Psalms 81

Kumqondisi wokuhlabela. Ngendlela yegithithi. Elika-Asafi

1Hlabelelani ngentokozo kuNkulunkulu ongamandla ethu;
memezani kakhulu kuNkulunkulu kaJakhobe!
2Qalisani ukuhlabela, tshayani isigubhu,
khalisani ichacho elimnandi lomhubhe.

3Khalisani uphondo lwenqama ekuThwaseni kweNyanga,
lalapho inyanga isigcwele, ngelanga lomkhosi;
4lesi yisimemezelo sika-Israyeli,
umthetho kaNkulunkulu kaJakhobe.
5Wakumisa njengesimiso kuJosefa
lapho aphuma wavukela ilizwe leGibhithe,
lapho ezwa khona ulimi esasingaluzwa.

Ngezwa ilizwi engingalaziyo lisithi:

6“Ngawethula umthwalo emahlombe abo;
izandla zabo zakhululwa engcebethwini.
7Ekuhluphekeni kwenu lamemeza mina ngalikhulula.
Ngaliphendula ngiphakathi komdumo weyezi;
ngalilinga emanzini aseMeribha.
8Zwanini, awu bantu bami, mina ngizalixwayisa
aluba lingangilalela, Oh Israyeli!
9Lingabi lonkulunkulu wezizweni phakathi kwenu;
lingabokhothamela unkulunkulu ongaziwayo.
10 NginguThixo uNkulunkulu wenu,
owalikhuphayo eGibhithe.
Vulani kakhulu umlomo wenu ngizawugcwalisa.

11Kodwa abantu bami kabangilalelanga;
u-Israyeli wala ukungithobela.
12Ngakho ngasengibayekela ngezinhliziyo zabo zobuqholo
ukuthi balandele lokho abakufunayo.

13Aluba abantu bami bengangilalela,
aluba u-Israyeli engalandela izindlela zami,
14masinyane nje ngingazibhuqa izitha zabo
ngiphakamisele isandla sami ezitheni zabo!
15Labo abamzondayo uThixo bangatshotshobala phambi kwakhe,
kuthi isijeziso sabo sibe ngesaphakade.
16Kodwa lina lingaphiwa ingqoloyi enhle kakhulu;
ngilisuthise ngoluju oluphuma edwaleni.”