Psa 29 | HilAPD | STEP | Ginsulat ni David. Dayawa ninyo ang Ginoo , kamo nga langitnon nga mga tinuga. Dayawa ninyo ang iya gahom kag kusog.

Psalms 29

Ang Gamhanan nga Tingog sang Dios

Ginsulat ni David.

1 Dayawa ninyo ang Ginoo,
kamo nga langitnon nga mga tinuga. ^{▼▼langitnon nga mga tinuga: ukon, mga anak sang makagagahom nga Dios}
Dayawa ninyo ang iya gahom kag kusog.
2 Ihatag sa Ginoo ang pagpadungog nga nagakadapat sa iya.
Simbaha ninyo siya sa iya balaan nga presensya.

3 Ang tingog sang Ginoo, ang gamhanan nga Dios,
mabatian sa ibabaw sang tubig.
Nagadaguob ini sa ibabaw sang mabaskog nga dagat.
4 Ang iya tingog gamhanan kag halangdon,
5 kag makabali sang mga kahoy nga sedro sang Lebanon.
6 Ginatay-og sang Ginoo ang mga bukid sang Lebanon
kag ang bukid sang Hermon, ^{▼▼bukid sang Hermon: sa Hebreo, Sirion}
kag daw pareho ini sang bataon nga talunon nga baka nga nagatumbo.
7 Ang tingog sang Ginoo nagapakilat
8 kag nagapatay-og sang kamingawan,
bisan pa ang kamingawan sang Kadesh.
9 Ang tingog sang Ginoo nagapabata sang usa ^{▼▼nagapabata sang usa: ukon, nagapauyog sang mga kahoy nga terebinto}
kag nagapataktak sang mga dahon sang kahoy.
Kag sa iya templo nagasinggit ang tanan,
“Gamhanan ang Dios!”

10 Ang Ginoo nagagahom sa mga baha.
Nagagahom siya bilang hari hasta san-o.
11 Ginapabaskog sang Ginoo ang iya katawhan
kag ginahatagan sang maayo nga kahimtangan.