Lamentations 3

1Niĩ ndĩ mũndũ wonete thĩĩna
nĩ ũndũ wa kũhũũrwo na rũthanju rwa mangʼũrĩ make.
2Andwarĩte akangereria nduma-inĩ
handũ ha ũtheri-inĩ;
3ti-itherũ, atũmĩte guoko gwake kũnjũkĩrĩre
rĩngĩ na rĩngĩ, mũthenya wothe.

4Nĩatũmĩte nyama cia mwĩrĩ wakwa
na gĩkonde kĩaguo ihinyare,
na akoinanga mahĩndĩ makwa.
5Nĩandigiicĩirie, na agaathiũrũrũkĩria
na marũrũ, na thĩĩna.
6Atũmĩte ndũũre nduma-inĩ
o ta andũ arĩa maakuire tene.

7Nĩanjirigĩire na rũthingo nĩguo ndikae kũũra;
mĩnyororo yakwa nĩamĩritũhĩtie mũno.
8O na rĩrĩa ndetana kana ndakaya ngĩenda ũteithio-rĩ,
nĩ kũhingĩrĩria ahingagĩrĩria mahooya makwa.
9Nĩahingĩte njĩra yakwa na mahiga maicũhie;
atũmĩte tũcĩra twakwa tuogome.

10Kũrĩ niĩ aatuĩkĩte o ta nduba rĩrĩa yoheirie,
kana ta mũrũũthi rĩrĩa wĩhithĩte,
11akĩngururia kuuma gacĩra-inĩ,
akĩndambuura, akĩndiganĩria itarĩ na ũteithio.
12Ageetete ũta wake, akangereka,
nduĩke cabaa ya kũrathagwo nĩ mĩguĩ yake.

13Nĩatheecire ngoro yakwa
na mĩguĩ kuuma thiaka-inĩ wake.
14 ^aNgĩgĩtuĩka wa gũthekagĩrĩrwo nĩ andũ akwa othe;
maanyũrũragia na rwĩmbo mũthenya wothe.
15Anjiyũrĩtie maũndũ marũrũ,
na akaahũũnia na maaĩ ma nyongo.

16 ^bNĩangʼethũrangĩte magego makwa na kagoto;
anangĩrĩirie rũkũngũ-inĩ.
17Nĩnjagithĩtio thayũ;
nĩndiganĩirwo ũgaacĩru nĩ kĩĩ.
18Nĩ ũndũ ũcio nguuga atĩrĩ, “Riiri wakwa nĩũthirĩte,
o hamwe na maũndũ marĩa mothe ndũire njĩrĩgĩrĩire kuuma kũrĩ Jehova.”

19Nĩngũririkana thĩĩna wakwa, na kũũrũũra gwakwa,
na ngaririkana maũndũ marũrũ, o na maaĩ ma nyongo.
20 ^cNgoro yakwa no ĩraririkana maũndũ macio,
nayo ĩkaringĩka thĩinĩ wakwa.
21O na gũtariĩ ũguo nĩndirikanaga ũndũ ũyũ,
na tondũ wa ũguo ngagĩa na kĩĩrĩgĩrĩro:

22 ^dTondũ wa wendo mũnene wa Jehova, nĩkĩo tũtaniinĩtwo biũ,
nĩgũkorwo tha ciake itirĩ hĩndĩ ithiraga.
23 ^eTha ciaku ikoragwo irĩ njerũ rũciinĩ o rũciinĩ,
wĩhokeku waku nĩ mũnene mũno.
24Ngoro yakwa yugaga atĩrĩ,
“Jehova nĩwe igai rĩakwa; tondũ ũcio nĩwe ndĩrĩetagĩrĩra.”

25Jehova nĩ mwega kũrĩ arĩa mamwĩhokaga,
kũrĩ ngoro ĩyo ĩmũrongoragia;
26 ^fnĩ wega mũndũ gweterera
ũhonokio wa Jehova o akirĩte.
27Nĩ wega mũndũ gũkuua icooki
hĩndĩ ĩrĩa arĩ mũnini.

28 ^gNĩaikare arĩ wiki akirĩte,
nĩgũkorwo nĩ Jehova ũmũigĩrĩire rĩo.
29Nĩaturumithie ũthiũ wake rũkũngũ-inĩ,
no gũkorwo aahota kũgĩa na kĩĩrĩgĩrĩro.
30 ^hNĩerekererie rũthĩa kũrĩ mũndũ ũrĩa ũkũmũgũtha,
na aiyũrwo nĩ thoni.

31 ⁱNĩgũkorwo Jehova
ndateanagĩria andũ nginya tene.
32O na gũtuĩka nĩarehaga kĩeha-rĩ, we nĩaiguanagĩra tha,
nĩgũkorwo wendo ũcio wake ũtathiraga nĩ mũnene mũno.
33 ^jNĩgũkorwo ndarehagĩra andũ mĩnyamaro,
kana akarehere ciana cia andũ kĩeha akĩendaga.

