Psalms 55
Mwathani Nĩatiiragĩrĩra Andũ arĩa Athingu
Thaburi ya Daudi
1 aWee Ngai, thikĩrĩria ihooya rĩakwa,ndũkaage kũigua ithaithana rĩakwa;
2njigua na ũnjĩtĩke.
Meciiria makwa nĩmathĩĩnĩtie na ndĩ mũgiĩku
3 bnĩ ũndũ wa mũgambo wa thũ,
nĩ ũndũ wa gũkũũrĩrwo maitho nĩ andũ arĩa aaganu;
tondũ o mandehagĩra o mathĩĩna,
na makaanyũrũria marakarĩte.
4 cNgoro yakwa ĩrĩ na ruo rũnene thĩinĩ wakwa,
nganyiitwo nĩ imakania nene cia gĩkuũ.
5 dGuoya na kũinaina nĩcindigiicĩirie;
hubanĩirio nĩ kĩmako kĩnene.
6Na niĩ ngiuga atĩrĩ, “Hĩ, naarĩ korwo ndĩ na mathagu ta ndutura!
Ingĩũmbũka thiĩ ngahurũke,
7 eingĩũra thiĩ kũndũ kũraya,
ngaikare werũ-inĩ;
8ingĩhiũha thiĩ handũ harĩa ingĩĩgitia,
kũraihu na rũhuho rũu rũnene na kĩhuhũkanio.”
9 fWee Mwathani, andũ arĩa aaganu nĩmanyiitwo nĩ kĩrigiicano,
ũhĩngĩcanie mĩario yao,
nĩgũkorwo itũũra-inĩ inene nyonaga o haaro na ngũĩ.
10 gMũthenya na ũtukũ, andũ acio aaganu macangacangaga thingo-inĩ cia itũũra rĩu;
narĩo rĩiyũrĩtwo nĩ rũmena na irumi.
11Thĩinĩ wa itũũra rĩu inene no mwanangĩko ũrĩ kuo;
kwĩhĩtanĩra na kũheenania ciyũrĩte njĩra-inĩ ciarĩo.
12Korwo nĩ thũ ĩranuma-rĩ,
no ngirĩrĩrie;
korwo nĩ thũ ĩranjũkĩrĩra-rĩ,
no ndĩhithe ndĩkanyone.
13 hNo rĩrĩ, nĩwe mũndũ wa riika rĩakwa,
mũthiritũ wakwa, mũrata wakwa ũrĩa twendanĩte mũno,
14 io wee twanakenanĩra tũrĩ na ngwatanĩro njega,
tũgĩthiĩ hamwe na andũ arĩa angĩ nyũmba-inĩ ya Ngai.
15 jGĩkuũ kĩrohubanĩria thũ ciakwa o rĩmwe;
iroikũrũka mbĩrĩra irĩ muoyo,
tondũ ũũru ũkoragwo ngoro-inĩ ciacio.
16No rĩrĩ, niĩ nĩ Ngai ngayagĩra,
nake Jehova nĩahonokagia.
17Hwaĩ-inĩ, na rũciinĩ, o na mĩaraho,
ngayaga ndĩ mĩnyamaro-inĩ,
nake nĩaiguaga mũgambo wakwa.
18We angũũraga kuuma mbaara-inĩ ĩrĩa ndũithagio,
ngoima itagurarĩtio,
o na gwakorwo nĩ andũ aingĩ mandũithagia.
19 kMũrungu ũrĩa ũtũũrĩte aikarĩire gĩtĩ kĩa ũnene nginya tene,
nĩekũmaigua na amaherithie,
andũ acio matagarũragĩra mĩthiĩre yao,
o acio matetigagĩra Ngai.
20 lMũndũ ũcio tũrĩ thiritũ nake atharĩkagĩra arata ake,
na agathũkia kĩrĩkanĩro gĩake.
21Mĩario yake ĩnyorokete o ta thiagĩ,
no rĩrĩ, mbaara ĩrĩ ngoro-inĩ yake;
ciugo ciake ihooranagĩria gũkĩra maguta,
no icio nĩ hiũ cia njora irĩ njomore.
22 mRekereria Jehova maũndũ marĩa magũtangaga,
na nĩegũgũtiirĩrĩra;
ndarĩ hĩndĩ akaareka mũndũ ũrĩa mũthingu agwe.
23 nNo rĩrĩ, Wee Ngai, nĩũkaharũrũkia andũ arĩa aaganu
irima-inĩ rĩa ũmaramari;
andũ arĩa manyootagĩra thakame na andũ a maheeni
matigaakinyia nuthu ya matukũ mao.
No niĩ hakwa-rĩ, Wee nĩwe ndĩĩhokete.
Copyright information for
KikGKY