Ecclesiastes 10

1Njengoba impukane ezifele phakathi kwamakha ziwenza anuke kubi,
kunjalo lobuwula obuncinyane bugabhela ukuhlakanipha lodumo.
2Inhliziyo yolungileyo ikhungathekela ekulungeni,
kodwa inhliziyo yesiwula ikhungathekela ebubini.
3Loba ehamba nje emgwaqweni
oyisiwula kalangqondo,
utshengisa loba ngubani ubuphukuphuku bakhe.
4Aluba umbusi ekuthukuthelela,
ungasuki esikhundleni sakho;
ukuthobeka kungathoba umonakalo obungaba khona.

5Bukhona ububi esengibubonile ngaphansi kwelanga,
kuliphutha elenziwa ngumbusi:
6Iziwula ziphakanyiselwa ezikhundleni ezinengi eziphezulu,
kodwa abanothileyo belezikhundla eziphansi.
7Sengibone izichaka zigade amabhiza,
kuthi amakhosana ahambe ngezinyawo njengezichaka.

8Lowo ogebha umgodi angawela kuwo;
odiliza umduli angalunywa yinyoka.
9Oqhekeza amatshe angalinyazwa yiwo;
obanda inkuni angaba sengozini yazo.

10Lapho ihloka libuthundu
ubukhali balo bungalolwanga,
kudingeka amandla amanengi
kodwa ubungcitshi buyaphumelelisa.

11Nxa inyoka ihle ilume ingakalunjwa,
umlumbi kaselanzuzo.

12Amazwi aphuma emlonyeni wesihlakaniphi amnandi,
kodwa isiwula sichithwa yizindebe zaso.
13Ekuqaleni amazwi aso ayibuwula;
ekucineni aseyikuwumana okubi
14njalo isiwula sanda ngamazwi.

Kakho okwaziyo okuzayo
ngubani ongamazisa okuzakwenzakala ngemva kwakhe na?

15Umtshikatshika wesiwula uyasidinisa;
kasiyazi indlela eya edolobheni.

16Maye kuwe, wena lizwe onkosi yalo yayiyisichaka,
amakhosana akho azitika ngamadili ekuseni.
17Ubusisiwe wena, wena lizwe onkosi yalo izalwa esikhosini
amakhosana alo adla ngezikhathi eziqondileyo
edlela ukuqina hatshi ukudakwa.

18Nxa indoda ilivila intungo ziyabhensa;
nxa izandla zayo ziyekethisa indlu iyavuza.

19Idili lenzelwa ukujabula,
lewayini lenza impilo ibe mnandi,
kodwa imali yiyo impendulo yakho konke.

20Ungayithuki inkosi lasemicabangweni yakho,
loba uqalekise abanothileyo loba usendlini yakho yokulala,
ngoba mhlawumbe inyoni yasemoyeni ingawathwala amazwi akho,
loba inyoni ephaphayo ingayabika okutshoyo.