Exodus 34

Ezinye izibhebhe zamatshe ezimbili

1INkosi yasisithi kuMozisi: Zibazele izibhebhe ezimbili zamatshe njengezakuqala ^a; ngibe sengibhala phezu kwezibhebhe amazwi ayesezibhebheni zakuqala ^b owaziphahlazayo ^c. 2Ubusulungile ekuseni, wenyukele entabeni yeSinayi ekuseni, ume phambi kwami lapho engqongeni yentaba ^d. 3Njalo kungenyukeli muntu kanye lawe ^e, futhi kungabonakali lamuntu entabeni yonke; njalo izimvu lezinkomo zingadli phambi kwaleyontaba.

4Wasebaza izibhebhe ezimbili zamatshe njengezakuqala; uMozisi wasevuka ekuseni kakhulu, wenyukela entabeni yeSinayi, njengoba iNkosi imlayile, wathatha esandleni sakhe izibhebhe ezimbili zamatshe. 5INkosi yasisehla eyezini, yema laye lapho, yamemeza ibizo leNkosi ^f. 6INkosi yasisedlula phambi kwakhe, yamemeza yathi: INkosi, INkosi, uNkulunkulu, elesihawu ^g elomusa, ephuza ukuthukuthela ^h, levame ububele lobuqotho ⁱ, 7egcinela abayizinkulungwane umusa ^j, ethethelela ububi lesiphambeko lesono, engayikuyekela lokuyekela olecala ^k, ephindisela ububi baboyise phezu kwabantwana laphezu kwabantwana babantwana kuze kube sesizukulwaneni sesithathu lesesine. 8UMozisi wasephangisa, wakhothamela emhlabathini, wakhonza ^l. 9Wathi: Uba-ke ngithole umusa emehlweni akho, Nkosi, akuthi iNkosi ihambe phakathi kwethu, ^m ngoba yisizwe esintamo lukhuni, ⁿ uthethelele ububi bethu lesono sethu, usithathe sibe yilifa lakho ^o.

10Yasisithi: Khangela, ngenza isivumelwano; phambi kwabantu bonke ^p ngizakwenza izimangaliso ezingazange zidalwe emhlabeni wonke laphakathi kwezizwe zonke ^q; labo bonke abantu ophakathi kwabo bazabona umsebenzi weNkosi, ngoba kuyesabeka engizakwenza lawe ^r. 11Zigcinele lokho engikulaya khona lamuhla ^s; khangela ngizaxotsha phambi kwakho amaAmori lamaKhanani lamaHethi lamaPerizi lamaHivi lamaJebusi ^t. 12Ziqaphelisele ukuthi ungenzi isivumelwano labakhileyo elizweni oya kulo ^u, hlezi kube ngumjibila phakathi kwakho. ^v 13Kodwa amalathi abo lizawadiliza, lensika zabo eziyizithombe lizaziphahlaza ^w, lezixuku zabo lizazigamula ^x; 14ngoba kawuyikukhonza omunye unkulunkulu ^y; ngoba iNkosi, ebizo layo linguBukhwele ^z, inguNkulunkulu olobukhwele. ^aa 15Hlezi wenze isivumelwano labakhileyo elizweni ^ab, nxa bephinga ngokulandela onkulunkulu babo ^ac, behlabele onkulunkulu babo, lomunye akunxuse ^ad, njalo udle okomhlatshelo wakhe ^ae; 16uwathathele amadodana akho kumadodakazi abo ^af; nxa amadodakazi abo ephinga ngokulandela onkulunkulu bawo ^ag, enze lamadodana akho ukuthi aphinge ngokulandela onkulunkulu bawo.

17Ungazenzeli onkulunkulu ababunjwe ngokuncibilikisa ^ah.

18Umkhosi wesinkwa esingelamvubelo ^ai uwugcine; insuku eziyisikhombisa udle isinkwa esingelamvubelo njengokukulaya kwami, ngesikhathi esimisiweyo senyanga kaAbhibhi ^aj, ngoba ngenyanga kaAbhibhi waphuma eGibhithe.

19Konke okuvula isizalo kungokwami ^ak, lalo lonke izibulo eliduna elezifuyo, inkomo kumbe imvu. 20Kodwa izibulo likababhemi ^al ulihlenge ngezinyane; uba-ke ungalihlengi ulephule intamo. Lonke izibulo lamadodana akho uzalihlenga; njalo kungabonakali muntu phambi kwami engaphethe lutho ^am.

21Uzasebenza insuku eziyisithupha ^an, kodwa ngosuku lwesikhombisa uphumule, ngesikhathi sokulima lekuvuneni uzaphumula.

22Uzagcina umkhosi wamaviki ^ao, izithelo zokuqala zesivuno sengqoloyi, lomkhosi wokubuthelela ekuthwaseni komnyaka.

23Kathathu ngomnyaka ^ap wonke owesilisa uzabonakala phambi kweNkosi uJehova, uNkulunkulu kaIsrayeli. 24Ngoba ngizaxotsha izizwe phambi kwakho ^aq, ngiqhelise imingcele yakho ^ar; njalo kakuyikuba lamuntu ofisa ilizwe lakho ^as nxa usenyuka ukuyabonakala phambi kweNkosi uNkulunkulu wakho, kathathu ngomnyaka.

25Unganikeli igazi lomhlatshelo wami kanye lokulemvubelo ^at; futhi kakungasali kuze kuse umhlatshelo womkhosi wephasika ^au.

26Ikhethelo lezithelo zokuqala zensimu yakho ^av ulilethe endlini yeNkosi uNkulunkulu wakho. Ungapheki izinyane echagweni lukanina ^aw.

27INkosi yasisithi kuMozisi: Zibhalele la amazwi, ngoba ngokutsho kwalamazwi ngenzile isivumelwano lawe loIsrayeli ^ax. 28Njalo wayelapho leNkosi insuku ezingamatshumi amane lobusuku obungamatshumi amane ^ay; kadlanga sinkwa kanathanga manzi. Yasibhala ezibhebheni amazwi esivumelwano, imilayo elitshumi ^az.

UMozisi wehla entabeni

29Kwasekusithi uMozisi esehla entabeni yeSinayi, lezibhebhe zombili zobufakazi ^ba zazisesandleni sikaMozisi esehla entabeni, uMozisi wayengazi ukuthi isikhumba sobuso bakhe sasikhazimula ^bb ekhuluma laye. 30Kwathi uAroni labo bonke abantwana bakoIsrayeli bebona uMozisi, khangela-ke, isikhumba sobuso bakhe sakhazimula, basebesesaba ukusondela kuye. 31UMozisi wasebabiza; loAroni lazo zonke induna zenhlangano babuyela kuye; uMozisi wasekhuluma labo. 32Njalo emva kwalokho basondela bonke abantwana bakoIsrayeli; wasebalaya ^bc konke iNkosi eyayikukhulume laye entabeni yeSinayi. 33Kwathi uMozisi eseqedile ukukhuluma labo, wafaka isimbombozo ebusweni bakhe ^bd. 34Kodwa lapho uMozisi engena phambi kweNkosi ukukhuluma layo, wasisusa isimbombozo ^be aze aphume; esephumile wakhuluma kubantwana bakoIsrayeli lokho akulayiweyo, 35labantwana bakoIsrayeli babona ubuso bukaMozisi, ukuthi isikhumba sobuso bukaMozisi sakhazimula. UMozisi wabuyisela isimbombozo ebusweni bakhe, aze angene ukuyakhuluma laye.