1Ti 4 | GbrGAW | STEP | A Zafun Gyi-gyi-yi gnayi pei-pei n ge dna n sa pmaknayi azaho n ɓafi n ikklisiya ɓa ɓei na Kristi aɓo, ɓai vi a malami n ɓa lo tnu-tnu n Shetan ɓeye yi.

1 Timothy 4

Wu-Wu Nukwoyi

1 A Zafun Gyi-gyi-yi gnayi pei-pei n ge dna n sa pmaknayi azaho n ɓafi n ikklisiya ɓa ɓei na Kristi aɓo, ɓai vi a malami n ɓa lo tnu-tnu n Shetan ɓeye yi. 2 A malami ye ɓa ce akata n bugbai gmanyi, har oɓa Zafun nubo zhin nya to kwoi ceɓa ɓepan. 3 Ɓa ɓei ci ge kwo to bmiya a pa mulan, kwo to bmiya a gyi abun, koda-yake Shekwoyi wa ga anya gye vinya, n na Yesu viyi abanu ɓa gyi ɓa n bugba bui-bui ɓai zhin godiya. 4 Gama anya vinya n Shekwoyi wa zhin ɓa bmiya, yi ɓa mi ya gyi ɓa n bugbai gmanyi yi zhin godiya. 5 Ndei ya nya Shekwoyi wa tu kwo anabarka, gama aze kwo manayi n Shekwoyi ɓeda yi n aduwa yi nu.

6 Nha zhin azaje bayani ye pya, ho nu ho tnu-tnu nu n gye Pasto, n wo n nuboi fu n gaiciya gai n nyawu gaiciya nya yi n ho vi nyi.

7 To wun esaya hoi naɓo tu n aɓo nɓa to tukwoi n, kwo aɓeda a tna cei, gyi esa n ho kalayi tu aɓo nu nɓa ɓa zhin ho ha mwa dna n Zafun. 8 Nayi tnu-tnu n bmiya, amma Zafun tnu-tnu n du, kwoi bmaho zhin n nya n ho zhin. Ntu cenu tumwi ha ze Yesu viyi manayi, kwo ta bmaho zhin dna anyi ye nu gmanyin, ama har n doi n kwo ye ɓe-ɓelo. 9 – 10 Gaiciya nu nyi kwo bmiya lo ozahozahoi wa gwo kwo. Yi zhin tnu-tnu n mwa, yi sin wahala n mwa, ntuge aza ɓa ga kwo gaiciya. Gama eyi awyetu lo n Shekwoyi wye-wyeyi da nu, n wa fi ntu na za ɓo vinya nyi tun baga aza nɓa la wo gni-gni gwo.

11 Wu anya ye vinya ha tabata aza tu ɓa mwi lo dei-dei. 12 To ye zaho wa ci ho wyegba ntu ge hoye zhin ɓinuyin. La ze ɓa ɓemwi-tu nya. Fa ɓa vi ho nya wu n ho ase-sei, la ze ɓa efye dna n yeye, nho gaiciya gayi, nho aɓonubazhin manayi. 13 Sai mila ɓe, ba Shekwoyi ɓeda hoi zhin kwo bayani ga ikklisiya, zhin Shekwoyi ɓeda waʼazi.

Zhin Apma Nho Nyaga Yi

14 Zhin apma n ho kpezhinyi, n Shekwoyi wa gaho dna n wo anabi esa n na ikklisiya tukwo da ɓei kpe ho abwa n tukwonyi. 15 Zhin apma n ho nyaga yi, la hohin ga n tnu-tnu ye, n na abai aza gye ho abye gyi. 16 Zhin peceiye n na aɓei n ho zhin, n ho anubo zhin yi n jesun. La kpema n ɓo n kwo zhin gaiciya, Shekwoyi ɓa tuho anabarka, wa zhin apma n hoi ha bma azaje zhin.