Rom 3 | NdeBEN | STEP | Pho yibungcono bani obukhona ekubeni ngumJuda, loba ligugu bani elikhona ekusokeni na?

Romans 3

Ukuthembeka KukaNkulunkulu

1 Pho yibungcono bani obukhona ekubeni ngumJuda, loba ligugu bani elikhona ekusokeni na? 2 Kukhulu ngezindlela zonke. Okokuqala amaJuda aphathiswe wona kanye amazwi kaNkulunkulu.

3 Kuba njani nxa abanye babo babengathembekanga? Ukungathembeki kwabo kungachitha ukuthembeka kukaNkulunkulu na? 4 Akunjalo! UNkulunkulu kabe qotho, umuntu wonke abe ngumqambi wamanga. Njengoba kulotshiwe ukuthi:

“Ukuze ubonakaliswe ukuthi uqondile lapho ukhuluma,
njalo unqobe lapho usahlulela.” ^{▼▼AmaHubo 51.4}
5 Kodwa nxa ukungalungi kwethu kusenza ukulunga kukaNkulunkulu kucace kakhulu, thina sizakuthini na? UNkulunkulu kalunganga ngokwehlisela ulaka lwakhe phezu kwethu na? (Mina ngikhuluma njengokubona komuntu.) 6 Ngempela akunjalo. Aluba kwakunjalo, uNkulunkulu ubengawahlulela kanjani umhlaba na? 7 Omunye angaphikisa athi, “Nxa amanga ami ekhulisa ubuqotho bukaNkulunkulu ngalokho andise udumo lwakhe, kungani lokhe ngilahlwa njengesoni na?” 8 Kungani singathi njengoba sigconwa kuthiwa sitsho njalo futhi abanye bathi “Kasenzeni okubi ukuze kuvele okulungileyo na?” Ukulahlwa kwabo kufanele.

Kakho Olungileyo

9 Pho sizaphetha ngokuthini na? Kambe sesingcono na? Hatshi akunjalo! Sesitshilo ukuthi umJuda loweZizwe bangokufanayo ngaphansi kwamandla esono. 10 Njengoba kulotshiwe ukuthi:

“Kakho olungileyo, kakho loyedwa;
11 kakho ozwisisayo,
kakho odinga uNkulunkulu.
12 Bonke baphambukile,
bonke kabasasizi ngalutho;
kakho owenza okuhle,
kakho loyedwa.” ^{▼▼AmaHubo 14.1-3; 53.1-3; UMtshumayeli 7.20}
13 “Imiphimbo yabo ingamangcwaba avulekileyo;
inlimi zabo zisebenza ukukhohlisa.” ^{▼▼AmaHubo 5.9}
“Ubuhlungu bezinhlangwana busezindebeni zabo.” ^{▼▼AmaHubo 140.3}
14 “Imilomo yabo igcwele ukuthuka lentukuthelo.” ^{▼▼AmaHubo 10.7}
15 “Inyawo zabo zilesiqubu ekuchitheni igazi;
16 incithakalo losizi kuphawula izindlela zabo,
17 indlela yokuthula kabayazi.” ^{▼▼U-Isaya 59.7-8}
18 “Ukumesaba uNkulunkulu akukho emehlweni abo.” ^{▼▼AmaHubo 36.1}
19 Siyakwazi ukuthi loba kuyini okutshiwo ngumthetho, ukutsho kulabo abangaphansi komthetho, ukuze imilomo yonke ithuliswe lomhlaba wonke ube lomlandu kuNkulunkulu. 20 Ngakho-ke, kakho okuzathiwa ulungile emehlweni akhe ngokugcina umthetho; kodwa ngomthetho siba lakho ukwazi isono.

Ukulunga Ngokukholwa

21 Kodwa khathesi ukulunga okuvela kuNkulunkulu, ngaphandle komthetho, sekwazisiwe, njalo kwafakazelwa nguMthetho labaphrofethi. 22 Ukulunga lokhu okuvela kuNkulunkulu kufika kubo bonke abakholwa kuJesu Khristu. Akulamehluko phakathi komJuda loweZizwe, 23 ngoba bonke bonile njalo bayasilela enkazimulweni kaNkulunkulu, 24 njalo bakhululwa ngomusa wakhe kudlula ngensindiso eyeza ngoKhristu uJesu. 25 UNkulunkulu wambeka njengomhlatshelo wenhlawulo, ngokukholwa egazini lakhe. Wenza lokhu ukuze abonakalise ukulunga kwakhe, ngoba ngokubekezela kwakhe wayekela izono ezenziwe ngaphambilini kungekho kujeziswa, 26 wakwenzela ukubonakalisa ukulunga kwakhe ngalesisikhathi, ukuze abe ngolungileyo njalo onguye obenza babe ngabalungileyo labo abakholwa kuJesu.

27 Pho kungaphi ukuzincoma? Kutshiywe ngaphandle. Ngasimiso bani na? Esokugcina umthetho na? Hatshi, kodwa ngesokukholwa. 28 Ngoba siyaqinisa ukuthi umuntu ulungiswa yikukholwa langaphandle kokugcina umthetho. 29 UNkulunkulu unguNkulunkulu wamaJuda kuphela na? KasuNkulunkulu wabeZizwe njalo na? Yebo, ungowabeZizwe futhi, 30 njengoba uNkulunkulu emunye kuphela, ozalungisa abasokileyo ngokukholwa labangasokanga ngalokho kukholwa okufanayo. 31 Pho, siyawuchitha umthetho ngalokhu kukholwa na? Hatshi, akunjalo! Kodwa, okuyikho yikuthi umthetho siyawusekela.