2Sa 15 | Ndebele | STEP | Kwasekusithi emva kwalokhu uAbisalomu wazilungisela izinqola lamabhiza, labantu abangamatshumi amahlanu begijima phambi kwakhe .

1 Kwasekusithi emva kwalokhu uAbisalomu wazilungisela izinqola lamabhiza, labantu abangamatshumi amahlanu begijima phambi kwakhe ^a. 2 UAbisalomu wayesevuka ekuseni kakhulu eme eceleni kwendlela yesango; kwakusithi wonke umuntu olecala lomthetho eliya enkosini ukwahlulelwa, uAbisalomu ambize athi: Ungowawuphi umuzi? Lapho esithi: Inceku yakho ingowesinye sezizwe zakoIsrayeli; 3 uAbisalomu abesesithi kuye: Bona, indaba zakho zinhle zilungile, kodwa kakho owenkosi ukuthi akuzwe. 4 UAbisalomu abesesithi: Kungathi ngabe ngibekwe umahluleli elizweni, ukuthi wonke umuntu olecala lomthetho lodaba angeza kimi, njalo bengizamlungisela ^b. 5 Kwakusithi lapho kusondela umuntu ukumkhothamela, elule isandla sakhe, ambambe, amange. 6 UAbisalomu wasesenza ngalindlela kuIsrayeli wonke, bona abeza enkosini ukwahlulelwa; ngalokho uAbisalomu wathumba ^{▼▼ wathumba: Heb weba} inhliziyo yamadoda akoIsrayeli.

7 Kwasekusithi ekupheleni kweminyaka engamatshumi amane uAbisalomu wathi enkosini: Ake ngiyekhokha isithembiso sami engasithembisa eNkosini eHebroni ^d. 8 Ngoba inceku yakho yathembisa isithembiso ^e ngisahlala eGeshuri eSiriya ngisithi: Uba iNkosi ingibuyisela lokungibuyisela eJerusalema, ngizayikhonza iNkosi ^f. 9 Inkosi yasisithi kuye: Hamba ngokuthula. Wasesukuma waya eHebroni ^g.

10 Kodwa uAbisalomu wathuma izinhloli ezizweni zonke zakoIsrayeli esithi: Lapho lisizwa ukukhala kophondo, lizakuthi: UAbisalomu uyinkosi eHebroni! 11 Kwasekuhamba loAbisalomu amadoda angamakhulu amabili esuka eJerusalema, anxusiweyo ^h, ahamba ebuqothweni bawo, njalo engazi lutho ⁱ. 12 UAbisalomu wasethumela wabiza uAhithofeli weGilo ^j, umeluleki kaDavida ^k, esuka emzini wakhe, eGilo ^l, esahlaba imihlatshelo. Njalo ugobe lwaqina, labantu bahamba banda ^m kuAbisalomu ⁿ.

13 Kwasekufika isithunywa kuDavida, sisithi: Inhliziyo yabantu bakoIsrayeli ilandela uAbisalomu ^o. 14 Wasesithi uDavida ezincekwini zakhe zonke ezazilaye eJerusalema: Sukumani, sibaleke, ngoba kasilakuphepha ebusweni bukaAbisalomu ^p. Phangisani ukuhamba, hlezi aphangise asifice, asehlisele ^{▼▼ sehlisele: Heb awisele phezu kwethu} okubi, atshaye umuzi ngobukhali benkemba. 15 Izinceku zenkosi zasezisithi enkosini: Njengakho konke inkosi, inkosi yami, ekukhethayo, khangela, nanzi inceku zakho. 16 Yasiphuma inkosi, layo yonke indlu yayo iyilandela. Inkosi yasitshiya abafazi abalitshumi, abafazi abancane, ukuze balinde indlu ^r. 17 Yasiphuma inkosi, labo bonke abantu beyilandela; bema endlini ekhatshana. 18 Lazo zonke inceku zayo zedlula eceleni kwayo, njalo wonke amaKerethi ^s lawo wonke amaPelethi ^t lawo wonke amaGiti, amadoda angamakhulu ayisithupha, eza amlandela evela eGati ^u, edlula phambi kwenkosi.

