Deu 8 | Ndebele | STEP | Yonke imithetho engikulaya yona lamuhla lizananzelela ukuyenza, ukuze liphile, lande, lingene lidle ilifa lelizwe, iN kosi eyalifungela oyihlo .

Deuteronomy 8

Izenzo ezinhle zeNkosi eyazenza kuIsrayeli enkangala

1 Yonke imithetho engikulaya yona lamuhla lizananzelela ukuyenza, ukuze liphile, lande, lingene lidle ilifa lelizwe, iNkosi eyalifungela oyihlo ^a. 2 Njalo uzakhumbula indlela yonke iNkosi uNkulunkulu wakho ekukhokhele ngayo liminyaka engamatshumi amane enkangala, ukuze ikuthobise ^b, ikuhlole ^c, ukwazi okusenhliziyweni yakho, uba uzagcina imithetho yayo, loba hatshi ^d. 3 Yasikuthobisa, yakulambisa ^e, yakudlisa imana owawungayazi, laboyihlo babengayazi ^f, ukuze ikwazise ukuthi umuntu kaphili ngesinkwa sodwa, kodwa ngakho konke okuphuma emlonyeni weNkosi umuntu uyaphila ^g. 4 Izembatho zakho kaziguganga phezu kwakho, lonyawo lwakho kaluvuvukanga, le iminyaka engamatshumi amane ^h. 5 Ngakho yazi enhliziyweni yakho ukuthi njengendoda ilaya indodana yayo, iNkosi uNkulunkulu wakho iyakulaya ⁱ. 6 Ngakho uzagcina imithetho yeNkosi uNkulunkulu wakho, ukuhamba endleleni zayo, lokuyesaba ^j. 7 Ngoba iNkosi uNkulunkulu wakho ikungenisa elizweni elihle, ilizwe lezifula zamanzi, lemithombo lokujula okugobhoza ezihotsheni lezintabeni ^k; 8 ilizwe lengqoloyi, lebhali*, lezivini, lemikhiwa, lezithelo zepomegranati*, ilizwe lezihlahla zemihlwathi zamafutha, loluju ^l, 9 ilizwe ozakudla kulo isinkwa kungekho ukusilela, ongayikuswela lutho kulo; ilizwe elilamatshe ayinsimbi, lelilezintaba elingagebha kuzo ithusi ^m. 10 Usudlile wasutha, uzabusisa iNkosi uNkulunkulu wakho ngelizwe elihle ekunike lona. 11 Ziqaphele hlezi ukhohlwe iNkosi uNkulunkulu wakho ngokungagcini imilayo yayo lezahlulelo zayo lezimiso zayo, engikulaya zona lamuhla. 12 Hlezi lapho usudlile wasutha, usuwakhe izindlu ezinhle wahlala kuzo ⁿ, 13 sekwandile inkomo zakho lezimvu zakho, lesiliva legolide kwakho sekwandile, lakho konke olakho sekwandile, 14 inhliziyo yakho ibisiziphakamisa ^o, ubusukhohlwa iNkosi uNkulunkulu wakho eyakukhupha elizweni leGibhithe, endlini yobugqili ^p, 15 eyakukhokhela enkangala enkulu leyesabekayo ^q, okwakulenyoka ezilokutshisa ^r lezinkume ^s lomhlabathi owomileyo, lapho okwakungelamanzi khona ^t, eyakuvezela amanzi edwaleni lelitshe elilukhuni ^u, 16 eyakudlisa imana enkangala, oyihlo ababengayazi, ukuze ikuthobise, lokuze ikuhlole ^v, ikwenzele okuhle ekucineni kwakho ^w, 17 ubususithi enhliziyweni yakho: Amandla ami lokuqina kwesandla sami kungizuzele linotho. 18 Kodwa uzakhumbula iNkosi uNkulunkulu wakho, ngoba yiyo ekunika amandla okuzuza inotho ^x, ukuze iqinise isivumelwano sayo eyasifungela oyihlo njengalamuhla ^y. 19 Kuzakuthi-ke, nxa ukhohlwa lokukhohlwa iNkosi uNkulunkulu wakho, ulandele abanye onkulunkulu, ubakhonze, ubakhothamele ^z, ngiyalifakazela lamuhla ukuthi lizabhubha lokubhubha ^aa. 20 Njengezizwe iNkosi ezichithileyo phambi kwenu, ngokunjalo lizabhubha, ngoba lingalilalelanga ilizwi leNkosi uNkulunkulu wenu ^ab.