Heb 11 | MHL | STEP | Aria kekanep Yeesus opora wiar opowa onoma feenap. I Yeesus opora yia maakemik nain makena-ke naep wiar kema suuwam-ikowa-ke. Ne maa unowa yiena mokok onaiya me urufimik, nain yiena kema-ke makena-ke naimik.

Hebrews 11

Opor makena ookowa onoma

1 Aria kekanep Yeesus opora wiar opowa onoma feenap. I Yeesus opora yia maakemik nain makena-ke naep wiar kema suuwam-ikowa-ke. Ne maa unowa yiena mokok onaiya me urufimik, nain yiena kema-ke makena-ke naimik. 2 Ne wi iiriw eker mua Mua Maneka opora wia maakek nain makena naep opora wiar opam-ikemik. Naapeya sira nain wiar kookalep teeria nain wi mua kaken eliwa-ke wia naek.

3 I Mua Maneka opora opowiya fain makena-ke naimik. Os-ke maeya miiwa ne aapereka maa muutitik imenarek. Naapeya maimik, i aakisa maa muutitik urufimik nain iiriw me ikua, ne Mua Maneka-ke maeya imenarek.

4 Aria Abel ^{▼▼11.4Opor ara fain Abel ne wi iiriw eker mua unowa nain wia maek, nain Olpela Testamen, Yenesis-pa nanar wiar urufowen.} iiriw Mua Maneka opora wiar opam-ikok maa eneka-pa Mua Maneka patirak nain eliw akena-ke wiar maek, ne weepe Kein maa patirak nain eliwa-ke me wiar naek. Abel sira naap-pa Mua Maneka-ke o mua kaken eliwa-ke naemi patirowa eliwa-ke wiar naek. Ne Abel iiriw umok, nain Mua Maneka opora opowa nain os-ke sira nain yia ofakowam-ikowa saarik.

5 Aria iiriw ekera Inok, Mua Maneka opora wiar opowiya mia onaiya aawep owow iinan amapurupok. Mokok enuma ikaeya amapurupok. Mua Maneka-ke aaweya mia onaiya mesenalep-puak. Eena Mua Maneka opor ara oko-pa maek naap,

“Iiriw Mua Maneka Inok me aawowa ikua nain sira wiar kookalem-ikua.”
(Yenesis 5.24)

6 Ne wi mua Mua Maneka opora me wiar opimik nain me wia kookalinon. Moram o mua, Mua Maneka wameiya wiar ekekam naep-na feenap mainok, makena Mua Maneka anane ikaiya. Ne fain pun mainok, makena, wi mua o wameiya ikowa kookalep akupimik nain wia apekarinon, naap mainok.

7 Aria Noa pun sira naap, Mua Maneka opora wiar opam-ikua. Naapeya Mua Maneka maa samora ikoka imenarinon nain maakeya makena-ke naek. Ne opora wiar ookinen naep aasa maneka sirarek, ikoka yena emeria ne muuk teeria unowiya me mesenaliyen naek. Mua Maneka opora naap wiar opak nan wi mua opora me wiar opamik nain sira ariman wiar wuak. Ne Mua Maneka opora wiar opowiya os-ke mua kaken eliwa-ke naek. Naeya mua papako Mua Maneka opora wiar opimik nain-ke teeria epaskun wia wuami wi mua kaken eliwa-ke wia naek.

Abraham Mua Maneka opora ookak

8 Aria Abraham pun sira naap, Mua Maneka opora wiar opam-ikua. Naapeya Mua Maneka-ke maakeya ona owowa piipuap miiwa oko ikiwok, miiwa eena o wuomaya ikoka ona ne ona teeria-ke neeke pokikuan nain. Ikip fuunep pokow epa nain me amisarek, Mua Maneka opora ookap oram ikiwep-puak. 9 O opora opowiya ikip miiw ara eena Mua Maneka maakek nan fuunep nan ikua. Nain o purer muaiya sel koora muutiw kuap nan ikua. Aria Mua Maneka ona kookalowa Abraham maakep koonowak nain ona muuka Aisak ne wiimasip Yekop, wis pun makena urufikuan. Naeya wis pun naap imenaremi sel koora-pa ikemik. 10 Abraham ona-na owow iinan kekanowa anane ikaiya neek ikowa kookalep kema moke ikua. Owowa eena Mua Maneka ona kema-pa imenap-puak nain.

11 Aria Abraham Mua Maneka opora wiar opam-ikua. Makena o pane-afurak, ne ona emeria Sara pun panep uroma wuowa me pepek. Nain Mua Maneka muuka iwowa maek nain makena naek. O opora opam-ikowiya ona emeria muuka kuisow opak. 12 Makena, Abraham iiwawun pane-afurak, naeya muuka imenowa me pepek naemik. Nain o muuka imenak, ne muuka kuisow nan o nembesir teeria mokoka pukemik. Unow akena, iinan mokoma saarik ne ifer saa saarik, wia tuunowa me pepek.

13 Aria iiriw Abraham ame ikemik nain wi opora opam-ikok umemik. Naeya Mua Maneka kookalowa wia maakep koonowak nain wiena mokoka-pa maa makena me urufamik. Wi maa nain wiimar makena urufiyen naep kemelam-ikemik. Kemelami maemik, “Makena, i miiwa fan ikemik nain oram purer mua ikemik. I senam me ikaiyen, i ikoka umep miiwa fain piipuowa-ke,” naap maem-ikemik. 14 Opor sira naap maemik nain feenap, wi yiena owowa kakeniw imeniyen naep naap maemik. 15 Wi wiena owow awona kema suuwekamik-na iiriw kirep ikiwekamik. 16 Nain me ikiwemik, weetak. Wi owow oko kookalemik, owow enuma ne eliwa eena iinan-pa ikua nain. Naapeya Mua Maneka yiena Maneka-ke naem-ikemik wi nain ariman wia maek, “Makena yo wiena Mua Maneka ikem,” naap maek. Moram owow enuma nain iiriw dubilap wia moresarep-puomak.

17 Mua Maneka Abraham akimami muuka kuisow nain ifakime naakek. Ne Abraham Mua Maneka opora wiar opam-ikowiya ona muuka Aisak Mua Maneka patirekam naep onak. Makena, Mua Maneka iiriw o opora fain maakek nain kema suuwak, “Ikoka Aisak-pa nena nembesir teeria mokoka manekarinon.” Nain o iikirap Mua Maneka opora ookami ona muuka kuisow akena nain eliw ifakiminen naek. 19 Moram kema maek, “Yo muuka uminon-na Mua Maneka eliw iikirowinon,” naap maek. Makena, Abraham muuka Aisak me ifakimok, nain i feenap maiyen, umowa saarik eruwa-pa aawok, naap maiyen.

20 Ne Aisak Mua Maneka opora wiar opam-ikowiya ona muuka erup Yekop Iso ikos kekanowa wiemi maa ele-eliwa wiimar wiar imenarowa nain wia maakek.

21 Ne Yekop Mua Maneka opora wiar opowiya umekam naep ona muuka Yosep muuka erup nain kekanowa wiek. Ne ona soomarow kuumiw enankowa wame uumap ikok Mua Maneka faremi unuma fakerak.

22 Ne Yosep pun naap, Mua Maneka opora wiar opam-ikua. Ne umekam naemi ona teeria Isrel wia maakek, “Ni wiimar Isip piipuap kirep Kenan ikiwemi-na yo oona pun efar aawep feekiya ikiwep epa neek soopeka,” naap wia maakek.

Moses Mua Maneka opora wiar ookak

23 Aria Moses ^{▼▼11.23Moses nanar nain Olpela Testamen, Eksodas-pa eliw urufowen.} onak wiawi, wi Mua Maneka opora wiar opam-ikemik. Iir nain Isip owow saria maneka wi Isrel muuka wia ifakimowa wia maakek. Ne Moses onak o muukarek nain urufak-na eliw akena. Naapeya muuka me yiar ifakimuk naep siiwa arow pipilimep-puamik. Wi owow saria kamenap wia onowa nain me keker opamik.

24 Ne Moses Isip owow saria wiipa-ke nanikap arimowak. O arimep Mua Maneka opora wiar opowiya maek, “O emeria nain muuka-ke, naap me efa mauk.” 25 Wi Isip wiamiya ikok sira samora onami kemelam-ikowa nain me kookalek, nain miiw sira-ke ne epa maala me ikowa-ke naek. Yo Mua Maneka teeria Isrel wiamiya sirirowa aawinen naek. 26 Ne maek, Isip owowa maa ele-eliwa unowa nain maa oram-ke. Yo yiena Mesaiya ookamkun emina efa ururowowa nain pun eliwa-ke naek. Moram wiimar Mua Maneka wameiya-pa maa makena urufinen naek. 27 Mua Maneka opora opap Isip owow saria maneka me keker opowa owowa nain piipuak. Mua Maneka me urufimik nain, os-ke urufowa saarik arep kekanep ikua. Naapeya akimowa unowa nomakek.

