Psalms 59

Kumqondisi wokuhlabela. Itshuni ethi, “Ungabhidlizi.” ElikaDavida. Imikithamu. Ngesikhathi uSawuli ethume amadoda ukuqaphela indlu kaDavida ukuze bambulale.

1Ngikhulula ezitheni zami, awu Nkulunkulu;
ngivikela kulabo abangivukelayo.
2Ngikhulula kubenzi bobubi
ungisindise ebantwini abomele igazi.

3Ake ubone ukuthi bangicathamela njani!
Amadoda esabekayo angakhela amacebo
kungelacala loba isono engisenzileyo, Oh Thixo.
4Angonanga lutho, kodwa balungele ukungihlasela.
Phakama ungisize; ake ubone umumo engikuwo!
5Oh Thixo Nkulunkulu Somandla,
Nkulunkulu ka-Israyeli,
ake uzivuse wena ukuze uzijezise zonke izizwe;
ungabazweli isihawu bonke abahlamuki ababi.

6Bathi bephenduka kusihlwa
babe behwabha njengezinja,
bahwede bebhoda ledolobho.
7Ake ubone ukuthi baphihlizani emilonyeni yabo:
baphihliza izinkemba ezindebeni zabo,
bese besithi, “Ngubani osizwayo?”
8Kodwa wena, Oh Thixo, uyabahleka;
uyazigqabhazela zonke lezozizwe.

9Oh Mandla ami, ngiyakulindela;
wena, Oh Nkulunkulu, uyinqaba yami,
10Nkulunkulu wami olothando.

UNkulunkulu uzahamba phambi kwami
angenze ngiklolode phezu kwalabo abangingcolisayo.
11Kodwa ungababulali, Nkosi hawu lethu,
funa abantu bakithi bakhohlwe.
Ngamandla akho
baphumputhekise njalo ubehlule wena Thixo, sihlangu sethu.
12Ngenxa yezono zemilomo yabo,
ngenxa yamazwi ezindebe zabo,
kababanjwe belokhu bezigqaja benjalo.
Ngenxa yezethuko lamanga abawaqambayo,
13babhuqe ngolaka, babhuqe bangabi khona futhi.
Lapho-ke kuzakwaziwa lasemikhawulweni yomhlaba
ukuthi uNkulunkulu uyabusa phezu kukaJakhobe.

14Bathi bephenduka kusihlwa
babe behwabha njengezinja,
bahambahambe becathama edolobheni.
15Bayazula bedinga ukudla
bahlabe umkhulungwane nxa bengasuthanga.
16Kodwa mina ngizahlabelela ngihaya amandla akho,
ekuseni ngizahlabelela ngihaya uthando lwakho,
ngoba wena uyinqaba yami,
isiphephelo sami ezikhathini zokuhlupheka.

17Oh wena Mandla ami, ngihlabelela indumiso kuwe;
wena, Oh Nkulunkulu uyinqaba yami,
Nkulunkulu wami olothando.