Leviticus 19

Imithetho yobungcwele

1INkosi yasikhuluma kuMozisi isithi: 2Tshono kunhlangano yonke yabantwana bakoIsrayeli uthi kubo: Banini ngcwele, ngoba mina iNkosi uNkulunkulu wenu ngingcwele ^a.

3Yesabani, ngulowo lalowo, unina loyise ^b. Gcinani-ke amasabatha ami. NgiyiNkosi uNkulunkulu wenu ^c.

4Lingaphendukeli ezithombeni ^d, lingazenzeli onkulunkulu ababunjwe ngokuncibilikisa ^e. NgiyiNkosi uNkulunkulu wenu.

5Njalo nxa linikela umhlatshelo weminikelo yokuthula eNkosini ^f, liwunikele ukuze lemukeleke ^g. 6Uzadliwa ngosuku lokunikela kwenu langakusasa; kodwa okuseleyo ngosuku lwesithathu kuzatshiswa ngomlilo. 7Uba kudliwa lokudliwa ngosuku lwesithathu, kuzakuba yisinengiso; kakuyikwemukeleka ^h. 8Ngakho okudlayo uzathwala ububi bakhe, ngoba ungcolise okungcwele kweNkosi ⁱ; lalowomphefumulo uzaqunywa usuke ebantwini bawo ^j.

9Lalapho livuna isivuno selizwe lakini, ungavuni ngokupheleleyo umngcele wensimu yakho; futhi ungabuthi okuseleyo kwesivuno sakho ^k. 10Ungakhothozi isivini sakho; futhi ungabuthi okuwileyo kwesivini sakho; uzakutshiyela abayanga labemzini. NgiyiNkosi uNkulunkulu wenu.

11Lingebi ^l, lingaphathi ngenkohliso, lingaqambi manga omunye kumakhelwane wakhe ^m.

12Lingafungi ngamanga ngebizo lami ⁿ, loba ungcolise ibizo likaNkulunkulu wakho. NgiyiNkosi ^o.

13Ungacindezeli umakhelwane wakho ^p, ungamphangi. Iholo loqhatshiweyo lingahlali kuwe ubusuku kuze kube sekuseni ^q.

14Ungaqalekisi isacuthe ^r, ungafaki isikhubekiso phambi kwesiphofu ^s, kodwa wesabe uNkulunkulu wakho. NgiyiNkosi ^t.

15Ungenzi ukungalungi ekwahluleleni; ungemukeli ubuso bomyanga, ungahloniphi ubuso bomkhulu, yahlulela umakhelwane wakho ngokulunga ^u.

16Ungahambahambi njengomnyundi phakathi kwabantu bakini ^v; ungamelani legazi lomakhelwane wakho. NgiyiNkosi ^w.

17Ungazondi umfowenu enhliziyweni yakho ^x; umkhuze lokumkhuza umakhelwane wakho, ungathwali isono ngenxa yakhe ^y.

18Ungaphindiseli, ungabi lasikhwili labantwana babantu bakini ^z; kodwa thanda umakhelwane wakho njengalokhu uzithanda wena. NgiyiNkosi ^aa.

19Gcinani izimiso zami. Ungavumeli izifuyo zakho zikhwelwe yimihlobo emibili. Ungahlanyeli insimu yakho ngenhlobo ezimbili ^ab. Lesigqoko esemihlobo emibili exubeneyo singezi phezu kwakho ^ac.

20Lendoda, nxa ilala ngokwenyama lomfazi, eyisigqilikazi esikhombileyo, esingahlengwanga lokuhlengwa, kumbe singanikwanga inkululeko, kuzakuba lesijeziso. Kabayikubulawa, ngoba sasingakhululwanga. 21Njalo izaletha umnikelo wayo wecala eNkosini, emnyango wethente lenhlangano, inqama ibe ngumnikelo wecala ^ad. 22Njalo umpristi uzayenzela inhlawulo yokuthula ngenqama yomnikelo wecala phambi kweNkosi ngesono sayo esonileyo, izathethelelwa-ke esonweni sayo esonileyo.

23Lalapho selifikile elizweni, lihlanyele yonke imihlobo yezihlahla zokudla, lizathatha isithelo sazo njengento engasokwanga; iminyaka emithathu sizakuba singasokwanga kini, singadliwa ^ae. 24Kodwa ngomnyaka wesine sonke isithelo sazo sizakuba ngcwele, sibe yindumiso eNkosini. 25Langomnyaka wesihlanu lingadla isithelo sazo, ukuze zilengezelelele isivuno sazo. NgiyiNkosi uNkulunkulu wenu.

26Lingadli lutho olulegazi ^af. Lingenzi imilingo ^ag, lingachasisi ngemibono ^ah. 27Lingageli amagumbi ekhanda lenu, ungoni amagumbi endevu zakho ^ai. 28Lingazicabi enyameni yenu ngenxa yofileyo, lingafaki phezu kwenu uphawu lokuzisika. NgiyiNkosi ^aj.

29Ungangcolisi indodakazi yakho ngokuyenza ibe liwule, hlezi ilizwe liphinge, lelizwe ligcwale inkohlakalo ^ak.

30Gcinani amasabatha ami ^al, lihloniphe indlu yami engcwele. NgiyiNkosi ^am.

31Lingaphendukeli kulabo abalamadlozi lakwabalumbayo; lingabadingi ukuze lingcoliswe yibo. NgiyiNkosi uNkulunkulu wenu ^an.

32Sukumela impunga ^ao, uhloniphe ubuso bomdala ^ap, wesabe uNkulunkulu wakho. NgiyiNkosi ^aq.

33Futhi nxa owezizweni ehlala njengowezizwe lawe elizweni lakini, lingamcindezeli ^ar. 34Owezizweni ohlala njengowezizwe lani uzakuba kini njengozalwa elizweni phakathi kwenu ^as, umthande njengalokhu uzithanda wena; ngoba lalingabezizweni elizweni leGibhithe. NgiyiNkosi uNkulunkulu wenu ^at.

35Lingenzi ukungalungi ekwahluleleni ^au, ebudeni ^av, esisindweni ^aw, lesilinganisweni ^ax. 36Banini lezikali zokulinganisa ezilungileyo ^ay, izilinganiso ezilungileyo, i-efa* elilungileyo ^az, lehini* elilungileyo ^ba. NgiyiNkosi uNkulunkulu wenu owalikhupha elizweni leGibhithe. 37Ngakho gcinani zonke izimiso zami lezahlulelo zami zonke, lizenze. NgiyiNkosi ^bb.