Sir 47

1 ⲙⲛⲛⲥⲁ ⲛⲁⲓ ⲁⲛⲁⲑⲁⲛ ⲧⲱⲟⲩⲛ ⲁϥⲡⲣⲟⲫⲏⲧⲉⲩⲉ ϩⲛ ⲛⲉϩⲟⲟⲩ ⲛⲇⲁⲩⲉⲓⲇ 2 ⲛⲑⲉ ⲛⲟⲩⲱⲧ ⲉⲁⲩⲡⲟⲣϫϥ ⲉⲃⲟⲗ ϩⲛ ⲟⲩⲥⲱⲧⲏⲣⲓⲟⲛ ⲧⲁⲓ ⲧⲉ ⲑⲉ ⲛⲇⲁⲩⲉⲓⲇ ⲉⲃⲟⲗ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ 3 ⲁϥⲥⲱⲃⲉ ⲙⲛ ⲙⲙⲟⲩⲓ ⲛⲑⲉ ⲛⲟⲩⲙⲁⲥ ⲃⲃⲁⲁⲙⲡⲉ ⲁⲩⲱ ⲙⲛ ⲛⲁⲣⲝ ⲛⲑⲉ ⲛⲟⲩϩ[ⲓⲉⲓⲃ ] 4 ⲙⲡϥⲙⲟⲩⲟⲩⲧ ⲛⲟⲩⲅⲓⲅⲁⲥ ϩⲛ ⲧⲉϥⲙⲛⲧⲕⲟⲩⲓ ⲁⲩⲱ ⲁϥϥⲓ ⲛⲟⲩⲛⲟϭⲛⲉϭ ⲉⲃⲟⲗ ϩⲙ ⲡⲗⲁⲟⲥ ϩⲙ ⲡⲧⲣⲉϥϥⲓ ⲛⲧⲉϥϭⲓϫ ⲉϩⲣⲁⲓ ϩⲛ ⲟⲩⲱⲛⲉ ⲛⲥⲫⲉⲛⲇⲟⲛⲏ ⲉⲧⲁⲟⲩⲟ ⲉϩⲣⲁⲓ ⲙⲡϫⲓⲥⲉ ⲛⲅⲟⲗⲓⲁⲑ 5 ⲁϥⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲡⲉⲧϫⲟⲥⲉ ⲁⲩⲱ ⲁϥϯ ⲛⲟⲩϭⲟⲙ ϩⲛ ⲧⲉϥⲟⲩⲛⲁⲙ ⲉⲧⲁⲕⲉⲟⲩⲣⲱⲙⲉ ⲛϫⲱⲱⲣⲉ ϩⲙ ⲡⲡⲟⲗⲉⲙⲟⲥ ⲉϫⲓⲥⲉ ⲙⲡⲧⲁⲡ ⲙⲡⲉϥⲗⲁⲟⲥ 6 ⲁⲩϯⲉⲟⲟⲩ ⲛⲁϥ ϩⲛ ϩⲉⲛⲧⲃⲁ ⲛⲧⲃⲁ ⲛⲧⲉⲓϩⲉ ⲁⲩⲱ ⲁⲩⲥⲙⲟⲩ ⲉⲣⲟϥ ϩⲛ ⲛⲉⲥⲙⲟⲩ ⲙⲡϫⲟⲉⲓⲥ ϩⲙ ⲡⲧⲣⲉⲩⲉⲓⲛⲉ ⲛⲁϥ ⲛⲟⲩϭⲣⲏⲡⲉ ⲛⲉⲟⲟⲩ 7 ⲁϥⲟⲩⲱϣϥ ⲅⲁⲣ ⲛⲛϫⲁϫⲉ ⲉⲧⲙⲡⲉϥⲕⲱⲧⲉ ⲁⲩⲱ ⲁϥⲥⲉϣϥⲛⲉⲫⲩⲗⲓⲥⲧⲓⲉⲓⲙ ⲉⲧⲟⲩⲃⲏϥ ⲁϥⲟⲩⲱⲥϥ ⲙⲡⲉⲩⲧⲁⲡ ϣⲁϩⲣⲁⲓ ⲉⲡⲟⲟⲩ 8 ⲁϥϯ ⲛⲟⲩⲉⲝⲟⲙⲟⲗⲟⲅⲏⲥⲓⲥ ϩⲛ ⲛⲉϥϩⲃⲏⲩⲉ ⲧⲏⲣⲟⲩ ⲙⲡⲉⲧϫⲟⲥⲉ ⲉⲧⲟⲩⲁⲁⲃ ϩⲛ ⲟⲩϣⲁϫⲉ ⲛⲉⲟⲟⲩ ⲁϥⲥⲙⲟⲩ ϩⲙ ⲡⲉϥϩⲏⲧ ⲧⲏⲣϥ ⲁⲩⲱ ⲁϥⲙⲉⲣⲉⲡⲉⲛⲧⲁϥⲧⲁⲙⲓⲟϥ 9 [ⲁϥⲱϩⲉⲣⲁⲧ]ⲟⲩ ⲛϩⲛⲣⲉϥⲯⲁⲗⲗⲉⲓ ϩⲁⲑⲏ [ⲙⲡ]ⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲩϫⲱ ⲛⲟⲩⲗⲗⲉ ⲙ[ⲡⲉ]ϥϩⲣⲟⲟⲩ 10 ⲁϥϯ ⲛⲟⲩⲥⲁ ϩⲛ ⲛϣⲁ ⲁⲩⲱ ⲁϥⲕⲟⲥⲙⲓ ⲛⲛⲉⲟⲩⲟⲉⲓϣ ϣⲁ ⲑⲁⲏ ϩⲙ ⲡⲧⲣⲉⲩⲥⲙⲟⲩ ⲉⲡⲉϥⲣⲁⲛ ⲉⲧⲟⲩⲁⲁⲃ ⲁⲩⲱ ⲛⲧⲉⲡⲉⲧⲟⲩⲁⲁⲃ ⲱϣ ⲉⲃⲟⲗ ϫⲓⲛ ϩⲧⲟⲟⲩⲉ 11 ⲁⲡϫⲟⲉⲓⲥ ⲕⲁⲛⲉϥⲛⲟⲃⲉ ⲉⲃⲟⲗ ⲁⲩⲱ ⲁϥϫⲓⲥⲉ ⲙⲡⲉϥⲧⲁⲡ ⲛϣⲁⲉⲛⲉϩ ⲁϥϯ ⲛⲁϥ ⲛⲧⲇⲓⲁⲑⲏⲕⲏ ⲛⲛⲉⲣⲱⲟⲩ ⲁⲩⲱ ⲟⲩⲑⲣⲟⲛⲟⲥ ⲛⲉⲟⲟⲩ ϩⲙ ⲡⲓ︤ⲏ︦ⲗ︥ 12 ⲁϥⲧⲱⲟⲩⲛ ⲙⲛⲛⲥⲱϥ ⲛϭⲓ ⲡⲉϥϣⲏⲣⲉ ⲛⲥⲁⲃⲉ ⲁϥⲟⲩⲱϩ ϩⲛ ⲟⲩⲟⲩⲱϣⲥ ⲉⲃⲟⲗ ⲉⲧⲃⲏⲧϥ 13 ⲁⲥⲟⲗⲟⲙⲱⲛ ⲣⲣⲣⲟ ϩⲛ ⲛⲉϩⲟⲟⲩ ⲛϯⲣⲏⲛⲏ ⲡⲁⲓ ⲉⲛⲧⲁⲡⲛⲟⲩⲧⲉ ϯⲙⲧⲟⲛ ⲛⲁϥ ⲙⲡⲉϥⲕⲱⲧⲉ ϫⲉ ⲉϥⲉⲥⲙⲓⲛⲉ ⲛⲟⲩⲏⲓ ϩⲓ ⲡⲉϥⲣⲁⲛ ⲁⲩⲱ ⲛϥⲥⲟⲃⲧⲉ ⲙⲡⲉⲧⲟⲩⲁⲁⲃ ⲛϣⲁⲉⲛⲉϩ 14 ⲛⲑⲉ ⲉⲛⲧⲁⲕⲣⲥⲁⲃⲉ ϩⲛ ⲧⲉⲕⲙⲛⲧⲕⲟⲩⲓ ⲁⲩⲱ ⲁⲕⲙⲟⲩϩ ⲙⲙⲛⲧⲣⲙⲛϩⲏⲧ ⲛⲑⲉ ⲙⲡⲓⲉⲣⲟ 15 ⲁⲧⲉⲕⲯⲩⲭⲏ ⲡⲱⲣϣ ⲉⲃⲟⲗ ϩⲓϫⲛ ⲡⲕⲁϩ ⲁⲩⲱ ⲁⲕⲙⲟⲩϩ ⲙⲡⲁⲣⲁⲃⲟⲗⲏ ⲛⲁⲓⲛⲓⲅⲙⲁ 16 ⲁⲡⲉⲕⲣⲁⲛ ⲡⲱϩ ϣⲁ ⲛⲛⲏⲥⲟⲥ ⲉⲧⲟⲩⲏⲟⲩ ⲁⲩⲱ ⲁⲩⲙⲉⲣⲉ[ⲧⲉⲕⲉⲓⲣⲏⲛⲏ] 17 ϩⲛ ⲛⲉⲕϩⲱⲇⲏ ⲙⲛ [ⲛⲉⲕⲡⲁⲣ]ϩⲟⲓ[ⲙⲓⲁ ⲙ]ⲛ [ⲙⲡⲁⲣⲁ]ⲃⲟ[ⲗⲏ] ⲁⲩⲱ [ⲁϩⲛ]ⲭⲱⲣⲁ ⲣϣⲡⲏⲣⲉ ⲙⲙⲟⲕ ϩⲛ ϩⲉⲛⲃⲱⲗ 18 ϩⲙ ⲡ[ⲣⲁⲛ] ⲙⲡϫⲟⲉⲓⲥ ⲡⲛⲟⲩⲧⲉ ⲡⲉⲧⲟⲩⲙⲟⲩⲧⲉ ⲉⲣⲟϥ ϫⲉ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲁⲕⲥⲉⲩϩⲛⲟⲩⲃ ⲉϩⲟⲩⲛ ⲛⲑⲉ ⲙⲡⲃⲁⲥⲛϭ ⲁⲩⲱ ⲫⲁⲧ ⲛⲑⲉ ⲙⲡⲧⲁϩⲧ 19 ⲁⲕⲣⲓⲕⲉ ⲛⲛⲉⲕⲕⲉϩⲧⲉ ⲉⲛⲉϩⲓⲟⲙⲉ ⲁⲩⲱ ⲁⲩⲣϫⲟⲉⲓⲥ ⲉⲣⲟⲕ ϩⲛ ⲛⲉⲕⲥⲱⲙⲁ 20 ⲁⲕϯ ⲛⲟⲩⲧⲱⲗⲙ ⲙⲡⲉⲕⲉⲟⲟⲩ ⲁⲩⲱ ⲁⲕϥⲱⲧⲉ ⲙⲡⲉⲕⲥⲡⲉⲣⲙⲁ ⲉⲉⲓⲛⲉ ⲛⲟⲩⲟⲣⲅⲏ ⲉϫⲛ ⲛⲉⲕϣⲏⲣⲉ ⲁⲩⲱ ⲟⲩⲙⲕⲁϩ ⲛϩⲏⲧ ⲉϫⲛ ⲧⲉⲕⲙⲛⲧⲁⲑⲏⲧ 21 ⲉⲧⲣⲉⲧⲙⲛⲧⲉⲣⲟ ⲡⲱϣ ⲉⲁⲡⲉⲃⲟⲗ ϩⲛ ⲉⲫⲣⲁⲓⲙ ⲁⲣⲭⲓ ⲉϫⲛ ⲟⲩⲙⲛⲧⲉⲣⲟ ⲛⲁⲧⲥⲱⲧⲙ 22 ⲛⲛⲉⲡϫⲟⲉⲓⲥ ⲇⲉ ⲕⲱ ⲛⲥⲱϥ ⲙⲡⲉϥⲛⲁ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ϩⲛ ⲛⲉϥϩⲃⲏⲩⲉ ⲁⲩⲱ ⲛⲉϥϥⲱⲧⲉ ⲉⲃⲟⲗ ⲛⲛϣⲏⲣⲉ ⲙⲡⲉϥⲥⲱⲧⲡ ⲛⲛⲉϥϥⲓ ⲙⲡⲉⲥⲡⲉⲣⲙⲁ ⲙⲡⲉⲛⲧⲁϥⲙⲉⲣⲓⲧϥ ⲁϥϯ ⲛⲟⲩϣⲱϫⲡ ⲛⲓⲁⲕⲱⲃ ⲁⲩⲱ ⲟⲩⲛⲟⲩⲛⲉ ⲛⲇⲁⲩⲉⲓⲇ ⲉⲃⲟⲗ ⲛϩⲏⲧϥ 23 ⲙⲛ ⲛⲉϥⲉⲓⲟⲧⲉ [ⲁϥ]ⲕⲱ ⲙ[ⲛⲛⲥⲱϥ ⲉⲃⲟⲗ ϩ]ⲙ ⲡⲉϥⲥⲡⲉⲣⲙⲁ ⲛⲟⲩⲁⲑⲏⲧ ⲙⲡⲗⲁⲟⲥ ⲉϥϣⲁ[ⲁⲧ ⲙ]ⲙⲛⲧⲥⲁⲃⲉ ϩⲣⲟⲃⲟⲁⲙ ⲡⲉⲛⲧⲁϥⲡⲉϣⲡ[ⲗⲁ]ⲟⲥ ϩⲙ ⲡⲉϥ[ϣⲟ]ϫⲛⲉ aⲩⲱ ϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲡⲉⲛⲧⲁϥⲧⲣⲉⲡⲓ︤ⲏ︦ⲗ︥ ⲣⲛⲟⲃⲉ ⲁϥϯⲧⲉϩⲓⲏ ⲙⲡⲛⲟⲃⲉ ⲛⲉⲫⲣⲁⲓⲙ 24 ⲁⲩⲱ ⲁⲩⲁϣⲁⲓ ⲛϭⲓ ⲛⲉⲩⲛⲟⲃⲉ ⲉⲙⲁⲧⲉ ⲉⲡⲟⲟⲛⲟⲩ ⲉⲃⲟⲗ ϩⲛ ⲡⲉⲩⲕⲁϩ 25 ⲁⲩⲱ ⲁϥϣⲓⲛⲉ ⲛⲥⲁ ⲡⲟⲛⲏⲣⲓⲁ ⲛⲓⲙ ϣⲁⲛⲧⲉⲡϫⲓⲕⲃⲁ ⲉⲓ ⲉϩⲣⲁⲓ ⲉϫⲱⲟⲩ