34Rĩrĩa andũ a bũrũri arĩa othe mohetwo
maarangĩrĩrio na makinya-rĩ,
35 ^krĩrĩa mũndũ aagithio kĩhooto gĩake
mbere ya Ũrĩa-ũrĩ-Igũrũ-Mũno-rĩ,
36 ^lo na rĩrĩa mũndũ atuĩrwo ciira hatarĩ kĩhooto-rĩ,
githĩ Mwathani ndonaga maũndũ macio?

37 ^mNũũ ũngĩaria na atũme ũndũ ũcio ũhinge,
Mwathani ataathanĩte gũtuĩke ũguo?
38 ⁿGithĩ kanua-inĩ ka Ũrĩa-ũrĩ-Igũrũ-Mũno
tiho hoimaga maũndũ mooru, na hakoima maũndũ mega?
39 ^oMũndũ o wothe ũrĩ muoyo-rĩ, atetaga nĩkĩ
rĩrĩa ekũherithio nĩ ũndũ wa mehia make?

40 ^pNĩtũthuthuurie-i mĩthiĩre iitũ na tũmĩtuĩrie,
tũcokerere Jehova.
41Nĩtwambararie ngoro ciitũ na moko maitũ na igũrũ
kũrĩ Mũrungu ũrĩa ũrĩ igũrũ, tuuge atĩrĩ:
42 ^q“Ithuĩ-rĩ, nĩtwĩhĩtie na tũgakũremera,
wee nawe ũkaaga gũtũrekera.

43 ^r“Wee wĩhumbĩrĩte na marakara, ũgatũingatithia;
ũũraganĩte ũtekũiguanĩra tha.
44 ^sWee wĩhumbĩrĩte na itu
nĩgeetha gũtikagĩe na ihooya rĩngĩgũkinyĩra.
45 ^tWee ũtũmĩte tũtuĩke ta gĩko,
na ta mahuti gatagatĩ ka ndũrĩrĩ.

46 ^u“Thũ ciitũ ciothe itwathamĩirie tũnua itũũkĩrĩre.
47 ^vNĩtũkorereirwo nĩ kĩmako kĩnene, na tũkenjerwo marima,
tũgakorwo nĩ ũniinani, na mwanangĩko.”
48Maitho makwa maranyũrũrũkia tũrũũĩ twa maithori
nĩ ũndũ andũ akwa nĩmanangĩtwo.

49 ^wMaitho makwa marĩnyũrũrũkagia maithori mategũtigithĩria,
magaikara o makĩnyũrũrũkaga,
50 ^xnginya rĩrĩa Jehova agaacũthĩrĩria arĩ igũrũ oone.
51Maũndũ marĩa ndĩrona nĩmaranjiguithia kĩeha ngoro,
tondũ wa andũ-a-nja othe a itũũra rĩakwa inene.

52 ^yAndũ arĩa maatuĩkĩte thũ ciakwa hatarĩ gĩtũmi
nĩo maanguĩmaga ta nyoni.
53 ^zMaanjikirie irima makĩenda kũnjũraga,
na makĩĩhũũra na mahiga;
54 ^aandaahubanĩirio nĩ maaĩ maingĩ,
magĩikũrũkĩra igũrũ rĩa mũtwe wakwa,
na niĩ ngĩĩciiria ndĩ hakuhĩ kũniinwo.

55 ^abNgĩkaĩra rĩĩtwa rĩaku Wee Jehova,
ndĩ kũu irima-inĩ rĩu iriku.
56Na we ũkĩigua ithaithana rĩakwa, ngĩkwĩra atĩrĩ,
“Tiga kũhinga matũ maku ngĩgũkaĩra ũndeithie.”
57 ^acNawe ũkĩnguhĩrĩria rĩrĩa ndagũkaĩire,
ũkĩnjĩĩra atĩrĩ, “Tiga gwĩtigĩra.”

58Wee Mwathani-rĩ, nĩwe wanjiirĩrĩire;
nawe ũgĩgĩkũũra muoyo wakwa.
59Wee Jehova, nĩwonete ũũru ũrĩa njĩkĩtwo.
Tua ciira wakwa arĩ we!
60 ^adWee nĩwonete kwĩrĩhĩria kwao guothe,
o na mathugunda mao mothe ma kũnjũkĩrĩra.

61Wee Jehova-rĩ, nĩũiguĩte irumi iria manumĩte nacio,
o na mathugunda mao mothe ma kũnjũkĩrĩra:
62maũndũ marĩa thũ ciakwa ciaragia na mĩheehũ ikĩngʼungʼuanaga
injũkĩrĩre mũthenya wothe.
63 ^aeTa kĩmarore! Magĩikara thĩ kana magĩũkĩra,
maanyũrũragia na nyĩmbo ciao.

64 ^afWee Jehova-rĩ, marĩhe kũringana na ũrĩa mekĩte,
kũringana na wĩra wa moko mao.
65 ^agŨmia ngoro ciao, nakĩo kĩrumi gĩaku kĩroikara nao!
66Maingatithie ũrĩ na marakara,
na ũmaniine mathire gũkũ mũhuro wa igũrũ rĩa Jehova.