Exo 10 | Ndebele | STEP | IN kosi yasisithi kuMozisi: Yana kuFaro, ngoba mina ngenze inhliziyo yakhe yaba nzima lenhliziyo yenceku zakhe, ukuze ngenze lezizibonakaliso zami phambi kwakhe ,

1 INkosi yasisithi kuMozisi: Yana kuFaro, ngoba mina ngenze inhliziyo yakhe yaba nzima ^a lenhliziyo yenceku zakhe, ukuze ngenze lezizibonakaliso zami phambi kwakhe ^{▼▼ phambi kwakhe: Heb phakathi kwakhe.}, 2 lokuthi ulandise endlebeni zendodana yakho lendodana yendodana yakho ^c ukuthi ngenze kabuhlungu kumaGibhithe ^d lezibonakaliso zami engizenze phakathi kwawo, ukuze lazi ukuthi ngiyiNkosi. 3 UMozisi loAroni basebesiya kuFaro, bathi kuye: Itsho njalo iNkosi, uNkulunkulu wamaHebheru, ithi: Koze kube nini usala ukuzithoba phambi kwami? Yekela isizwe sami sihambe, bangikhonze. 4 Ngoba uba usala ukuyekela isizwe sami sihambe, khangela, kusasa ngizaletha isikhonyane emngceleni wakho ^e, 5 njalo sizasibekela ubuso bomhlaba ukuze ungawuboni umhlaba, sizakudla insalela yokwaphephayo, okwalisalelayo esiqhothweni, sidle sonke isihlahla esikhulela wena ensimini ^f. 6 Sizagcwalisa izindlu zakho lezindlu zezinceku zakho zonke lezindlu zawo wonke amaGibhithe ^g, oyihlo abangazanga basibone laboyise baboyihlo, kusukela ngosuku ababakhona emhlabeni kuze kube lamuhla. Wasetshibilika, waphuma kuFaro. 7 Lenceku zikaFaro zathi kuye: Koze kube nini lo esiba ngumjibila kithi ^h? Yekela amadoda ahambe, akhonze iNkosi uNkulunkulu wawo; kawukazi yini ukuthi iGibhithe isichithekile? 8 UMozisi loAroni babuyiselwa kuFaro; wasesithi kubo: Hambani likhonze iNkosi uNkulunkulu wenu. Ngobani kanye labo abazahamba? 9 UMozisi wasesithi: Sizahamba labatsha bethu labadala bethu, lamadodana ethu lamadodakazi ethu, lezimvu zethu lenkomo zethu sizahamba, ngoba silomkhosi weNkosi. 10 Wasesithi kubo: INkosi ibe lani ngokunjalo ⁱ, njengoba ngizaliyekela lihambe labantwanyana benu! Bonani ngoba kulokubi phambi kwenu. 11 Kungabi njalo! Hambani khathesi, madoda, liyikhonze iNkosi, ngoba yikho elikudingayo. Basebebaxotsha ebusweni bukaFaro.

12 INkosi yasisithi kuMozisi: Yelula isandla sakho phezu kwelizwe leGibhithe ^j, ngenxa yesikhonyane, ukuze senyukele phezu kwelizwe leGibhithe, sidle wonke umbhida welizwe lakho konke isiqhotho esikutshiyileyo ^k. 13 UMozisi waseyelula intonga yakhe phezu kwelizwe leGibhithe; iNkosi yasiqhuba umoya wempumalanga elizweni, lonke lolosuku lobusuku bonke; kwasekusithi ekuseni, umoya wempumalanga wenyusa isikhonyane. 14 Isikhonyane sasesisenyukela phezu kwelizwe lonke leGibhithe ^l, sehlela emngceleni wonke weGibhithe, esinzima kakhulu. Phambi kwaso akuzange kube khona isikhonyane esinjalo njengaso, futhi kakuyikuba khona esinjalo emva kwaso ^m. 15 Ngoba sasibekela ubuso belizwe lonke, kwaze kwafiphazwa ilizwe; sadla wonke umbhida welizwe laso sonke isithelo sezihlahla isiqhotho esasitshiyayo ⁿ; kakusalanga lutho oluluhlaza esihlahleni, lombhida weganga, elizweni lonke leGibhithe.

16 UFaro wasephangisa ukubabiza oMozisi loAroni, wathi: Ngonile eNkosini uNkulunkulu wenu lakini ^o. 17 Khathesi-ke ake lithethelele isono sami okwalesisikhathi kuphela, liyincenge iNkosi ^p uNkulunkulu wenu ukuthi isuse kimi lokhu ukufa kuphela. 18 Wasephuma kuFaro, wayincenga iNkosi ^q. 19 INkosi yasiphendula umoya wentshonalanga olamandla kakhulu owenyusa isikhonyane, wasiphosela oLwandle oluBomvu ^r; kakusalanga sikhonyane lesisodwa kuwo wonke umngcele weGibhithe. 20 Kodwa iNkosi yayenza lukhuni inhliziyo kaFaro ^s, kazabayekela abantwana bakoIsrayeli bahambe.

Inhlupheko yesificamunwemunye: Umnyama ophumputhekayo

21 INkosi yasisithi kuMozisi: Yelulela isandla sakho emazulwini ^t, ukuze kube khona umnyama phezu kwelizwe leGibhithe, ngitsho umnyama ophumputhekayo. 22 UMozisi waseselulela isandla sakhe emazulwini; kwasekusiba khona umnyama wobumnyama ^u elizweni lonke leGibhithe insuku ezintathu. 23 Kababonananga, futhi kakusukumanga muntu endaweni yakhe okwensuku ezintathu; kodwa kubo bonke abantwana bakoIsrayeli kwakukhona ukukhanya emizini yabo ^v.

24 UFaro wasembiza uMozisi wathi: Hambani likhonze iNkosi ^w, kuphela izimvu zenu lenkomo zenu kuzagcinwa, labantwanyana benu bazahamba lani ^x. 25 Kodwa uMozisi wathi: Lawe ubonika imihlatshelo leminikelo yokutshiswa ezandleni zethu, esizayenzela iNkosi uNkulunkulu wethu. 26 Njalo lezifuyo zethu zizahamba kanye lathi, kakuyikusala emuva isondo; ngoba sizathatha kuzo ukukhonza iNkosi uNkulunkulu wethu, ngoba kasikwazi esizakhonza ngakho iNkosi size sifike khona.

27 Kodwa iNkosi yenza lukhuni inhliziyo kaFaro ^y, njalo kafunanga ukubayekela bahambe. 28 UFaro wasesithi kuye: Suka kimi, uziqaphele, ungaboni ubuso bami futhi; ngoba mhla ubona ubuso bami uzakufa. 29 UMozisi wasesithi: Ukhulume ngokuqonda, kangisayikubona futhi ubuso bakho ^z.