Psalms 118

Gũcookia Ngaatho nĩ ũndũ wa Ũhootani

1 ^aCookeriai Jehova ngaatho nĩgũkorwo nĩ mwega;
wendo wake nĩ wa tene na tene.

2 ^bAndũ a Isiraeli nĩmoige atĩrĩ,
“Wendo wake nĩ wa tene na tene.”
3 ^cNyũmba ya Harũni nĩyuuge atĩrĩ,
“Wendo wake nĩ wa tene na tene.”
4Andũ arĩa metigĩrĩte Jehova nĩmoige atĩrĩ,
“Wendo wake nĩ wa tene na tene.”

5 ^dNdakaĩire Jehova ndĩ mĩnyamaro-inĩ,
nake akĩnjĩtĩka na akĩndeithũra.
6 ^eJehova arĩ hamwe na niĩ; ndingĩĩtigĩra.
Mũndũ-rĩ, nĩ atĩa angĩhota kũnjĩka?
7Jehova arĩ hamwe na niĩ; nĩwe mũndeithia.
Nĩngerorera thũ ciakwa ikĩhootwo.

8 ^fNĩ kaba kũũrĩra harĩ Jehova,
gũkĩra kwĩhoka mũndũ.
9 ^gNĩ kaba kũũrĩra harĩ Jehova,
gũkĩra kwĩhoka anene.

10Ndarigiicĩirio nĩ ndũrĩrĩ ciothe,
no tondũ wa kwĩhoka rĩĩtwa rĩa Jehova, ngĩciananga.
11 ^hCiandigiicĩirie mĩena yothe,
no tondũ wa kwĩhoka rĩĩtwa rĩa Jehova, ngĩciananga.
12 ⁱCiathiũrũrũkĩirie na mĩena yothe ta njũkĩ,
no ikĩhora narua o ta mwaki wa mĩigua;
tondũ wa kwĩhoka rĩĩtwa rĩa Jehova ngĩciananga.

13Ndahatĩkĩtwo mũno nĩ thũ hakuhĩ ngwe,
no Jehova akĩndeithia.
14 ^jJehova nĩwe hinya wakwa na nĩwe ũtũmaga nyine;
nake nĩatuĩkĩte ũhonokio wakwa.

15 ^kMbugĩrĩrio ya gĩkeno na ya ũhootani
ĩiyũrĩte hema-inĩ cia andũ arĩa athingu, atĩ:
“Guoko kwa ũrĩo kwa Jehova nĩ gwĩkĩte maũndũ manene!
16Guoko kwa ũrĩo kwa Jehova nĩ kwambararie;
guoko kwa ũrĩo kwa Jehova nĩ gwĩkĩte maũndũ manene!”

17 ^lNiĩ gũkua ndigũkua, no nĩngũtũũra muoyo,
ngʼanage ũrĩa Jehova ekĩte.
18Jehova nĩaherithĩtie mũno,
no ndandekereirie ngue.

19Hingũrĩrai ihingo cia ũthingu;
nĩngũtoonya njookerie Jehova ngaatho.
20 ^mGĩkĩ nĩkĩo kĩhingo kĩa Jehova
kĩrĩa andũ arĩa athingu mangĩtoonyera.
21Nĩ ngaatho ngũgũcookeria, nĩgũkorwo nĩwanjĩtĩkire;
nĩũtuĩkĩte ũhonokio wakwa.

22 ⁿIhiga rĩrĩa aaki maaregire
nĩrĩo rĩtuĩkĩte ihiga inene rĩa koine;
23 ^oJehova nĩwe wĩkĩte ũndũ ũcio,
naguo nĩ wa magegania tũkĩwona.
24Mũthenya ũyũ nĩ Jehova ũtũmĩte ũgĩe;
nĩtũcanjamũkei, tũkĩũkenere.

25Wee Jehova, tũhonokie;
Wee Jehova, tũma tũgaacĩre.
26 ^pKũrathimwo-rĩ, nĩ mũndũ ũrĩa ũgũũka na rĩĩtwa rĩa Jehova.
Ithuĩ nĩtwamũrathima tũrĩ thĩinĩ wa nyũmba ya Jehova.
27 ^qJehova nĩwe Mũrungu,
na nĩatũmĩte ũtheri wake ũtwarĩre.
Ambĩrĩriai gũkũngũiya, mũrĩ na mathĩgĩ moko,
mũthiĩ nginya hĩa-inĩ cia kĩgongona.

28 ^rWee nĩwe Mũrungu wakwa, nĩngũgũcookeria ngaatho;
Wee nĩwe Ngai wakwa, nĩngũgũtũũgĩria.

29Cookeriai Jehova ngaatho, nĩgũkorwo we nĩ mwega;
wendo wake nĩ wa tene na tene.