Job 38

Mĩario ya Jehova

1 ^aNake Jehova agĩcookeria Ayubu ũhoro arĩ kĩhuhũkanio-inĩ, akĩmwĩra atĩrĩ:

2“Nũũ ũyũ ũrekĩra kĩrĩra gĩakwa nduma
na ciugo itarĩ na ũmenyo?
3 ^bWĩhotore ta mũndũ mũrũme;
nĩngũkũũria ciũria, nawe ũkĩnjookerie.

4 ^c“Warĩ kũ rĩrĩa ndaakire mũthingi wa thĩ?
Njĩĩra akorwo ũrĩ na ũũgĩ wa kũmenya.
5 ^dNũũ wathimire mũigana wayo? Ti-itherũ wee nĩũũĩ!
Nũũ watambũrũkirie rũrigi rwa gũthima igũrũ rĩayo?
6 ^eMĩthingi yayo yahandirwo igũrũ rĩa kĩĩ,
kana nũũ wahaandire ihiga rĩayo rĩa koine,
7hĩndĩ ĩrĩa njata cia rũciinĩ ciainire hamwe,
na araika othe makĩanĩrĩra nĩ gũkena?

8 ^f“Nũũ wahingĩrĩirie iria na mĩrango
rĩrĩa rĩatumũkire kuuma nda,
9rĩrĩa ndatuire matu nguo ciarĩo,
na ngĩrĩoha nduma nene ta taama warĩo,
10 ^grĩrĩa ndarĩkĩrĩire mĩhaka, na ngĩrĩhingĩra na mĩrango yarĩo,
na ngĩĩkĩra mĩgĩĩko handũ hayo,
11 ^hrĩrĩa ndoigire atĩrĩ, ‘Ũkinyage o haha na ndũkanahakĩre;
makũmbĩ maku macio metĩĩi-rĩ, hau nĩho marĩĩkinyaga’?

12 ⁱ“Kuuma o kĩambĩrĩria-rĩ, ũrĩ waathana atĩ rũciinĩ rũgĩe ho,
kana ũkĩonereria ũtheri wa rũciinĩ harĩa ũkuumĩrĩra,
13nĩguo ũhote kũnyiita thĩ na mĩthia yaguo,
nao arĩa aaganu maribaribwo moime kuo?
14 ^jThĩ ĩhaanaga ta rĩũmba rĩhũrĩtwo mũhũũri;
mũonekere wayo ũtariĩ ta mũhianĩre wa nguo.
15 ^kAndũ arĩa aaganu nĩmaimagwo ũtheri wao,
na guoko kwao kũrĩa kuoetwo na igũrũ gũkoinwo.

16“Ũrĩ wathiĩ rũgendo nginya kũrĩa iria rĩtherũkagĩra,
kana ũgaceera itwe-inĩ cia ndia kũrĩa kũriku mũno?
17 ^lŨrĩ wonio ihingo cia gĩkuũ?
Ũrĩ wona ihingo cia kĩĩruru gĩa gĩkuũ?
18Ũrĩ wamenya ũnene wa wariĩ wa thĩ?
Njĩĩra akorwo nĩũũĩ maũndũ macio mothe.

19 ^m“Njĩra ya gũthiĩ kũrĩa ũtheri ũtũũraga nĩĩrĩkũ?
Nayo nduma ĩikaraga kũ?
20No ũcitware gwacio?
Nĩũũĩ tũcĩra twa gũthiĩ kũrĩa itũũraga?
21Ti-itherũ wee nĩũũĩ, nĩgũkorwo warĩ mũciare!
Wee-rĩ, nĩũtũũrĩte mĩaka mĩingĩ!

22 ⁿ“Ũrĩ watoonya makũmbĩ kũrĩa tharunji ĩigĩtwo,
kana ũkĩona makũmbĩ kũrĩa mbura ya mbembe ĩigĩtwo,
23 ^oo icio njigĩte nĩ ũndũ wa mahinda ma thĩĩna,
ngaciiga nĩ ũndũ wa matukũ ma mbaara na ma kũrũa.
24Njĩra ya gũthiĩ kũrĩa ũtheri ũgayanagĩrio nĩĩrĩkũ,
kana ya gũthiĩ kũrĩa rũhuho rwa irathĩro rũhurunjagĩrwo gũkũ thĩ?
25Nũũ wenjagĩra mbura ya kĩboboto mũtaro wa kũgerera,
kana agatemera mbura ya marurumĩ njĩra,
26 ^pnĩguo mbura yure bũrũri ũtatũũraga mũndũ,
na yure werũ kũrĩa gũtarĩ mũndũ,
27 ^qnĩguo ĩhũũnagie kũu gũtiganĩrie gũgakira ihooru,
na ĩtũme kũmere nyeki?
28Mbura nĩĩrĩ ithe?
Nũũ mũciari wa matata ma ime?
29Tharunji yumaga nda ya ũ?
Nũũ ũciaraga mbaa ĩrĩa yumaga igũrũ,
30rĩrĩa maaĩ momaga ta ihiga,
rĩrĩa maaĩ marĩa marĩ igũrũ wa iria magwatana?

31 ^r“Wee-rĩ, wahota kuohania njata iria thaka cia Kĩrĩmĩra?
Wahota kuohora mĩkanda ya njata iria ciĩtagwo Karaũ?
32 ^sWahota kuumagaragia njata iria ciĩtagwo Mazarothu o mahinda maacio maakinya,
kana wahota gũtongoria Nduba na ciana ciayo?
33Nĩũũĩ mawatho ma igũrũ?
No ũhote kũhaanda wathani wa Ngai ũrũme gũkũ thĩ?

34 ^t“Wahota kwanĩrĩra nginya mũgambo waku ũkinye matu-inĩ
nĩguo kuure wĩhumbĩre na kĩguũ kĩa maaĩ?
35Wee nĩwe ũtũmaga heni ithiĩ na njĩra ciacio?
Nĩikũrehagĩra ũhoro igakwĩra atĩ, ‘Tũrĩ haha’?
36 ^uNũũ waheire ngoro ũũgĩ,
kana akĩhe meciiria ũmenyo?
37Nũũ ũrĩ na ũũgĩ wa gũtara matu?
Nũũ ũngĩhota kũinamia ndigithũ cia maaĩ cia igũrũ
38 ^vrĩrĩa rũkũngũ rwatondora,
nayo ndoro ĩkooma ĩkanyiitana?

39 ^w“Nĩwe ũguĩmagĩra mũrũũthi wa mũgoma wone gĩa kũrĩa,
kana nĩwe ũniinagĩra mĩrũũthi ngʼaragu
40rĩrĩa ĩkomereire imamo-inĩ ciayo,
kana rĩrĩa ĩikaraga yoheirie nyamũ ihinga-inĩ?
41 ^xNũũ ũheaga ihuru irio
rĩrĩa tũcui twarĩo tũgũkaĩra Mũrungu
tũkĩũrũũraga nĩ kwaga irio?