Jude

Juta

Vu'a Anejijihina

1 Juta ka'ene Jesu Keriso oni pwea 'ee Jemisi oni 'u'uiji'i ea ka'ene Amo Godira oja mihe 'umenau'e Jesu Keriso ona'e 'ajoha'eju'e hijujihi puna'e veju. 2 'Ene veje numisaraa 'ee matauvi'ina 'ee oja mihujara joni vaja emarena paranama.

Sisei Najahi'ina Puni Jujuvu'a

3 Napuhu nuna ka'ene na oja mihi'inakije na 'unama ka'ene nú venume maranúana ka'ene nú apejaji asura vene ja 'wara'irono amairiaravuta. 'Enakaivo na iviamaa asurakaho vene ja jarirame 'waravujaho nimairoa ka'ene Godira Huni ehija mihajaho ja ija kisi 'uname 'ajohuna'e asurakaho veju. 4 Ijihuni maijaho ea 'aho'a iviamaa ja paki'eju'e nisareri joni vaji vu'e ijá 'iavo Godira nú vwihanúe aremu jihuna'e nú 'unama sisea veji'i hihuna 'iavu. Ea kajija nitama iji pijihareja 'otua vetihuna'e 'waramana. Pu ea sisea'omo Godoni maiji vwihanúajaho ta'arohe apene 'uname sisea 'uasa vene 'ee núni Natohwa ka'ene Jesu Kerisoho hemahu. 5 Ja niheji'ina kaivo na kú'o ja vwiha'avarono 'waravu. Natohwijara ea Ijipiti ni'ajihume roe usevara vo ea ka'ene panimaa rojajija Hu venaume pa'arejara. 6 'Ene 'ona oji'ina ka'ene puni tinia nimaa nimaijaho arevajija Hu senia ka'ene majama nahunijino kamorame irechamiu'e nututi Godoni 'otua ka'ene vea ni'iniji 'ajaha hiju. 7 Ijaho niareri Satami ho Kamora 'ee ara mama'ina 'aho'a ka'ene ijihipuni rori navujipo hine sisea ka'ene 'uasa vene 'ee 'unama sisea ka'ene emaapo pavejujaho vene napapo napara ihanie oju'e parupo parua ihanie ojura'omo ea kajija iviamaa vena ka'ene majama reji'i namuji hiju. Ijihuna'e nú ijí kime vwihahuna. 8 Ijí 'unama nikwinu'ina kajino ea ikija 'u'o sisea navaha puna'i rone 'ee puni haha ruarahe 'ee ea ka'ene mama'inijija pataarorahe 'ee 'ona oji'ina puni mama'ini jihipuna'i ira sisea 'waravu. 9 'Enakaivo Maikeru ka'ene 'ona oji'ina puni natohwijara Setani'i Mosisi oni hahiji pakama vahacharavajaho ira sisea pa'waramana kaivo hu ma ijá 'wamane Natohwijara a eha mahuha 'wamana. 10 'Enakaivo ea ikija uneunecha ka'ene pu pahena pakivujija ronahe 'ee siripavura 'ee areri 'ua maha puna'i puni vwihaijino vene 'ee pura uneunecha ija'ina ka'ene vejujipo pu ruarahiura. 11 Pu eha sisea apehuna. Ijihuni maijaho pu Keni oni 'unamijino va'ara 'ee eha apehuni jihuna'e Peramura venaja'ina'e vejura 'ee Korara ninakarame rena pa'arena ja'ina'e vejura. 12 Ea ikijahija jara ahuma 'iruma ijuri vaji vu'ujija areri na'apo soha vaji navuja'ina pu vea ka'ene ja pu'úmo 'iruma'e ijujaho pu pajuvura 'ee pu pusumano 'ajo'arame areri 'imitia toa pa'ana'e 'asiasii 'anae va'uja'ine 'ee ichi nahenare'e 'ina pa'irima navuja'ina. Pu chinuma maho'o jaheju'e sarasaha paraju ja'ina. 13 Pura sisea ka'ene vejujihuni juhijaho areri sohi ajira amene sapa re'eju'e chiha ani rene siserasahe navuja'ina. Pu areri chinapo majikari jaheusahu ja'ina. 'Ena'omo nututa ka'ene na'i na'ii vajame navujaho puna'e aneja púsa pa'ana'e ranavu'e 'ajiha namu. 14 'Ene ike 'unama nikwinu'ina ka'ina'e Inakira Atamu oni amuhija iropu no'o pa'are'eme iraka ka'ene túna'i rehuniji kime ijá 'iama Kaha! Natohwijaho Huni ehija ka'ene arira maijihi pu'úmo ea niho'o mapoka mapoka asisame roara. 15 Hu ea mapoka maho'o aherame roe 'otua vetihuna 'ee ea sisesa ka'ene puni vaji hine 'unama sisearu vejujija 'ee ira sisea ka'ene ea sisesa kajipo Hua niname 'warava jihuna'e avahuna. 16 Ea ikija sui'ine 'ee ea nama'irono puni sisea sarame 'ee sisea iraka'e pu ura renaujaho ma ijí vejura. Pu ira toa rukina'omo pu ea pisimi'i pununa'i uneunecha maa ijí 'eka'iro avajura.

Ojono 'Ajohi'i Godira Oja Múhuni Vajiji Hi'avara

17 'Enakaivo ja vwehu nune na ja oja mihi'ine ira ka'ene núni Natohwa Jesu Keriso oni apasorupo 'waravajaho vwiha'avara. 18 Pu ja ijá 'iavare Vea túchamaa re'eje ea matihi'ina mapoka'e puni hahijara sisea ka'ene itunavujiru veji'i hihuna 'iavara. 19 Ea ikihipuni vwihaijaho mwe'a ikehuni ura ijara itu'one navujihuna'e pura veji'i ea ahaame 'oi'oi hihuna. Ijihuni maijaho Godoni 'Avena puni vaja pa'ana. 20 'Enakaivo vwehu nuna ka'ene na ja oja mihi'inakije joni nimaaroijaho veje emare'amana. 'E'eje Godoni 'Avena vajijino siporua 'o'avara. 21 'Ene Godira oja múhana vajijino hiji'i núni Natohwa Jesu Kerisora numiruma va'e majama hihuniji 'e'uhuniji 'ajaha hi'avara. 22 'Ene ea 'aho'a ka'ene puruva reti'eju'e hijujija numira'avara. 23 'Ene ea 'aho'a ka'ene veni va'ujija sirirami'avara 'ee ea 'aho'a juvi'i numira'avara kaivo ja paki'eje puni siseijara ja aruma'ama.

Ta'arohuni Siporua

24 'Enajihuna'e Hura areri 'ajoha'eje pa'amaaresume 'ee Hura veje ja Huni hanaji'ini jihuni una'i arira'e teamana'eje namihuna. 25 Núni Godi nikwinu ka'ene núa venume maranúaji ta'aroha. 'Ene Jesu Keriso ka'ene núni Natohwi jihuni vaji ta'aroha. Hanaji'ina Harura Ni'ina 'Ajohai'ina Ajira Rukina ijija Huna. Hu nitama rene majama ija'ina. Ameni.