϣⲱϫⲡ ϣⲱⲡⲉ ϩⲙ ⲡⲕⲁϩ 18 ⲁⲩⲥⲙⲓⲛⲉ ⲛⲙⲙⲁϥ ⲛⲟⲩⲇⲓⲁⲑⲏⲕⲏ ⲛϣⲁⲉⲛⲉϩ ϫⲉⲕⲁⲁⲥ ⲛⲛⲉⲩϥⲉⲧⲥⲁⲣⲝ ⲛⲓⲙ ⲉⲃⲟⲗ ϩⲛ ⲟⲩⲕⲁⲧⲁⲕⲗⲩⲥⲙⲟⲥ 19 ⲁⲃⲣⲁϩⲁⲙ ⲡⲛⲟϭ ⲛⲉⲓⲱⲧ ⲛⲟⲩⲙⲏⲏϣⲉ ⲛϩⲉⲑⲛⲟⲥ ⲁⲩⲱ ⲙⲡⲟⲩϩⲉ ⲉⲡⲉⲧⲉⲓⲛⲉ ⲙⲙⲟϥ ϩⲙ ⲡⲉϥⲉⲟⲟⲩ 20 ⲡⲁⲓ ⲉⲛⲧⲁϥⲁⲣⲉϩ ⲉⲡⲛⲟⲙⲟⲥ ⲙⲡⲉⲧϫⲟⲥⲉ [……] ⲇⲓⲁⲑⲏⲕⲏ ⲛⲉⲙⲁϥ […ⲇⲓⲁ]ⲑⲏⲕⲏ ⲉⲣⲁⲧϥ ϩⲛ ⲧⲉϥⲥⲁⲣⲝ [ⲁⲩⲱ ⲁⲩϩ]ⲉ ⲉⲣⲟϥ ⲙⲡⲓⲥⲧⲟⲥ ϩⲙ ⲡⲡⲓⲣⲁⲥⲙⲟⲥ 21 ⲉⲧⲃⲉ ⲡⲁⲓ ⲁϥⲧⲁϩⲟϥ ⲛⲁϥ ⲛⲟⲩⲁⲛⲁϣ ⲉⲧⲣⲉⲛϩⲉⲑⲛⲟⲥ ϫⲓⲥⲙⲟⲩ ϩⲛ ⲡⲉϥⲥⲡⲉⲣⲙⲁ ⲉⲧⲁϣⲟϥ ⲛⲑⲉ ⲙⲡϣⲟⲉⲓϣ ⲙⲡⲕⲁϩ ⲁⲩⲱ ⲉⲧⲁϩⲉⲡⲉϥⲥⲡⲉⲣⲙⲁ ⲉⲣⲁⲧϥ ⲛⲑⲉ ⲛⲛⲥⲓⲟⲩ ⲉⲧⲣⲉⲩⲕⲗⲏⲣⲟⲛⲟⲙⲓ ϫⲓⲛ ⲑⲁⲗⲁⲥⲥⲁ ϣⲁ ⲑⲁⲗⲁⲥⲥⲁ ⲁⲩⲱ ϫⲓⲛ ⲡⲓⲉⲣⲟ ϣⲁ ⲁⲣⲏϫϥ ⲙⲡⲕⲁϩ 22 ⲁϥⲧⲁϩⲟϥ ⲉⲣⲁⲧϥ ϩⲓ ⲛⲁⲓ ϩⲛ ⲓⲥⲁⲁⲕ ⲉⲧⲃⲉ ⲁⲃⲣⲁϩⲁⲙ ⲡⲉϥⲉⲓⲱⲧ 23 ⲡⲉⲥⲙⲟⲩ ⲛⲣⲱⲙⲉ ⲛⲓⲙ ⲙⲛ ⲧⲇⲓⲁⲑⲏⲕⲏ ⲁⲩⲟⲩⲱϩ ⲉϫⲛ ⲧⲁⲡⲉ ⲛⲓⲁⲕⲱⲃ ⲁϥⲥⲟⲩⲱⲛϥ ϩⲛ ⲛⲉϥⲥⲙⲟⲩ ⲁⲩⲱ ⲁϥϯ ⲛⲁϥ ⲛⲟⲩⲕⲗⲏⲣⲟⲛⲟⲙⲓⲁ ⲁⲩⲱ ⲁϥⲧⲱϣ ⲛⲛⲉϥⲙⲉⲣⲓⲥ ⲁϥⲡⲟϣⲟⲩ ⲉⲙⲛⲧⲥⲛⲟⲟⲩⲥ ⲙⲫⲩⲗⲏ 24