Amo 3 | HilAPD | STEP | Kamo nga mga taga-Israel, nga ang inyo mga katigulangan ginpaguwa sang Ginoo sa Egypt, pamatii ninyo ining ginasiling niya kontra sa inyo:

Amos 3

1 Kamo nga mga taga-Israel, nga ang inyo mga katigulangan ginpaguwa sang Ginoo sa Egypt, pamatii ninyo ining ginasiling niya kontra sa inyo:

2 “Sa tanan nga nasyon sa bilog nga kalibutan
kamo lang gid ang akon ginpili nga mangin akon katawhan.
Gani pagasilutan ko gid kamo tungod sa tanan ninyo nga mga sala.”

Ginbuot sang Dios ang Buluhaton sang mga Propeta

3 Magaupdanay bala ang duha ka tawo sa paglakat
kon wala anay sila magsugtanay?
4 Magangurob bala ang leon sa kagulangan
kon wala man lang siya sang tulukbon?
Kag magangurob bala siya sa iya palanaguan
kon wala man lang siya sing may nadakpan?
5 Masiod bala ang pispis
kon wala ginbutangan sang paon ang siod?
Mapisik bala ang siod
kon wala ini sing may nasiod?
6 Indi bala nagakurog sa kahadlok ang mga tawo
kon patunugon ang mga budyong sa pagpahibalo nga may mga kaaway nga nagasalakay?
Kon mag-abot ang kalamidad sa isa ka siyudad,
indi bala ang Ginoo amo ang nagpadala sini?

7 Sa pagkamatuod, wala nagahimo ang Ginoong Dios sang bisan ano
kon indi niya anay ini mapahayag sa iya mga alagad nga mga propeta.

8 Sin-o bala ang indi mahadlok
kon magngurob na ang leon?
Sin-o bala ang indi makasugid sang mensahi sang Ginoong Dios
kon ang Ginoong Dios na ang magpahambal sa iya?

Ang Paghukom sang Dios Batok sa Samaria

9 Hambala ninyo ang mga pangulo nga nagaestar sa mabakod nga mga parte sang Ashdod ^{▼▼Ashdod: Ang Ashdod isa sa mga nagapanguna nga siyudad sang Filistia kag nagarepresentar sang bilog nga nasyon sang Filistia.} kag sang Egypt
nga magtipon sila sa mga bukid sa palibot sang Samaria ^{▼▼Samaria: Amo ini ang kapital sang Israel kag nagarepresentar sang bilog nga ginharian sang Israel.}
kag tan-awon nila ang puwerte nga kagamo sa sini nga siyudad
kag ang pagpaantos sa mga pumuluyo sini.
10 – 11 Kay amo ini ang ginasiling sang Ginoong Dios kontra sa Samaria:
“Indi sila kahibalo maghimo sang matarong,
kag ang mabakod nga mga parte sang ila siyudad
puno sang mga butang nga kinawatan kag inagawan.
Gani salakayon sila sang mga kaaway
kag panggub-on ang ila mga depensa.
Kuhaon sang mga kaaway ang mga pagkabutang
sa mabakod nga mga parte sang ila siyudad.”
12 Amo pa gid ini ang ginasiling sang Ginoo:

“Ang maluwas sang manugbantay sang karnero sa sapat nga ginagus-ab sang leon
posible nga amo lang ang duha ka paa ukon isa ka dulunggan.
Pareho man sina sa inyo nga mga Israelinhon nga nagaestar sa Samaria;
ang maluwas sa inyo amo lang ang mga parte sang inyo matahom nga mga katre.” ^{▼▼Indi klaro ang buot silingon sang Hebreo sa ulihi nga parte sang sini nga bersikulo.}
13 Nagasiling ang Ginoong Dios, ang Dios nga Makagagahom, “Pamatii ninyo ining ihambal ko kag isugid ninyo ini sa mga kaliwat ni Jacob:

14 “Sa adlaw nga silutan ko ang mga taga-Israel tungod sang ila mga sala,
gub-on ko ang mga halaran sa Betel. ^{▼▼Betel: Isa ka lugar sa Israel nga ginasimbahan.}
Pungalon ko ang mga sulosungay sa mga corner sang halaran ^{▼▼Pungalon…halaran: suno sa 1 Har. 1:50 kag 1 Har. 2:28, ang tawo nga ginahingabot ang iya kabuhi puwede nga magkapot sa mga sulosungay sang halaran, kag wala sing may mag-ano sa iya. Gani ang mga ginasaligan sang mga taga-Israel nga magprotektar sa ila gub-on sang Ginoo.}
kag magakalahulog ini sa duta.
15 Pagagub-on ko ang ila mga balay nga para sa tigtulugnaw
kag mga balay nga para sa tig-ilinit.
Pagagub-on ko man ang ila malahalon nga mga balay. ^{▼▼malahalon nga mga balay: sa literal, mga balay nga may mga parte nga hinimo halin sa bangkil sang elepante}
Gani madamo sang ila mga balay ang magakalaguba. ^{▼▼Gani madamo sang ila mga balay ang magakalaguba: ukon, Kag pagagub-on ko ang ila dalagko nga mga balay.}
Ako, ang Ginoo, ang nagasiling sini.”