Job 18

Mĩario ya Bilidadi

1Ningĩ Bilidadi ũrĩa Mũshuhi agĩcookia, akĩũria atĩrĩ:

2“Ũrĩĩtiga kwaria mĩario ĩno rĩ?
Gĩa na ũũgĩ nĩguo o na ithuĩ tũhote kwaria.
3 ^aNĩ kĩĩ kĩratũma ũtuone tũhaana ta ngʼombe,
na tũgatuuo irimũ maitho-inĩ maku?
4 ^bWee ũrehanyũrũra nĩ ũndũ wa ũrĩa ũrakarĩte-rĩ,
thĩ no ĩthaamwo nĩ ũndũ waku?
Kana no nginya ndwaro cia mahiga cieherio harĩa itũire?

5 ^c“Tawa wa mũndũ mwaganu nĩmũhorie;
rũrĩrĩmbĩ rwa mwaki wake nĩrũtigĩte gwakana.
6Ũtheri ũrĩa ũrĩ thĩinĩ wa hema yake ũtuĩkĩte nduma;
naguo tawa ũrĩa ũrĩ hakuhĩ nake ũkahora.
7 ^dHinya wa mũkinyũkĩrie wake nĩmũhũthie;
namo mathugunda make makamũgũithia thĩ.
8 ^eMakinya make mamũikagia wabu-inĩ,
nake akoorũraga thĩinĩ wa marima mayo.
9Mũtego ũmũnyiitĩire ndiira-inĩ ya kũgũrũ;
mũtego ũgakĩmũrũmia biũ.
10 ^fAhithĩirwo kĩana kĩa rũrigi tĩĩri-inĩ,
akaambĩrwo mũtego njĩra-inĩ yake.
11 ^gImakania imuumagĩrĩra na mĩena yothe,
na ikamũtengʼeragia harĩa hothe aagerera.
12Mũtino nĩũmũhũũtĩire;
mwanangĩko wetereire agwe.
13 ^hMũtino ũrĩĩaga icunjĩ cia gĩkonde gĩake;
narĩo irigithathi rĩa gĩkuũ rĩgatambuuranga ciĩga ciake.
14Aguucĩtio, akarutwo ũgitĩri-inĩ wa hema yake,
na agatwarwo kũrĩ mũthamaki wa imakania.
15 ⁱMwaki nĩguo ũtũũraga hema-inĩ yake;
ũbiriti ũgwakana nĩũhurunjĩtwo gĩikaro gĩake.
16Mĩri yake yũmagĩra tĩĩri-inĩ,
nacio honge ciake ikahooha na igũrũ.
17 ^jKĩririkano gĩake nĩ gĩgaathira thĩ;
ndarĩ rĩĩtwa bũrũri-inĩ.
18Akaarutũrũrwo ũtheri-inĩ atwarwo nduma-inĩ
na nĩakaingatwo oime thĩ ĩno.
19 ^kNdarĩ ciana kana njiaro thĩinĩ wa andũ ao,
o na ndarĩ mũndũ wake ũgaatigara kũrĩa aatũũraga.
20Andũ a mwena wa ithũĩro nĩmakagegio nĩ maũndũ marĩa mamũkorete;
andũ a mwena wa irathĩro manyiitwo nĩ kĩmako.
21 ^lTi-itherũ ũguo nĩguo gĩikaro kĩa mũndũ mwaganu gũkahaana;
kũndũ kwa mũndũ ũrĩa ũtooĩ Mũrungu-rĩ, gwake kũhaana ũguo.”