1Sa 1 | HMO | STEP | Eparaima ena ororo dekenai, hanua ta ladana Ramataimi Sopimi dekenai tau ta ia noho, ena ladana be Elikana. Iena tamana be Ierohama. Ierohama ena tamana be Elihu. Elihu ena tamana be Tohu. Tohu ena tamana be Supu, Eparaima iduhu tauna ta.

1 Samuel 1

Elikana mai ena bese Silo dekenai

1 Eparaima ena ororo dekenai, hanua ta ladana Ramataimi Sopimi dekenai tau ta ia noho, ena ladana be Elikana. Iena tamana be Ierohama. Ierohama ena tamana be Elihu. Elihu ena tamana be Tohu. Tohu ena tamana be Supu, Eparaima iduhu tauna ta. 2 Elikana be mai ena adavana rua, Hana bona Penina. Penina be mai ena natuna haida, to Hana be natuna lasi, ia gabani dainai.

3 Lagani ibounai Elikana be ena hanua ia rakatania, Silo dekenai ia lao. Unuseni ia ese Siahu Ibounai Lohiabada dekenai ia tomadiho henia, bona boubou gaudia Lohiabada dekenai ia henia. Bona unuseni Silo dekenai, Eli ena natuna tau ruaosi Hopini bona Pineha be Lohiabada ena hahelagaia taudia.

4 Inai tau Elikana ese iena boubou gaudia ia henia negadia ibounai, ia ese iena adavana Penina bona iena natuna memero bona kekeni ta ta ibounai dekenai vamu kahana ta ia henia. 5 To Elikana ese Hana ia lalokau henia bada, bona ia bogahisihisi henia, badina Dirava ese iena bogana ia koua, bona ia be natuna lasi. Unai dainai, Elikana ese vamu ena kahana badana, be Hana dekenai ia henia. 6 Unai hahine iharuana, Penina, ese Hana ia kirikirilaia, bona iena lalona ia hisihisi henia, badina Lohiabada ese Hana ena bogana ia koua. 7 Lagani ibounai unai bamona kara ia vara, Lohiabada ena Dubu dekenai idia lao neganai, Penina ese Hana ia hisihisi henia, ela bona Hana ia taitai, bona aniani ia ania lasi. 8 Iena adavana Elikana ese ia nanadaia, ia gwau, “Hana e, dahaka dainai oi taitai noho? Dahaka dainai oi aniani lasi? Dahaka dainai oiemu lalona ia hisihisi? Egu lalokau oi dekenai ese oiemu lalokau memero ibounai 10 dekenai ia hereaia lasi, a?”

Hana bona Eli

9 Dina ta Silo dekenai idia aniani bona inuinu murinai, Hana be mai lalohisihisi danu ia toreisi. Unai neganai hahelagaia tauna Eli be Dubu ena iduara badibadinai ia helai. 10 Hana ena lalona ia hisihisi bada, vadaeni Lohiabada dekenai ia guriguri, mai taitai bada danu.

11 Bona ia gwauhamata, ia gwau, “Siahu Ibounai Lohiabada e, lau, oiemu hesiai hahine, lauegu hisihisi bada mani do oi itaia, lau do oi laloa, lau do oi laloaboio lasi, to lau dekenai natuna mero do oi henia. Bema lau dekenai oi henia neganai, lau ese oi Lohiabada dekenai do lau henia lou, bona iena huina do lau utua lasi, iena mauri dinadia ibounai lalonai.”

12 Hana ese Lohiabada dekenai ia guriguri henia neganai, Eli ese iena uduna ia itaia. 13 Hana be iena lalona dekenai sibona ia guriguri, iena bibina sibona idia mareremarere, to iena gadona be regena lasi. Unai dainai Eli ia laloa ia be kekero. 14 Vadaeni Eli ese ia gwau henia, ia gwau, “Oiemu kekero oi hadokoa, uaina do oi atoa siri.”

15 To Hana ia haere, ia gwau, “Lohia e, lau be kekero lasi. Lau be lalohisihisi bada hahinena. Uaina o kekero muramura ta lau inua lasi, to lauegu lalohisihisi Lohiabada ena vairana dekenai lau gwauraia noho. 16 Do oi laloa lasi lau be lebulebu hahinena. Lau be inai bamona lau guriguri noho, badina be lauegu lalohisihisi bona lauegu laloa hekwarahi be ia bada herea dainai.”

17 Eli ia haere, ia gwau, “Mai oiemu maino danu do oi lao, bona Israela ena Dirava ese oiemu noinoi gauna oi dekenai do ia henia.”

18 Hana ia gwau, “Lohia e, lau ura nega ibounai oi ese lau do oi hanamoa.” Vadaeni hahine be iena dala dekenai ia lao, ia aniani, bona iena lalohisihisi ia ore.

Samuela ia vara bona Lohiabada dekenai idia henia

19 Dabai, idia toreisi haraga, Lohiabada ena vairanai idia tomadiho, vadaeni edia ruma, Rama dekenai idia giroa lou. Bona Elikana be Hana danu idia mahuta hebou, vadaeni Lohiabada ese Hana ena noinoi ia abia dae. 20 Unai dainai Hana ia rogorogo, bona natuna mero ta ia havaraia. Iena ladana ia atoa Samuela, badina be ia gwau, “Lau ese Lohiabada dekena amo lau noia.”

21 Gabeai Elikana mai ena famili be Silo dekenai idia lao, lagani ta ena boubou Lohiabada dekenai idia henia totona, bona iena gwauhamata do ia hamomokania totona. 22 To Hana be ia lao lasi. Iena adavana dekenai ia gwau, “Mero ese rata ia negea neganai, lau ese dubu dekenai do lau abia lao, Lohiabada dekenai do lau henia, bona unuseni do ia noho hanaihanai.”

23 Elikana ia haere, ia gwau, “Namo, oiemu laloa hegeregere do oi karaia. Iniseni do oi noho ela bona mero ese rata ia negea. Bona Lohiabada ese oiemu gwauhamata do ia hamomokania.” Vadaeni Hana ese ruma dekenai ia noho, iena natuna ia ubua, ela bona mero ese rata ia negea.

24 Mero ese rata ia negea murinai, Hana ese Silo dekenai ia abia lao. Boromakau tau ta, lagani toi gauna, paraoa 10 kilogaram, bona uaina kopina ta danu ia abia lao. Ia ese mero Samuela danu ia abia lao, ela bona Lohiabada ena Dubu Silo dekenai idia ginidae. Mero be ia do maragi. 25 Vadaeni idia ese boromakau idia alaia, bona mero be Eli dekenai idia hakaua lao. 26 Hana ese Eli ia hamaoroa, ia gwau, “Lohia e, mani emu kara lau oi laloatao, a? Lau be gunaguna oiemu vairana dekenai lau gini, bona Lohiabada dekenai lau guriguri. 27 Inai mero do lau abia totona Lohiabada dekenai lau noinoi, bona lau noinoi gauna ia ese lau dekenai ia henia vadaeni. 28 Unai dainai harihari Lohiabada dekenai lau henia. Iena mauri dinadia ibounai lalonai ia be Lohiabada ena.”

Vadaeni Samuela ese Lohiabada ia tomadiho henia unuseni.