Hos 14 | NdeBEN | STEP | Buyela, we Israyeli, kuThixo uNkulunkulu wakho. Izono zakho yizo ezikuwisileyo!

Hosea 14

Ukuphenduka Kuzaletha Izibusiso

1 Buyela, we Israyeli, kuThixo uNkulunkulu wakho.
Izono zakho yizo ezikuwisileyo!
2 Thatha amazwi
ubuyele kuThixo.
Uthi kuye,
“Sithethelele zonke izono zethu
njalo usamukele ngomusa
ukuba sinikele isithelo sezindebe zethu.
3 I-Asiriya ayingeke isikhulule;
kasiyikugada amabhiza empi.
Kasisoze siphinde sithi, ‘Onkulunkulu bethu’
kulokho okwenziwa yizandla zethu,
ngoba abazintandane bathola isihawu kuwe.”

4 “Ngizakwelapha ubuphakaphaka babo
ngibathande ngokukhululeka,
ngoba ukuthukuthela kwami sekusukile kubo.
5 Ngizakuba njengamazolo ku-Israyeli;
uzaqhakaza njengeluba.
Uzatshonisa impande zakhe
phansi njengomsedari waseLebhanoni;
6 amahlumela akhe amatsha azakhula.
Ubuhle bakhe buzakuba njengesihlahla se-oliva,
iphunga lakhe libe njengomsedari waseLebhanoni.
7 Abantu bazahlala njalo emthunzini wakhe.
Uzakhula kuhle njengamabele.
Uzaqhakaza njengevini,
lodumo lwakhe luzakuba njengolwewayini laseLebhanoni.
8 Awu Efrayimi, kuyini futhi engingakwenza ngezithombe?
Ngizamphendula ngimlondoloze.
Mina nginjengesihlahla sephayini esiluhlaza,
ukuthela kwakho izithelo kuvela kimi.”

9 Ngubani ohlakaniphileyo? Uzazibona lezizinto.
Ngubani oqedisisayo? Uzazizwisisisa.
Izindlela zikaThixo zilungile
abalungileyo bahamba kuzo,
kodwa abahlamuki bayakhubeka kuzo.