Deu 4 | Ndebele | STEP | Khathesi-ke, Israyeli, zwana izimiso lezahlulelo engilifundisa zona , ukuzenza, ukuze liphile, lingene lidle ilifa lelizwe iN kosi uNkulunkulu waboyihlo elinika lona.

1 Khathesi-ke, Israyeli, zwana izimiso lezahlulelo engilifundisa zona ^a, ukuzenza, ukuze liphile, lingene lidle ilifa lelizwe iNkosi uNkulunkulu waboyihlo elinika lona. 2 Kaliyikwengezelela elizwini engililaya lona, lingaphunguli lutho kulo, ukuze ligcine imilayo yeNkosi uNkulunkulu wenu engililaya yona ^b. 3 Amehlo enu abonile iNkosi eyakwenzayo ngenxa kaBhali-Peyori ^c; ngoba wonke umuntu owalandela uBhali-Peyori, iNkosi uNkulunkulu wenu yambhubhisa phakathi kwenu; 4 kodwa lina elanamathela eNkosini uNkulunkulu wenu liyaphila lonke lamuhla. 5 Bonani, ngilifundisile izimiso lezahlulelo, njengokungilaya kweNkosi uNkulunkulu wami, ukuthi lenze njalo phakathi kwelizwe eliya kulo ukudla ilifa lalo. 6 Ngakho zigcineni, lizenze; ngoba lokhu kuyinhlakanipho yenu lokuqedisisa kwenu emehlweni ezizwe ^d ezizakuzwa zonke lezizimiso zithi: Isibili lesisizwe esikhulu singabantu abahlakaniphileyo labaqedisisayo ^e. 7 Ngoba yisiphi isizwe esikhulu ^f esilabonkulunkulu abaseduze laso njengeNkosi uNkulunkulu ekumbizeni kwethu konke ^g? 8 Futhi yisiphi isizwe esikhulu esilezimiso lezahlulelo ezilungileyo njengalumlayo wonke engiwubeka phambi kwenu lamuhla?

Ukukhunjulwa kwalokho okwenzakalayo eHorebe

9 Kuphela ziqaphele, ugcine kakhulu umphefumulo wakho, hlezi ukhohlwe izinto amehlo akho azibonileyo, njalo hlezi zisuke enhliziyweni yakho, zonke izinsuku zempilo yakho ^h. Njalo uzazise abantwana bakho labantwana babantwana bakho ⁱ, 10 ukuthi ngosuku owema ngalo phambi kweNkosi uNkulunkulu wakho eHorebe ^j, lapho iNkosi yathi kimi: Ngibuthanisela abantu ngibe sengibazwisa amazwi ami, ukuze bafunde ukungesaba zonke izinsuku abazaziphila emhlabeni, bafundise njalo abantwana babo. 11 Laselisondela, lema ngaphansi kwentaba, lentaba yayivutha umlilo kwaze kwaba phakathi kwamazulu ^k, lomnyama, amayezi, lomnyama onzima. 12 INkosi yasikhuluma kini iphakathi komlilo ^l; lezwa ilizwi lamazwi, kodwa kalibonanga simo ^m; ilizwi kuphela ⁿ. 13 Yamemezela kini isivumelwano sayo, eyalilaya ukuthi lisenze ^o, imilayo elitshumi ^p; njalo yayibhala ezibhebheni zamatshe ezimbili ^q.

