Psalms 148
Nemenemek hogohogok kunum foloŋ be kwetfoloŋ hakiiŋ adi wanakaŋ Bepaŋ niutumbaiŋ
1Yahwe niutumbaneŋ! Nemenemek wahiŋ kunum foloŋ hakiiŋ, hidi Yahwe niutumbaneŋ! 2Aŋelo heki hogohogok, hidi niutumbaneŋ! Kunum foloŋ mikme hatiiŋ hogohogok, hidi niutumbaneŋ!3Mele dut muyakip, hidi niutumbademek! Kaŋ hinantilamek heki, hidi maaŋ niutumbaneŋ! 4Kunum foloniŋ gimiŋgimiŋ lohinakaaŋ hataŋ, du niutumbaweŋ! Ime kunum gineŋ hataŋ, du niutumbaweŋ!
5Nemek hogohogok i negoŋ yobune mintagiŋ, unduŋ doktiŋa Yahwe niutumbaneŋ! 6Adi kwehik dibek yeniŋa-uguk indigoŋ tuwot hakiiŋ, unduŋ doktiŋa mede wobu tuwot mu tineŋ.
7Kwetfoloŋhi, hidi Yahwe niutumbaneŋ! Imeŋgwaŋ fuliŋmamaŋ gineŋ pisi wapuhi eŋ nemenemek maaneŋ uŋoŋ hatiiŋ tiŋa mulukwaŋ gineŋ filim fitak eŋ gwi mindip maiŋ be mulukwaŋ tiŋa fifiŋgobut, Wapum’walaŋ maŋiŋ mede tagimneiŋ, hidi niutumbaneŋ!
9Kweboboe wapuhi tiŋa tuwai kuyahi, bem gimiŋ mimihi tiŋa bem hoŋneŋ yakiiŋ, kale mimihi eŋ kale moihi, kale heki welehikdi kwetfoloŋ umeumet tiŋa hatiiŋ eŋ bagi heki, hidi Yahwe niutumbaneŋ!
11Mapme heki tiŋa metam hogohogok, gapman heki tiŋa talitimeŋ noli wanakaŋ hogohogok, eŋ mekuyahi tiŋa tamkuyahi, eŋ gawadahi tiŋa wapmihi, hidi hogohogok wanakaŋ Yahwe niutumbaneŋ!
13Biyagoŋ hinek, wanakaŋ hogohogok Yahwe niutumbaneŋ! Adi’walaŋ wougigitŋiŋdi metam hogohogok wohohikgigit u yalakapmedapmaŋ tilak. Wougigit loloŋnit wondi kunum kwet yalakapmedapmaŋ tilak. 14Adi kayoŋbopŋiye wohohikgigit yenintilooŋ tubufafaŋeguk. Unduŋ doktiŋa Isilaehi, weleŋdi hinek yabukahilelak, adi niutumbaiŋ.
Yahwe niutumbaneŋ!
Copyright information for
NOP