Sir 49

1 ⲉⲣⲉⲡⲉⲣⲡⲙⲉⲉⲩⲉ ⲛⲓⲱⲥⲉⲓⲁⲥ ϣⲱⲡⲉ ⲉⲩⲥⲙⲓⲛⲉ ⲛϣⲟⲩϩⲏⲛⲉ ⲉϥⲧⲥⲁⲛⲏⲩ ⲛϩⲱⲃ ⲛⲣⲉϥⲡⲉⲥⲥⲟϭⲛ ϥⲛⲁϩⲗⲟϭ ⲛⲑⲉ ⲛⲟⲩⲉⲃⲓⲱ ϩⲛ ⲧⲧⲁⲡⲣⲟ ⲧⲏⲣⲥ ⲁⲩⲱ ⲛⲑⲉ ⲛϩⲛⲙⲟⲩⲥⲓⲕⲟⲛ ϩⲛ ϩⲉⲛⲥⲩⲙⲡⲟⲥⲓⲟⲛ ⲛⲏⲣⲡ 2 ⲛⲧⲟϥ ⲁϥⲥⲟⲟⲩⲧⲛ ⲙⲡⲉⲕⲧⲟ ⲙⲡⲗⲁⲟⲥ ⲁⲩⲱ ⲁϥϥⲓ ⲛⲛⲃⲟⲧⲉ ⲛⲧⲁⲛⲟⲙⲓⲁ 3 ⲁϥⲥⲟⲩⲧⲛ ⲡⲉϥϩⲏⲧ ⲉⲡϫⲟⲉⲓⲥ ⲁϥⲧⲁϫⲣⲉⲧⲙⲛⲧⲙⲁⲉⲓⲛⲟⲩⲧⲉ ϩⲛ ⲛⲉϩⲟⲟⲩ ⲛⲛⲁⲛⲟⲙⲟⲥ 4 ⲡⲃⲟⲗ ⲛⲇⲁⲩⲉⲓⲇ ⲙⲛ ⲉⲍⲉⲕⲓⲁⲥ ⲙⲛ ⲓⲱⲥⲉⲓⲁⲥ ⲁⲩⲣⲛⲟⲃⲉ ⲧⲏⲣⲟⲩ ⲛⲟⲩⲛⲟⲃⲉ ⲁⲩⲕⲱ ⲅⲁⲣ ⲛⲥⲱⲟⲩ ⲙⲡⲛⲟⲙⲟⲥ ⲙⲡⲉⲧϫⲟⲥⲉ [ⲁ]ⲛⲉ[ⲣⲱⲟⲩ ⲛⲓⲟⲩ]ⲇⲁⲥ ⲱϫⲛ 5 ⲁⲩϯⲡⲉⲩⲧⲁⲡ ⲅⲁⲣ ⲛϩⲉⲛⲕⲟⲟⲩⲉ ⲁⲩⲱ ⲡⲉⲩⲉⲟⲟⲩ ⲛⲟⲩϩⲉⲑⲛⲟ[ⲥ ⲛϣ]ⲙⲙⲟ 6 ⲁⲩⲣⲱⲕϩ ⲅⲁⲣ ⲛⲧⲥⲱⲧⲡ ⲙⲡⲟ[ⲗⲓⲥ ⲙ]ⲡⲉⲩⲟⲩⲟⲡ ⲁⲩⲱ ⲁⲩⲣⲛⲉⲥϩⲓⲟⲟⲩⲉ ⲛϫⲁⲉⲓⲉ 7 ϩⲛ ⲧⲟⲟⲧϥ ⲛⲓⲉⲣⲏⲙⲓⲁⲥ ⲁⲩⲑⲙⲕⲟϥ ⲅⲁⲣ ⲁⲩⲱ ⲛⲧⲟϥ ⲁⲩⲧⲃⲃⲟϥ ⲙⲡⲣⲟⲫⲏⲧⲏⲥ ϩⲛ ⲧⲟⲟⲧⲉ ⲉⲡⲱⲣⲕ ⲉⲑⲙⲕⲟ ⲉⲧⲁⲕⲟ ⲁⲩⲱ ⲉⲕⲱⲧ ⲉⲧⲱϭⲉ 8 ⲉⲍⲉⲕⲓⲏⲗ ⲡⲁⲓ ⲛⲧⲁϥⲛⲁⲩ ⲉⲑⲟⲣⲁⲥⲓⲥ ⲙⲡⲉⲟⲟⲩ ⲧⲉⲛⲧⲁϥⲧⲟⲩⲟⲥ ⲉⲣⲟϥ ϩⲓϫⲙ ⲫⲁⲣⲙⲁ ⲛⲛⲉⲭⲉⲣⲟⲩⲃⲉⲓⲛ 9 ⲕⲁⲓ ⲅⲁⲣ ⲁϥⲣⲡⲙⲉⲉⲩⲉ ⲛⲛϫⲁϫⲉ ϩⲛ ⲟⲩϩⲱⲟⲩ ⲉⲣⲡⲉⲧⲛⲁⲛⲟⲩϥ ⲛⲛⲉⲧⲥⲟⲟⲩⲧⲛ ⲛⲛⲉϩⲓⲟⲩⲉ 10 ⲉⲣⲉⲛⲕⲉⲉⲥ ⲙⲡⲙⲛⲧⲥⲛⲟⲟⲩⲥ ⲙⲡⲣⲟⲫⲏⲧⲏⲥ ϯⲟⲩⲱ ⲉⲃⲟⲗ ϩⲙ ⲡⲉⲩⲙⲁ ⲁϥⲡⲁⲣⲁⲕⲁⲗⲓ ⲇⲉ ⲛⲓⲁⲕⲱⲃ ⲁⲩⲱ ⲁϥⲥⲟⲧⲟⲩ ϩⲛ ⲟⲩⲡⲓⲥⲧⲓⲥ ⲛϩⲉⲗⲡⲓⲥ 11 ⲉⲛⲛⲁϫⲉⲥⲧⲍⲟⲣⲟⲃⲁⲃⲉⲗ ⲛⲁϣ ⲛϩⲉ ⲁⲩⲱ ⲛⲧⲟϥ ⲉϥⲟ ⲛⲑⲉ ⲛⲟⲩⲥⲫⲣⲁⲅⲓⲥ ϩⲛ ⲟⲩϭⲓϫ ⲛⲟⲩⲛⲁⲙ 12 ⲁⲩⲱ ⲓⲏⲥⲟⲩⲥ ⲡϣⲏⲣⲉ ⲛⲓⲱⲥⲉⲇⲉⲕ ⲛⲁⲓ ⲛⲧⲁⲩⲕⲉⲧⲡⲏⲓ ϩⲛ ⲛⲉⲩϩⲟⲟⲩ ⲁⲩⲱ ⲁⲩϫⲓⲥⲉ ⲙⲡⲗⲁⲟⲥ ⲉⲧⲟⲩⲁⲁⲃ ⲙⲡϫⲟⲉⲓⲥ ⲉⲧⲥⲃⲧⲱⲧ ⲉⲩⲉⲟⲟⲩ ⲛϣⲁⲉⲛⲉϩ 13 ⲁⲩⲱ ⲉⲧⲓ ⲉⲧⲛϯ ⲉⲙⲁⲧⲉ ⲙⲡⲉϥⲣⲡⲙⲉⲉⲩⲉ ⲙⲡⲉⲛⲧⲁϥⲧⲟⲩⲛⲉⲥⲛⲉⲛⲥⲟ[ⲃⲧ ⲛⲧⲁⲩϩⲉ] ⲁⲩⲱ ⲁϥⲧⲁϩⲟ ⲉⲣⲁⲧⲟⲩ ⲛⲙⲡⲩⲗⲏ ⲙⲛ ⲙⲙ[ⲟⲭⲗ]ⲟⲥ ⲁⲩⲱ ⲉ[ⲁϥⲧ]ⲟⲩⲛⲉⲥⲛⲉⲛⲏⲉⲓ 14 ⲙⲡⲟⲩⲥⲛⲧⲗⲁⲁⲩ ϩⲓϫⲙ ⲡⲕⲁϩ ⲛⲑⲉ ⲛⲉⲛⲱⲭ ⲕⲁⲓ ⲅⲁⲣ ⲛⲧⲟϥ ⲁⲩⲁⲛⲁⲗⲁⲙⲃⲁⲛⲉ ⲙⲙⲟϥ ϩⲓϫⲙ ⲡⲕⲁϩ 15 ⲙⲡⲟⲩϫⲡⲉⲣⲱⲙⲉ ⲉϥⲉⲓⲛⲉ ⲛⲓⲱⲥⲏⲫ ⲛⲛⲟϭ ⲉⲛⲉϥⲥⲛⲏⲩ ⲛⲧⲁϫⲣⲟ ⲙⲡⲗⲁⲟⲥ ⲁⲩⲱ ⲁⲩϭⲙⲡϣⲓⲛⲉ ⲛⲛⲉϥⲕⲉⲉⲥ 16 ⲥⲏⲙ ⲙⲛ ⲥⲏⲑ ⲁⲩϫⲓⲉⲟⲟⲩ ϩⲛ ⲛⲣⲱⲙⲉ ⲁⲩⲱ ⲁⲇⲁⲙ ⲉϩⲟⲩⲉⲣⲱⲙⲉ ⲛⲓⲙ ϩⲙ ⲡⲥⲱⲛⲧ