Abantwana bakoIsrayeli baxwayiswa ukuthi bangoni

14 INkosi yasingilaya ngalesosikhathi ukuthi ngilifundise izimiso lezahlulelo ^r, ukuze lizenze elizweni elidlulela kulo ukudla ilifa lalo. 15 Ngakho-ke qaphelani kakhulu ^s ngenxa yemiphefumulo yenu ^t. Ngoba kalibonanga lasimo ngosuku iNkosi ikhuluma kini eHorebe iphakathi komlilo ^u, 16 hlezi lizone, lizenzele isithombe esibaziweyo ^v, isimo saloba yiwuphi umfanekiso ^w, isifanekiso sowesilisa loba sowesifazana ^x, 17 isifanekiso saloba yiyiphi inyamazana esemhlabeni ^y, isifanekiso saloba yiyiphi inyoni elempiko ephapha emazulwini ^z, 18 isifanekiso saloba yikuphi okuhuquzelayo emhlabeni ^aa, isifanekiso saloba yiyiphi inhlanzi esemanzini ngaphansi komhlaba ^ab. 19 Futhi hlezi uphakamisele amehlo akho emazulwini, lapho ubona ilanga lenyanga lezinkanyezi ^ac, ibutho lonke lamazulu ^ad, uyengwe, ukukhothamele, ukukhonze ^ae, iNkosi uNkulunkulu wakho ekwabele izizwe zonke ngaphansi kwamazulu wonke. 20 Kodwa lina iNkosi yalithatha, yalikhupha esithandweni sensimbi, eGibhithe ^af, ukuze libe kuyo ngabantu belifa, njengalamuhla ^ag. 21 Futhi iNkosi yangithukuthelela ngenxa yenu, yafunga ukuthi kangiyikuchapha iJordani, lokuthi kangiyikungena kulelolizwe elihle iNkosi uNkulunkulu wakho ekunika lona libe yilifa ^ah. 22 Ngoba ngizafela kulelilizwe ^ai, ngingachaphi iJordani ^aj; kodwa lina lizachapha, lidle ilifa lalelolizwe elihle ^ak. 23 Ziqapheleni ^al hlezi likhohlwe isivumelwano seNkosi uNkulunkulu wenu eyasenza lani ^am, lizenzele isithombe esibaziweyo, umfanekiso waloba yikuphi iNkosi uNkulunkulu wakho ekwenqabele khona. 24 Ngoba iNkosi uNkulunkulu wakho ingumlilo oqothulayo ^an, uNkulunkulu olobukhwele ^ao.

