Psa 75 | HilAPD | STEP | Ang kanta nga ginsulat ni Asaf. Sa direktor sang mga manugkanta: Kantaha ini sa tuno sang kanta nga “Indi Paglaglaga.” O Dios, nagapasalamat kami sa imo. Nagapasalamat kami kay malapit ka sa amon. Ginasugid sang mga tawo ang imo makatilingala nga mga binuhatan.

Psalms 75

Ang Dios amo ang Manughukom

Ang kanta nga ginsulat ni Asaf. Sa direktor sang mga manugkanta: Kantaha ini sa tuno sang kanta nga “Indi Paglaglaga.”

1 O Dios, nagapasalamat kami sa imo.
Nagapasalamat kami kay malapit ka sa amon.
Ginasugid sang mga tawo ang imo makatilingala nga mga binuhatan.

2 Nagsiling ka, “May gintalana ako nga tion sa paghukom,
kag magahukom ako sing matarong.
3 Kon magtay-og ang kalibutan kag magkurog sa kahadlok ang mga pumuluyo sini,
ako ang nagapabakod sang iya pundasyon. ^{▼▼Sa Hebreo may sugpon pa nga “sela,” nga indi klaro ang buot silingon.}
4 Nagasiling ako sa bugalon nga mga malain
nga indi sila magpabugal kag magpasikat sang ila ikasarang.
5 Nagasiling ako sa ila nga untatan na nila inang ila pagpadayaw-dayaw.”

6 Husto inang ginasiling sang Dios,
kay ang pagpataas sa tawo wala naghalin sa bisan diin ^{▼▼sa bisan diin: sa literal, sa east ukon sa west ukon sa kamingawan}
7 kundi sa Dios lang.
Siya ang nagahukom;
paubuson niya ang iban kag pataason ang iban.
8 Kay nagauyat ang Ginoo sang kupa nga puno sang nagabula nga bino
nga tama kaisog nga amo ang iya kaakig.
Ginatagay niya ini, kag nagainom ang tanan nga malain sa kalibutan hasta nga maubos nila.

9 Pero ako ya, indi mag-untat sa pagsugid parte sa Dios ni Jacob,
kag kantahan ko siya sang mga pagdayaw.
10 Dulaon niya ^{▼▼niya: sa Hebreo, ko} ang ikasarang sang mga malain,
pero dugangan niya ang ikasarang sang mga matarong.