28 O Mua Maneka opora wiar opam-ikok sipsip ifakimep Pasowa sira nain wuak. Ne wi sipsip ifakimep aka aawep koor omopora-pa fiena-wareka wia maakek. Aria ensel ekapep wia ifakimowa nain aka nain wiar urufap i Isrel muuk iperowa me yiar ifakiminok naep naap onamik.

29 Ne wi Isrel Ifer Oka naimik nain puukap okaiwi ekowa me pepek, nain wi Mua Maneka opora wiar opowiya eka okaiwi ekamik. Feenap, ifera-ke pukep oko-okaiwi areya wi ekamik. Ne wi Isip-ke wiokap eku naep onamik-na ifera nainiw pukep oromi iiwawun wia mueya eka enep umemik.

30 Ne wi Isrel Mua Maneka opora wiar opowiya teeria maneka Yeriko nomon pika maneka nain saawirinowamik. Fofa ikur okaiwi-pa erup naap oniwkin pika nain onaiw tenep ururek.

31 Ne aria Yeriko pina emeria Reap ^{▼▼11.31Reap, o iiriw era emeria-ke. Nain o Mua Maneka kema suuwap wi Isrel wia asipak. Naeya Mua Maneka-ke aawok. Nanar nain Olpela Testamen, Yosua Sapta 2-pa urufowen.} naimik nain pun Mua Maneka opora opak. Iir oko Isrel mua erup owowa ikum wiar urufowa ikiwemik. Ne Mua Maneka opora wiar opowiya wiam erup me wia ifakimuk naep wia aawep wia pipilimok. Naapeya wi Isrel owowa nain wiar kererep wi Mua Maneka opora wiar fienamik nain iiwawun wia ifakimemi emeria nain me ifakimemik.

32 Ne yo eliw mae-ikiwinen, nain yo epa marew. Aa-na wi teeria fain wia maekam, Gidion, Barak, Samson, Yepta, Dewit, Samuel ne wi profet papako, wi nain. 33 Wi iiriw teeria nain, wi Mua Maneka opora wiar opam-ikemik. Naapeya wi papako kekanep miiw unowa saria wiamiya irakep wia nomakemik. Wi papakosira kakeniw oniwkin Mua Maneka maa wia maakek nain makena wiar arem-ikua. Papako, Mua Maneka kekanowa-pa maa eneka laiyon opaimika wia ofomiwkin me wia ifakimemik. 34 Ne papako, mukun yoowa akena-pa wia wuiwkin me awemik. Wi papako baliwep ao-wuepiwkin maa anima me wia aawem-ikua. Ne wi kekanowa marewarem-ikemik nain, Mua Maneka-ke wia kekanowam-ikua. Naeya wi kekanep owow oko oko wiamiya irakep wia nomakem-ikemik.

35 Wi emeria papako wiena muuka wiar umemik nain kiiriw iikiramik. Mua papako koora ekamik nain samor akena wia arufam-ikemik. Naap wia maakemik, “Ni Mua Maneka opora wiar maowa piipuowen-na nia wasirkamkun ikiwowen.” Nain wi kema feenap wuamik, i sira neeke umiyen-na ikoka iikirow epa-pa eliw akena ikaiyen naemik. Naep wia piipuowa naemik-na weetak, miatinemik. 36 Ne papako niirow opora wia opawami samor akena wia arufamik. Ne papako ifariw wia kaikap koora wia pekamik. 37 Papako nomon ika wiaremik. Papako mia ara gone-pa wia puukiwkin umemik. Ne papako furaiw wia mikiwkin umemik. Ne papako mia suuwowa weetakeya sipsip ne meme kanima ainep purer mua puukap yiawem-ikemik. 38 Eliwa me wia wuam-ikemik. Wiisak, wi inow epa mareweya ikiwep epa mua marewa-pa nan ikemik, ema kiira-pa, nomon ona-pa, kokora-pa nan ikemik. Nain wi Mua Maneka opora wiar opam-ikemik. Ne wi eliw akeniya wi miiw fain mua-ke wia iiraremi wia samoram-ikemik.

39 Wi unowa nain Mua Maneka opora wiar opam-ikowiya maa sira-sira wiar imenarem-ikua nain nomakiwkin unuma eliwa wiek. Nain Mua Maneka eena opora wia maep koonowak nain wiena mokok onaiya me urufamik, nain wi kekanep naap ikemik. 40 Moram Mua Maneka ona iiriw i yia naep opora wia maek nain wi wiisow makena me urufuk wia naek. Wiimar wisiya isiya iiwawun maneka os-ke yia saliwami unowiya dubil maneka ikauk yia naep sira naap wuak.