Gen 2 | Ndebele | STEP | Kwasekuqediswa amazulu lomhlaba lalo lonke ibutho lakho .

Genesis 2

1 Kwasekuqediswa amazulu lomhlaba lalo lonke ibutho lakho ^a. 2 UNkulunkulu wasewuqeda ngosuku lwesikhombisa umsebenzi wakhe abewenza. Waphumula ngosuku lwesikhombisa ^b emsebenzini wakhe wonke abewenza. 3 UNkulunkulu wasebusisa usuku lwesikhombisa, walungcwelisa; ngoba ngalo waphumula emsebenzini wakhe wonke, uNkulunkulu awudalayo wawenza ^{▼▼ wawenza: Heb ukuwenza.}.

Isivande seEdeni

4 Lezi yizizukulwana zamazulu lezomhlaba ekudalweni kwakho ^d, mhla iNkosi uNkulunkulu isenza umhlaba lamazulu, 5 laso sonke isihlahlakazana sensimu, singakabi khona emhlabeni, layo yonke imibhida yeganga ^e, ingakamili; ngoba iNkosi uNkulunkulu yayinganisanga izulu emhlabeni, njalo kwakungelamuntu wokulima umhlabathi. 6 Kodwa kwenyuka inkungu ivela emhlabathini, yasithelela ubuso bonke bomhlabathi. 7 INkosi uNkulunkulu yasibumba umuntu ngothuli oluvela emhlabathini ^f, yaphefumulela emakhaleni akhe umoya wempilo; umuntu wasesiba ngumphefumulo ophilayo ^g.

8 INkosi uNkulunkulu yasihlanyela isivande eEdeni ^h ngasempumalanga, yasimbeka khona umuntu eyambumbayo. 9 INkosi uNkulunkulu yasimilisa emhlabeni sonke isihlahla esibukekayo lesilungele ukudla; lesihlahla sempilo ⁱ phakathi kwesivande, lesihlahla solwazi lokuhle lokubi. 10 Kwasekuphuma eEdeni umfula wokuthelela isivande; njalo kusukela lapho wehlukaniswa waba zinhloko ezine. 11 Ibizo lowokuqala yiPishoni; yiwo ozingelezele ilizwe lonke leHavila ^j, lapho okulegolide khona. 12 Legolide lalelolizwe lihle; lapho kulebedola* lelitshe i-onikse* ^k. 13 Lebizo lomfula wesibili yiGihoni; yiwo ozingelezele ilizwe lonke eleEthiyophiya. 14 Lebizo lomfula wesithathu yiHidekeli; yiwo ogelezela empumalanga kweAsiriya. Lomfula wesine yiYufrathi. 15 INkosi uNkulunkulu yasimthatha umuntu ^{▼▼ umuntu: kumbe, uAdamu.}, yambeka esivandeni seEdeni, ukuze asilime asilondoloze. 16 INkosi uNkulunkulu yasimlaya umuntu isithi: Kuso sonke isihlahla sesivande ungadla lokudla; 17 kodwa okwesihlahla solwazi lokuhle lokubi, ungadli kuso, ngoba mhla usidla kuso uzakufa lokufa.

18 INkosi uNkulunkulu yasisithi: Kakukuhle ukuthi umuntu abe yedwa. Ngizamenzela umsizi ^m onjengaye ^{▼▼ onjengaye: Heb njengophambi kwakhe.}. 19 INkosi uNkulunkulu yasibumba ngomhlabathi yonke inyamazana yeganga layo yonke inyoni yamazulu ^o; yakuletha kuAdamu ^{p
,} ^{▼▼ kuAdamu: kumbe, emuntwini.}, ukuthi ibone ukuthi angazibiza ngokuthini, njalo loba yikuphi uAdamu azabiza ngakho isidalwa esiphilayo, yilo ibizo laso. 20 UAdamu wasesitha amabizo kuzo zonke izifuyo, lenyonini yamazulu, lakuyo yonke inyamazana yeganga; kodwa uAdamu katholelwanga umsizi onjengaye. 21 INkosi uNkulunkulu yasisehlisela phezu kukaAdamu ubuthongo obukhulu ^r, waselala. Yasithatha olunye lwezimbambo zakhe, yavala ngenyama endaweni yalo. 22 INkosi uNkulunkulu yasisenza ubambo eyayiluthethe emuntwini lwaba ^{▼▼ lwaba: Heb yalwakha lwaba.} ngowesifazana, yasimusa emuntwini. 23 UAdamu wasesithi: Lo khathesi ulithambo lamathambo ami, lenyama yenyama yami ^t; uzabizwa ngokuthi ngowesifazana ^{▼▼ owesifazana: Heb Isha.}, ngoba yena ethethwe endodeni ^{v
,} ^{▼▼ indoda: Heb Ish.}. 24 Ngenxa yalokhu indoda izatshiya uyise lonina, inamathele kumkayo; njalo bazakuba nyamanye ^x. 25 Bobabili babenqunu-ke, umuntu lomkakhe, futhi bengelanhloni.