Psalms 145

Ũnene na Wega wa Ngai

Thaburi ya Daudi

1 ^aNĩngũgũtũũgĩria, Wee Ngai wakwa Mũthamaki;
ndĩrĩĩgoocaga rĩĩtwa rĩaku tene na tene.
2O mũthenya ndĩrĩkũgoocaga
na ngumagie rĩĩtwa rĩaku tene na tene.

3 ^bJehova nĩwe mũnene, na nowe wagĩrĩire kũgoocwo mũno;
ũnene wake gũtirĩ mũndũ ũngĩhota kũũtuĩria.
4Rũciaro rũmwe nĩrũkarahĩra rũrĩa rũngĩ maũndũ marĩa waneka;
nĩrũkamenyithanagia ũhoro wa ciĩko ciaku cia hinya.
5Nĩmakaaria ũhoro wa ũkaru wa ũnene waku ũrĩa ũrĩ riiri,
na niĩ ndaranagie ũhoro wa ciĩko ciaku cia magegania.
6 ^cNĩmarĩheanaga ũhoro wa ũhoti wa maũndũ maku ma kũmakania,
na niĩ hunjagie ũhoro wa ũnene wa ciĩko ciaku.
7 ^dNĩmagakũngũĩra wega waku mũingĩ,
na maine ũhoro wa ũthingu waku makenete.

8 ^eJehova nĩ mũtugi na nĩ mũigua-tha,
ndahiũhaga kũrakara, na aiyũrĩtwo nĩ wendo.
9 ^fJehova nĩ mwega harĩ andũ othe;
nĩaiguagĩra tha kĩrĩa gĩothe ombĩte.
10Wee Jehova, kĩrĩa gĩothe ũmbĩte nĩkĩrĩkũgoocaga;
andũ aku arĩa aamũre nĩmarĩgũkumagia.
11 ^gNĩmarĩheanaga ũhoro wa riiri wa ũthamaki waku,
na maaragie ũhoro wa hinya waku,
12nĩgeetha andũ othe mamenye ũhoro wa ciĩko ciaku cia hinya,
o na ũkaru wa ũthamaki waku, ũrĩa ũrĩ riiri.
13 ^hŨthamaki waku nĩ ũthamaki wa gũtũũra tene na tene,
naguo wathani waku ũtũũraga nginya njiarwa ciothe.

Jehova nĩ mwĩhokeku harĩ ciĩranĩro ciake ciothe,
na nĩendete kĩrĩa gĩothe ombĩte.
14 ⁱJehova nĩanyiitagĩrĩra arĩa othe maragũa,
na agatiira arĩa othe mainamĩte.
15 ^jMaitho ma andũ othe nĩwe macũthĩrĩirie,
na nĩũmaheaga irio ciao hĩndĩ ĩrĩa yagĩrĩire.
16Ũkũnjũraga guoko gwaku,
na ũkahingĩria kĩndũ gĩothe kĩrĩ muoyo mabataro makĩo.

17 ^kJehova nĩ mũthingu njĩra-inĩ ciake ciothe,
na nĩendete kĩrĩa gĩothe ombĩte.
18 ^lJehova arĩ hakuhĩ na andũ arĩa othe mamũkayagĩra,
arĩa othe mamũkayagĩra na ma.
19Arĩa othe mamwĩtigagĩra nĩamahingagĩria mabataro mao;
nĩaiguaga kĩrĩro kĩao na akamahonokia.
20 ^mJehova nĩamenyagĩrĩra arĩa othe mamwendete,
no arĩa othe aaganu nĩkũniina akaamaniina.

21Kanua gakwa karĩaragia gakagooca Jehova.
Kĩũmbe o gĩothe nĩgĩkĩgooce rĩĩtwa rĩake itheru
nginya tene na tene.