Proverbs 11

1UThixo uyazenyanya izilinganiso zokudlelezela,
kodwa uthokoza ngezilinganiso eziqondileyo.

2Nxa kungena ukuzigqaja kungena lokweyisa,
kodwa ukuzithoba kuhamba lenhlakanipho.

3Ubuqotho kwabaqondileyo buyabakhokhela,
kodwa abangathembekanga
babulawa yibumenemene babo.

4Inotho kayisizi lutho ngosuku lweziphithiphithi
kodwa ukulunga kuyaphephisa ekufeni.

5Ukulunga kwabangelacala kuqondisa indlela yabo,
kodwa ababi bawiswa yibubi babo.

6Ukulunga kwabaqondileyo kuyabakhulula,
kodwa abangathembekanga
bagwenxwa yizinkanuko zabo ezimbi.

7Umuntu omubi angafa ithemba lakhe liyaphela;
konke abesithi uzakuzuza ngamandla akhe
kuphelela ezeni.

8Umuntu olungileyo uyakhululwa enkathazweni,
kusuke kuyewela komubi.

9Ngomlomo wakhe umuntu ongakholwayo uyamchitha umakhelwane,
kodwa ngolwazi abalungileyo bayaphepha.

10Nxa kuphumelela abalungileyo umuzi uyathokoza;
nxa kusifa omubi kuba lokujabula.

11Ngokubusiswa ngabalungileyo omubi ubalodumo,
kodwa ngomlomo wezigangi uyachitheka.

12Umuntu ongelangqondo weyisa umakhelwane wakhe,
kodwa umuntu ozwisisayo uthiba ulimi lwakhe.

13Onyeyayo wehluleka ukuvala isifuba sakhe,
kodwa othembekileyo uyayigcina imfihlo.

14Isizwe esingelabukhokheli obuqondileyo siyachitheka,
kodwa ngobunengi babeluleki siyanqoba.

15Lowo okhuphela omunye umuntu isibambiso uzahlupheka,
kodwa owalayo ukupha isibambiso uvikelekile.

16Umfazi olomusa uyahlonitshwa,
kodwa amadoda alesihluku azuza inotho kuphela.

17Umuntu olomusa uyazisiza,
kodwa umuntu ololunya uyazilimaza.

18Umuntu omubi uhola umvuzo wobuqili,
kodwa lowo ohlanyela ukulunga uvuna umvuzo omuhle.

19Lowo omiyo ekulungeni uzuza ukuphila,
kodwa oxotshana lobubi uya ekufeni.

20 UThixo uyabazonda abantu abalenhliziyo embi,
kodwa uyathokoza ngalabo abandlela zabo zilungile.

21Kodwa yazi lokhu, ababi bazajeziswa
kodwa abalungileyo bazahlala bekhululekile.

22Njengesongo legolide lifakwe emakhaleni engulube,
unjalo umfazi omuhle kodwa ongelambeko.

23Izifiso zabalungileyo zizuza okuhle
kodwa ithemba lababi liphelela osizini.

24Ophayo ngesihle uyazuza okunengi kulakuqala,
lowo ogodlayo ungenelwa yibuyanga.

25Lowo ophayo uzaphumelela;
owonga abanye laye uzakongiwa.

26Abantu bayamqalekisa lowo ogodla amabele,
kodwa izibusiso zingumqhele walowo ovuma ukuwathengisa.

27Lowo odinga ukulunga uzuza umusa,
kodwa okubi kwehlela lowo okudingayo.

28Othembele enothweni yakhe uzakuwa;
kodwa olungileyo uzaphila njengehlamvu eliluhlaza.

29Olethela abendlu yakhe uhlupho ilifa lakhe yize,
lesihawu sizakuba yinceku yohlakaniphileyo.

30Izithelo zolungileyo ziyisihlahla sokuphila,
njalo lowo ozuza imiphefumulo uhlakaniphile.

31Nxa abalungileyo bezuza ukujeziswa emhlabeni
pho kuzakuba njani kwabangakholwayo labayizoni!