Psalms 73

Ugwalo 3

AmaHubo 73 – 89

Ihubo lika-Asafi.

1Ngempela uNkulunkulu ulungile ku-Israyeli,
kulabo abahlanzekileyo enhliziyweni.

2Kodwa mina, inyawo zami zaphose zatshelela;
ngaphose ngakhuthisa ukunyathela.
3Ngasuka ngahawukela abaklolodayo
ngibona ukuphumelela kwezigangi.

4Kabalazo inhlungu;
imizimba yabo iphilile iqinile.
5Kabalayo imithwalo enzima ejayelekileyo ebantwini;
kabahlukuluzwa loba yini njengabanye abantu.
6Ngakho-ke ukuziqhenya kuyisigqizo sabo entanyeni;
bazigqokisa ngokwenza isihluku.
7Ezinhliziyweni zabo ezingelazwelo kuphuma ububi;
iminakano emibi yezingqondo zabo ayilamikhawulo.
8Bayakloloda, bakhulume ngomona;
bayaqholoza basongele ukuncindezela.
9Imilomo yabo ithi izulu selingelabo,
lezilimi zabo zihle ziwuthathe umhlaba.
10Yikho abantu bakibo bebakholwa,
bawanathe amanzi kakhulukazi.
11Bathi, “UNkulunkulu angakwazi kanjani?
OPhezukonke ulalo ulwazi na?”

12Yikho lokhu abayikho khona ababi
bavele kabananzi, iyanda eyabo inotho.

13Ngempela bekuyize ukugcina inhliziyo yami ihlanzekile;
kube yize ukugeza izandla zami ngokungelacala.
14Ilanga lonke ngitshona ngikhathazwa;
ngiyajeziswa ekuseni zonke insuku.

15Aluba ngangithe,
“Ngizakhuluma ngitsho njalo,”
ngabe ngangibakhohlisa abantwabakho.
16Ngathi ngizama ukukuzwisisa konke lokhu
ngezwa kungisinda,
17ngaze ngangena endlini engcwele kaNkulunkulu;
lapho-ke ngasengizwisisa isiphetho sabo.

18Ngempela uyababeka endaweni etshelelayo;
ubalahlela phansi ekubhujisweni.
19Yeka, ukubhujiswa kwabo lula nje,
bakhuculwe nje yikwesaba!
20Njengephupho nxa umuntu ephaphama
kuzakuba njalo lapho usuvuka, Thixo,
uzabeyisa njengemifanekiso yengqondo kuphela.

21Lapho inhliziyo yami yayifuthelene
lomoya wami uthukuthele,
22ngangiyisithutha esingaziyo;
ngangiyinyamazana yeganga kuwe.

23Ikanti ngihlezi ngilawe;
uyangibamba ngesandla sami sokunene.
24Uyangikhokhela ngokweluleka kwakho
kuthi ngemva kwalokho uzangithatha ungise ebukhosini.
25Ngilobani na ezulwini ngaphandle kwakho?
Lomhlaba kawulakho engikufisayo ngaphandle kwakho.
26Inyama yami lenhliziyo yami kungehluleka
kodwa uNkulunkulu ungamandla enhliziyo yami,
uyisabelo sami laphakade.

27Labo abakhatshana lawe bazabhubha;
uyababhidliza bonke abangathembekanga kuwe.
28Kodwa mina kimi kuhle ukuba seduze loNkulunkulu.
Sengenze uThixo Wobukhosi isiphephelo sami;
ngizafakaza ngazozonke izenzo zakho.