25 Lapho uzala abantwana labantwana babantwana, njalo selihlale elizweni isikhathi eside, uba lisonakala, lenze isithombe esibaziweyo, umfanekiso waloba yikuphi ^ap, lenze okubi emehlweni eNkosi uNkulunkulu wakho ^aq ukuze liyithukuthelise ^ar, 26 ngibiza amazulu lomhlaba lamuhla ukuze kufakaze kumelene lani ukuthi lizabhubha lokubhubha masinyane lisuka elizweni elichapha iJordani ukuya kilo ukuze libe yilifa lenu; kaliyikwelula insuku zenu phezu kwalo, ngoba lizabhujiswa lokubhujiswa ^as. 27 Njalo iNkosi izalichithachitha phakathi kwezizwe ^at, lisale libalutshwana ngenani phakathi kwezizwe, lapho iNkosi ezalixotshela khona ^au. 28 Lapho lizakhonza onkulunkulu, umsebenzi wezandla zabantu, izigodo lamatshe ^av, abangaboniyo, abangezwayo, abangadliyo, labanganukiyo ^aw. 29 Kodwa lilapho liyidinge iNkosi uNkulunkulu wakho, uzayithola uba uyidinga ngenhliziyo yakho yonke langomphefumulo wakho wonke ^ax. 30 Lapho usekuhluphekeni, lezizinto zonke zikwehlela, ekupheleni kwezinsuku ^ay, uzaphendukela eNkosini uNkulunkulu wakho, ulalele ilizwi layo ^az; 31 ngoba iNkosi uNkulunkulu wakho inguNkulunkulu olomusa, kayiyikukutshiya, kayiyikukubhubhisa, kayiyikukhohlwa isivumelwano saboyihlo, eyasifunga kubo ^ba. 32 Ngoba buza-ke ngensuku zamandulo ezazingaphambi kwakho, kusukela osukwini uNkulunkulu adala ngalo umuntu emhlabeni ^bb, kusukela komunye umkhawulo wamazulu kuze kube komunye umkhawulo wamazulu, ukuthi kwake kwaba khona yini into enje njengale into enkulu, kumbe kwezwakala enjengayo yini ^bc? 33 Abantu bake bezwa yini ilizwi likaNkulunkulu likhuluma livela phakathi komlilo, njengalokhu ulizwile wena, waphila ^bd? 34 Futhi uNkulunkulu wake wazama yini ukuyazithathela isizwe phakathi kwesizwe, ngezilingo ^be, ngezibonakaliso ^bf, langezimangaliso ^bg, langempi, langesandla esilamandla ^bh, langengalo eyeluliweyo ^bi, langezesabiso ezinkulu ^bj, njengakho konke iNkosi uNkulunkulu wenu eyalenzela khona eGibhithe phambi kwamehlo akho? 35 Wena wakutshengiswa, ukuze wazi ukuthi uJehova unguNkulunkulu; kakho omunye ngaphandle kwakhe ^bk. 36 Esemazulwini wakuzwisa ilizwi lakhe ukukufundisa; lemhlabeni wakutshengisa umlilo wakhe omkhulu, lamazwi akhe wawezwa evela phakathi komlilo ^bl. 37 Njalo ngoba wabathanda oyihlo, wakhetha inzalo yabo emva kwabo, wakukhupha eGibhithe ebusweni bakhe ngamandla akhe amakhulu ^bm, 38 ukuxotsha elifeni izizwe ezinkulu lezilamandla kulawe phambi kwakho, ukukungenisa, ukukupha ilizwe lazo, libe yilifa, njengalamuhla ^bn. 39 Ngakho yazi lamuhla, ukukhumbule enhliziyweni yakho ukuthi iNkosi inguNkulunkulu emazulwini phezulu, lemhlabeni phansi ^bo; kakho omunye ^bp. 40 Ngakho uzagcina izimiso zakhe lemilayo yakhe engikulaya yona lamuhla ^bq, ukuze kukulungele labantwana bakho emva kwakho, lokuze welule izinsuku phezu kwelizwe iNkosi uNkulunkulu wakho ekunika lona, zonke izinsuku ^br.

Ukukhethwa kwemizi emithathu yokuphephela

41 Khona uMozisi wehlukanisa imizi emithathu nganeno kweJordani ngasempumalanga ^bs, 42 ukuthi abalekele kuyo umbulali obulele umakhelwane wakhe kungeyisikho ngabomo ^bt, obengamzondi mandulo, ukuze abalekele komunye waleyomizi aphile ^bu; 43 iBezeri enkangala ^bv elizweni lamagceke, elabakoRubeni ^bw; leRamothi eGileyadi, elabakoGadi; leGolani eBashani, elabakoManase.

44 Njalo yilo umlayo uMozisi awubeka phambi kwabantwana bakoIsrayeli. 45 Lobu yibufakazi lezimiso lezahlulelo uMozisi akukhuluma ebantwaneni bakoIsrayeli ekuphumeni kwabo eGibhithe, 46 nganeno kweJordani, esigodini maqondana leBeti-Peyori, elizweni likaSihoni inkosi yamaAmori ^bx, owayehlala eHeshiboni, uMozisi labantwana bakoIsrayeli abamtshayayo ekuphumeni kwabo eGibhithe ^by. 47 Basebesidla ilifa lelizwe lakhe lelizwe likaOgi inkosi yeBashani, amakhosi amabili amaAmori, ayenganeno kweJordani ngasempumalanga ^bz, 48 kusukela eAroweri esekhunjini lwesifula seArinoni ^ca, kuze kufike entabeni yeSiyoni ^cb, eyiHermoni ^cc, 49 lamagceke wonke nganeno kweJordani ngasempumalanga, kuze kube selwandle lwamagceke ^cd, ngaphansi kweAshidodi-Pisiga ^ce.