Exodus 32

Ithole legolide

1Abantu sebebonile ukuthi uMozisi uphuzile ukwehla entabeni ^a, abantu babuthana kuAroni bathi kuye: Sukuma, usenzele onkulunkulu ^b abazahamba phambi kwethu ^c; ngoba uMozisi lo, indoda eyasikhuphula elizweni leGibhithe, kasazi ukuthi yehlelwe yini. 2UAroni wasesithi kubo: Qamulani amacici egolide ^d asendlebeni zabomkenu, zamadodana enu, lezamadodakazi enu, liwalethe kimi. 3Bonke abantu basebeqamula amacici egolide ayesendlebeni zabo, bawaletha kuAroni. 4Wawemukela ezandleni zabo ^e, walibumba ngesikhali sokukhanda, wawenza aba lithole elibunjwe ngokuncibilikisa. Basebesithi: Laba ngonkulunkulu bakho, Israyeli, abakukhuphule elizweni leGibhithe ^f. 5UAroni eselibonile wakha ilathi phambi kwalo; uAroni wamemezela wathi: Kusasa kuzakuba khona umkhosi weNkosi ^g. 6Basebevuka ekuseni kakhulu, banikela iminikelo yokutshiswa, basondeza iminikelo yokuthula; abantu bahlala phansi ukudla lokunatha ^h, basebesukuma ukudlala ⁱ.

7INkosi yasisithi kuMozisi: Hamba wehle, ngoba abantu bakho owabakhuphula elizweni leGibhithe ^j bonakalisile ^k; 8baphambukile masinyane endleleni engabalaya ngayo ^l; bazenzele ithole elibunjwe ngokuncibilikisa, balikhonza, balihlabela, bathi: Laba ngonkulunkulu bakho, Israyeli, abakukhuphule elizweni leGibhithe ^m. 9INkosi yasisithi kuMozisi: Ngibabonile lababantu, khangela-ke, bangabantu abantamo zilukhuni ⁿ. 10Khathesi-ke ngiyekela ^o ukuze ulaka lwami lubavuthele, ngibaqede ^p; kodwa wena ngizakwenza ube yisizwe esikhulu ^q. 11Kodwa uMozisi wancenga ubuso beNkosi uNkulunkulu wakhe ^r wathi: Kungani, Nkosi, ulaka lwakho lubavuthela abantu bakho owabakhupha elizweni leGibhithe ngamandla amakhulu langesandla esiqinileyo? 12Kungani amaGibhithe ezakhuluma athi: Wabakhuphela ububi ukubabulala ezintabeni, lokubaqeda ebusweni bomhlaba? ^s Phenduka ekuvutheni kolaka lwakho, uzisole ngobubi obumelene labantu bakho ^t. 13Khumbula uAbrahama, uIsaka loIsrayeli, inceku zakho, owazifunga wena kizo wathi kuzo ^u: Ngizakwandisa inzalo yenu njengezinkanyezi zamazulu ^v, lalelilizwe lonke engikhulume ngalo, ngizalipha inzalo yenu, njalo bazalidla ilifa lalo kuze kube nininini. 14INkosi yasizisola ebubini eyayisithi izabenza ebantwini bayo ^w.

15UMozisi wasetshibilika wehla entabeni ^x, lezibhebhe ezimbili zobufakazi esandleni sakhe; izibhebhe zazibhalwe inhlangothi zazo zombili; zibhalwe ngapha langapha. 16Lezibhebhe zazingumsebenzi kaNkulunkulu, lombhalo wawungumbhalo kaNkulunkulu, ubazwe ezibhebheni ^y. 17Kwathi uJoshuwa ^z esezwile umsindo wabantu beklabalala, wathi kuMozisi: Kulomsindo wempi enkambeni. 18Kodwa wathi: Kakusumsindo wokuklabalala kokunqoba, njalo kakusumsindo wokuklabalala kokunqotshwa; ngizwa umsindo wokuhlabelela ^aa.

19Kwasekusithi esesondele enkambeni walibona ithole lokugida ^ab; ulaka lukaMozisi lwaseluvutha, wasezilahla izibhebhe ezandleni zakhe, waziphahlazela phansi kwentaba. 20Wathatha ithole ababelenzile, walitshisa emlilweni, walichola laze lacoleka, walivuvuzela emanzini, wabanathisa wona abantwana bakoIsrayeli. 21UMozisi wasesithi kuAroni: Abantu laba benzeni kuwe ukuze ubehlisele isono esikhulu kangaka ^ac? 22UAroni wasesithi: Kalungavuthi ulaka lwenkosi yami; wena uyabazi abantu ukuthi batshekele ebubini. ^ad 23Ngoba bathi kimi: Senzele onkulunkulu abazahamba phambi kwethu; ngoba uMozisi lo, indoda eyasikhuphula elizweni leGibhithe, kasazi ukuthi yehlelwe yini ^ae. 24Ngasengisithi kubo: Loba ngubani olegolide, kabaliqamule ^af. Basebenginika lona. Ngasengiliphosela emlilweni, kwasekuphuma lelithole.

25Kwathi uMozisi esebonile abantu ukuthi babengabambeki (ngoba uAroni wabayekela bangabambeki ukuze bayangeke kwababengabavukela ^ag), 26uMozisi wasesima esangweni lenkamba, wathi: Loba ngubani ongoweNkosi, keze kimi! Kwasekubuthana kuye wonke amadodana kaLevi. 27Wasesithi kuwo: Itsho njalo iNkosi uNkulunkulu kaIsrayeli ithi: Ngulowo lalowo kahlome inkemba yakhe ethangazini lakhe, adabule aphenduke esuka esangweni esiya esangweni enkambeni, langulowo lalowo abulale umfowabo, langulowo lalowo umngane wakhe, langulowo lalowo umakhelwane wakhe ^ah. 28Amadodana kaLevi asesenza njengelizwi likaMozisi; njalo kwawa ebantwini ngalolosuku abantu abangabazinkulungwane ezintathu. 29UMozisi wasesithi: Lizehlukanisele iNkosi lamuhla, ngoba ngulowo lalowo ubemelene lendodana yakhe amelane lomfowabo, ukuze aphe isibusiso phezu kwenu lamuhla ^ai.

30Kwasekusithi kusisa uMozisi wathi ebantwini: Lina lenze isono esikhulu ^aj; khathesi sengizakwenyukela eNkosini; mhlawumbe ^ak ngingenza inhlawulo yokuthula ngesono senu ^al. 31UMozisi wasebuyela eNkosini ^am wathi: Maye! Lababantu bonile isono esikhulu, bazenzele onkulunkulu begolide ^an. 32Khathesi-ke, uba uthethelela isono sabo - kodwa uba kungenjalo ^ao, ake ungesule ^ap egwalweni lwakho olubhalileyo ^aq. 33INkosi yasisithi kuMozisi: Owonileyo kimi ngizamesula egwalweni lwami ^ar. 34Kodwa hamba-ke, ukhokhele abantu baye lapho engikhulume lawe ngakho; khangela, ingilosi yami izahamba phambi kwakho ^as. Kanti mhla ngiphindisela ngizaphindisela isono sabo phezu kwabo. 35INkosi yasibatshaya abantu ngoba babenze ithole, uAroni ayelenzile.