Deu 33 | Ndebele | STEP | Lalesi yisibusiso uMozisi umuntu kaNkulunkulu abusisa ngaso abantwana bakoIsrayeli engakafi .

1 Lalesi yisibusiso ^a uMozisi umuntu kaNkulunkulu abusisa ngaso abantwana bakoIsrayeli engakafi ^b. 2 Wasesithi: INkosi yavela eSinayi, yenyukela kubo ivela eSeyiri, ^c yakhanya isentabeni yeParani ^d, yabuya lenkulungwane ezilitshumi zabangcwele; ngakwesokunene sayo kwakulomlayo ovuthayo kibo ^e. 3 Yebo, yathanda abantu ^f. Bonke abangcwele bayo babesesandleni sakho; labo bahlala enyaweni zakho ^g, ngamunye emukele okwamazwi akho ^h. 4 UMozisi wasilaya umlayo ⁱ, ilifa lebandla likaJakobe ^j. 5 Yaba yinkosi ^k eJeshuruni ^l, lapho inhloko zabantu zibuthene, ndawonye lezizwe zakoIsrayeli. 6 URubeni kaphile, angafi ^m, lamadoda akhe abe linani ⁿ.

7 Lalokhu ngokukaJuda, wasesithi: Zwana, Nkosi, ilizwi likaJuda, umlethe kubantu bakhe, izandla zakhe kazimlwele, njalo kawube ngumsizi ezitheni zakhe ^o.

8 LakuLevi wathi: IThumimi yakho leUrimi yakho ^p ngokwendoda, eyingcwele yakho ^q, owayilinga eMasa, waphikisana layo emanzini eMeriba ^r; 9 eyathi kuyise lakunina: Kangimbonanga ^s; kabananzanga abafowabo, kabazanga abantwana bakhe. Ngoba balalela ilizwi lakho, bagcina isivumelwano sakho ^t. 10 Bazamfundisa uJakobe izahlulelo zakho, loIsrayeli umlayo wakho ^u; bazabeka impepha phambi kwamakhala akho ^v, lomnikelo wonke phezu kwelathi lakho ^w. 11 Busisa, Nkosi, amandla akhe, wemukele umsebenzi wezandla zakhe; tshaya inkalo zalabo abamvukelayo lezabamzondayo, ukuze bangasukumi ^x.

12 KuBhenjamini wathi: Othandwayo weNkosi uzahlala evikelekile ngakiyo; izamsibekela usuku lonke, uzahlala phakathi kwamahlombe ayo.

13 LakuJosefa wathi: Ilizwe lakhe kalibusiswe yiNkosi, ngokuhlekazi kwamazulu ^y, ngamazolo ^z, langokujula okulele ngaphansi, 14 langokuhlekazi kwezithelo zelanga, langokuhlekazi kwezinto ezivezwa zinyanga, 15 langekhethelo lentaba ezindala, langokuhlekazi kwamaqaqa aphakade ^aa, 16 langokuhlekazi komhlaba lokugcwala kwawo ^ab, lomusa walowo owahlala ^ac esihlahleni ^ad. Izinto lezi ^ae kazize ekhanda likaJosefa, lenkanda yalowo owehlukaniswa labafowabo ^af. 17 Ulobukhosi bezibulo benkunzi yakhe ^ag, lempondo zakhe zimpondo zenyathi ^ah; uzahlaba ngazo izizwe ndawonye zize zifike emikhawulweni yomhlaba ^ai. Lezi zinkulungwane ezilitshumi zakoEfrayimi, lalezi zinkulungwane zakoManase ^aj.

18 LakuZebuluni wathi: Thokoza, Zebuluni, ekuphumeni kwakho, lawe Isakari, emathenteni akho ^ak. 19 Bazabizela izizwe entabeni ^al, lapho bahlabe iminikelo yokulunga. Ngoba bazamunya inala yezinlwandle, lamagugu afihlwe etshebetshebeni ^am.

20 LakuGadi wathi: Kabusiswe owandisa uGadi. Uhlala njengesilwane, uklebhula ingalo, yebo inkanda ^an. 21 Wazinakekela ngekhethelo ^ao, ngoba lapho isabelo somnikumthetho salondolozwa ^ap; weza lenhloko zabantu, wenza ukulunga kweNkosi, lezahlulelo zayo loIsrayeli ^aq.

22 LakuDani wathi: UDani ngumdlwane wesilwane ^ar; uzakweqa evela eBashani ^as. 23 LakuNafithali wathi: Nafithali, eneliswa ngomusa, ugcwele isibusiso seNkosi ^at, dlana ilifa lentshonalanga leningizimu ^au.

24 LakuAsheri wathi: UAsheri kabusiswe ngabantwana, abe ngowemukelekayo kubafowabo ^av, agxamuze unyawo lwakhe emafutheni ^aw. 25 Insimbi lethusi kuzakuba yizicathulo zakho, lanjengensuku zakho azakuba njalo amandla akho.

26 Kakho onjengoNkulunkulu ^ax, Jeshuruni ^ay, ogade amazulu kusizo lwakho, lomkhathi ngobukhosi bakhe ^az. 27 UNkulunkulu waphakade uyisiphephelo ^ba, langaphansi kulengalo ezingelakuphela. Uxotsha isitha phambi kwakho, athi: Bhubhisa. 28 Ngakho uIsrayeli uzahlala evikelekile ^bb eyedwa ^bc; ilihlo likaJakobe ^bd lizakuba elizweni lamabele lewayini elitsha ^be; yebo, amazulu akhe azathontisa amazolo ^bf. 29 Ubusisiwe wena, Israyeli ^bg! Ngubani onjengawe, isizwe esisindiswe yiNkosi ^bh, isihlangu sosizo lwakho, loyinkemba yobukhosi bakho? Lezitha zakho zizakuthobela ngokuzenzisa ^bi, lawe unyathele endaweni zazo eziphakemeyo ^bj.