19 Inkosi yasisithi kuIthayi umGiti ^v: Lawe uhambelani lathi? Buyela uhlale lenkosi, ngoba ungowezizweni njalo ungumxotshwa endaweni yakho ^w. 20 Ufike izolo; pho, lamuhla ngikuzulazulise ngokuhamba lathi, njengoba ngiya lapho engiya khona? Buyela ubuyisele abafowenu. Umusa leqiniso kakube lawe ^x. 21 Kodwa uIthayi wayiphendula inkosi wathi: Kuphila kukaJehova, njalo kuphila kwenkosi yami ^y, inkosi, isibili kuleyondawo lapho inkosi yami, inkosi, ezakuba kiyo, loba kusekufeni loba kusekuphileni, lalapho izakuba khona inceku yakho. 22 UDavida wasesithi kuIthayi: Hamba, uchaphe ^z. UIthayi umGiti wasechapha kanye labantu bakhe bonke labantwanyana ababelaye. 23 Ilizwe lonke lakhala inyembezi ngelizwi elikhulu, njalo abantu bonke bachapha. Inkosi yasichapha isifula iKidroni ^aa, labantu bonke bachapha, ngasendleleni yenkangala ^ab.

24 Njalo khangela, uZadoki laye lawo wonke amaLevi elaye ^ac, bethwele umtshokotsho wesivumelwano sikaNkulunkulu ^ad, bawubeka phansi umtshokotsho kaNkulunkulu ^ae; uAbhiyatha wasesenyuka ^af, abantu bonke baze baphela ukudlula bephuma emzini. 25 Inkosi yasisithi kuZadoki: Buyisela umtshokotsho kaNkulunkulu emzini. Uba ngizathola umusa emehlweni eNkosi, izangibuyisa ^ag ingitshengise wona kanye lendawo yayo yokuhlala ^ah. 26 Kodwa uba isitsho njalo, ithi: Kangithokozi ngawe ^ai; khangela ngilapha, kayenze kimi njengokuhle emehlweni ayo ^aj. 27 Inkosi yasisithi kuZadoki umpristi: Ungumboni yini ^ak? Buyela emzini ngokuthula, loAhimahazi indodana yakho loJonathani indodana kaAbhiyatha, amadodana enu womabili elani ^al. 28 Bona, ngizalinda emazibukweni enkangala, kuze kufike ilizwi elivela kini lokungibikela ^am. 29 Ngakho uZadoki loAbhiyatha bawubuyisela umtshokotsho kaNkulunkulu eJerusalema, bahlala khona.

30 UDavida wasesenyuka ngomqanso wemihlwathi, esenyuka ekhala inyembezi, embomboze ikhanda lakhe ^an, wahamba engelamanyathela ^ao; labo bonke abantu ababelaye bambomboza, ngulowo lalowo ikhanda lakhe, benyuka, besenyuka bekhala inyembezi ^ap.

31 Kwasekubikwa kuDavida kwathiwa: UAhithofeli uphakathi kwabakugobe loAbisalomu. UDavida wasesithi: Nkosi, ake enze icebo likaAhithofeli ^aq libe yibuthutha.

32 Kwasekusithi uDavida esefike engqongeni lapho ayekhonza khona uNkulunkulu, khangela, uHushayi umArki wamhlangabeza ^ar, isembatho sakhe sidatshuliwe ^as, lenhlabathi isekhanda lakhe ^at. 33 UDavida wasesithi kuye: Uba usedlula lami, uzakuba ngumthwalo kimi ^au. 34 Kodwa uba ubuyela emzini uthi kuAbisalomu: Ngizakuba yinceku yakho, nkosi ^av; kade ngiyinceku kayihlo, kodwa khathesi sengizakuba yinceku yakho; khona uzangichithela icebo likaAhithofeli ^aw. 35 Njalo kabakho yini kanye lawe lapho oZadoki loAbhiyatha abapristi? Ngakho kuzakuthi yonke indaba oyizwayo endlini yenkosi, uyitshele oZadoki loAbhiyatha abapristi ^ax. 36 Khangela, kukhona lapho kanye labo amadodana abo amabili, uAhimahazi okaZadoki, loJonathani okaAbhiyatha; njalo uzathumela ngesandla sabo kimi yonke into ozayizwa ^ay. 37 UHushayi umngane kaDavida wasefika emzini ^az, loAbisalomu wafika eJerusalema ^ba.