Mal 3 | NdeIBE | STEP | “Khangelani, ngizathuma isigijimi sami esizangilungisela indlela. Kuzakuthi masinyane uJehova elimdingayo uzakuza ethempelini lakhe; isigijimi sesivumelwano, elisilangazelelayo sizakuza,” kutsho uJehova uSomandla.

Malachi 3

1 “Khangelani, ngizathuma isigijimi sami esizangilungisela indlela. Kuzakuthi masinyane uJehova elimdingayo uzakuza ethempelini lakhe; isigijimi sesivumelwano, elisilangazelelayo sizakuza,” kutsho uJehova uSomandla.

2 Kodwa ngubani na ongalumela usuku lokuza kwaso? Ngubani ongema nxa eqhamuka na? Ngokuba sizakuba njengomlilo womcengi wensimbi kumbe njengesepa yomgezisi. 3 Sizahlala njengomcengi lomhlambululi wesiliva; sizahlambulula abaLevi sibacenge njengesiliva legolide. Kulapho-ke uJehova azakuba lawo amadoda azaletha iminikelo ngokulunga,

4 kuthi-ke iminikelo kaJuda leyeJerusalema yamukeleke kuJehova, njengezinsukwini ezedlulayo, njengeminyakeni yekadeni.

5 “Ngakho ngizasondela kini ukuzakwahlulela. Ngizaphangisa ukufakaza okubi ngezangoma, ngeziphingi, labafungela amanga, lalabo abadlelezela izisebenzi ngomholo wazo, labo abacindezela abafelokazi lezintandane, abangahluleli kuhle abezizweni, kodwa abangangesabiyo mina,” kutsho uJehova uSomandla.

Ukwebela uNkulunkulu

6 “Mina uJehova kangiguquki. Ngalokho lina, bazukulu bakaJakhobe, kalibhujiswanga. 7 Kulokhu kwasukela esikhathini sabokhokho benu laphambuka emilayweni yami kalaze layigcina. Buyani kimi, lami ngizabuya kini,” kutsho uJehova uSomandla.’ “Kodwa liyabuza lithi, ‘Sibuyele kanjani na?’

8 “Umuntu angamphanga uNkulunkulu na? Lina liyangiphanga kodwa liyabuza lithi, ‘Sikuphanga kanjani na?’ “Ngokwetshumi langeminikelo. 9 Liphiwe isiqalekiso – isizwe sakini sonke – ngokuba liyangiphanga. 10 Lethani konke okwetshumi esiphaleni ukuze kube lokudla endlini yami.” Uthi uJehova uSomandla, “Ngilingani kulokhu libone ingabe kangikuwavula amasango ezulu ngithulule izibusiso elizaze liswele ukuthi lizithele ngaphi. 11 Ngizaxotsha izibungu ukuze zingadli amabele enu, lamavini emasimini enu kawayikukhithiza izithelo zawo,” kutsho uJehova uSomandla. 12 “Lapho izizwe zonke zizakuthi libusisiwe, ngokuba elenu lizakuba yilizwe elibukekayo,” kutsho uJehova uSomandla.

13 Uthi uJehova, “Selikhuluma amazwi abuhlungu ngami. Kodwa liyabuza lithi, ‘Kuyini okubi esikutshiloyo ngawe na?’

14 “Lithe lina, ‘Kakusizi ngalutho ukukhonza uNkulunkulu. Sazuzani ngokulandela izimiso zakhe saziphatha njengabalilayo phambi kukaJehova uSomandla na? 15 Kodwa manje isiqholo sithi singobusisiweyo. Ngeqiniso izigangi ziyaphumelela, kanye lalabo abamhwedelayo uNkulunkulu kabenziwa lutho.’ ”

16 Kwathi labo ababemesaba uJehova bakhulumisana, uJehova walalela, wezwa. Umqulu wencwadi yesikhumbuzo walotshwa phambi kwakhe mayelana lalabo ababemesaba uJehova ababehlonipha ibizo lakhe.

17 Uthi uJehova uSomandla, “Bazakuba ngabami, ngosuku mhla ngibenza inotho yami eligugu. Ngizabayekela, njengoba indoda iyayibe lesihawu iyekele indodana yayo eyincedisayo. 18 Njalo lizawubona umahluko phakathi kwabalungileyo lababi, phakathi kwalabo abamkhonzayo uNkulunkulu lalabo abangamkhonziyo.