Job 28

Lapho Okutholakala Khona Inhakanipho

1Kulomgodi wesiliva
lendawo lapho okucengwa khona igolide.
2Insimbi ithathwa emhlabathini,
lethusi lincibilikiswa emanyeleni.
3Umuntu uyawuxotsha umnyama;
uguduza ezingoxweni eziphansi kude
edinga amanyele emnyameni othe bhuqe.
4Khatshana kwezindawo zabantu ugebha umgodi,
ezindaweni lapho okungafiki nyawo lwamuntu;
khatshana kwabantu uyalenga, azunguzeke.
5Umhlaba, okuphuma kuwo ukudla,
uyaguquka ngaphansi ingathi utshiswe ngomlilo;
6amasafire amatshe amahle ayaphuma emadwaleni,
uthuli lwawo lugcwele igolide.
7Kakukho nyoni edla inyama eyaziyo leyondlela efihlekileyo,
kakulalihlo laluphi ukhozi oselwake lwayibona.
8Izilo ezizithembileyo kazilubeki unyawo kuyo,
njalo kakulasilwane esizingela khona.
9Isandla somuntu yiso esihlasela idwala eliyinsengetshe
siveze obala impande zezintaba.
10Uyaligubha idwala angene;
ilihlo lakhe liwabone wonke amagugu alo.
11Uyathungatha lapho okudabuka khona imifula
aveze obala izinto ezifihlekileyo.

12Kodwa ukuhlakanipha kungafunyanwa ngaphi na?
Kuhlala ngaphi na ukuzwisisa?
13Umuntu kakuzwisisi ukuqakatheka kwakho;
kakufunyanwa elizweni labaphilayo.
14Phansi ekujuleni kuthi, “Kakukho kimi”;
ulwandle luthi, “Kangilakho mina.”
15Kungeke kwathengwa ngegolide elicolekileyo,
njalo lentengo yakho ingeke yalinganiswa ngesiliva.
16Kungeke kwathengwa ngegolide lase-Ofiri,
loba nge-onikisi kumbe isafire.
17Kungazake kulinganiswe legolide loba amatshe akhazimulayo,
njalo kakuzuzwa ngemiceciso yegolide.
18Amatshe amahle ekhorali lejaspa lawo kawabalwa lapha;
intengo yokuhlakanipha ingaphezulu kwamarubhi.
19Ithophazi yaseKhushi ngeke ilinganiswe lakho;
ngeke kuthengwe langegolide elicolekileyo.

20Pho kuvela ngaphi ukuhlakanipha na?
Kuhlala ngaphi ukuzwisisa?
21Kufihliwe emehlweni ento yonke ephilayo,
kucatshisiwe lakuzo izinyoni zasemoyeni.
22INcithakalo loKufa kuthi,
“Amahungahunga akho yiwo kuphela esiwezwayo.”
23UNkulunkulu uyayizwisisa indlela yakho
njalo nguye yedwa okwaziyo lapho okuhlala khona,
24ngoba uyayikhangela imikhawulo yomhlaba
akubone konke okungaphansi kwamazulu.
25Wathi emisa umfutho womoya,
elinganisa isimo samanzi,
26wathi ebeka umthetho wezulu elinayo
lendlela yezulu elilesiphepho,
27wasekukhangela ukuhlakanipha wakuhlola butsha;
wakukholwa wakuqinisa, wakulinga ukuthi kuqinile.
28Wathi emuntwini,
“Ukumesaba uThixo yikho ukuhlakanipha,
lokuxwaya ububi yikho ukuzwisisa.”