Num 16 | Ndebele | STEP | UKora indodana kaIzihari indodana kaKohathi indodana kaLevi , loDathani loAbiramu amadodana kaEliyabi, loOni indodana kaPelethi, amadodana kaRubeni, basebethatha amadoda .

1 UKora indodana kaIzihari indodana kaKohathi indodana kaLevi ^a, loDathani loAbiramu amadodana kaEliyabi, loOni indodana kaPelethi, amadodana kaRubeni, basebethatha amadoda ^b. 2 Basebesukuma phambi kukaMozisi, lamadoda abantwana bakoIsrayeli, abangamakhulu amabili lamatshumi amahlanu, abangabakhokheli benhlangano, abakhethiweyo bomhlangano, amadoda alebizo ^c. 3 Bahlangana bamelana loMozisi bamelana loAroni ^d, bathi kubo: Seledlulise amalawulo! Ngoba inhlangano yonke, bonke bangcwele ^e, leNkosi iphakathi kwabo. Pho, liziphakamiselani phezu kwebandla leNkosi? ^f 4 Kwathi uMozisi esekuzwile, wathi mbo ngobuso bakhe phansi ^g. 5 Wasekhuluma kuKora lakuqembu lakhe lonke esithi: Kusisa, khona iNkosi izatshengisa ukuthi ngubani ongowayo lokuthi ngubani ongcwele, izamsondeza kuyo ^h, lalowo emkhethileyo ⁱ izamsondeza kuyo ^j. 6 Yenzani lokhu: Zithatheleni imiganu yokutshisela impepha, uKora, leqembu lakhe lonke ^k, 7 lifake kiyo umlilo, libeke kiyo impepha phambi kweNkosi kusasa. Kuzakuthi indoda iNkosi eyikhethayo, yiyo engcwele. Seledlulise amalawulo, madodana kaLevi! 8 UMozisi wasesithi kuKora: Ake lizwe, madodana kaLevi; 9 kuyinto encinyane kini yini ^l ukuthi uNkulunkulu kaIsrayeli ulehlukanisile lenhlangano yakoIsrayeli ukuze alisondeze kuye ukuthi lenze inkonzo yethabhanekele leNkosi, lokuthi lime phambi kwenhlangano ukubakhonza? ^m 10 Ukusondezile, labafowenu bonke, amadodana kaLevi, kanye lawe; selifuna lobupristi yini? 11 Ngalokho wena leqembu lakho lonke selihlangene ukumelana leNkosi. Ngoba uAroni uyini ukuthi limngungunele? ⁿ

12 UMozisi wasethuma ukubiza uDathani loAbiramu, amadodana kaEliyabi. Kodwa bathi: Kasiyikwenyuka; 13 kuyinto encinyane yini ukuthi wasenyusa ^o sivela elizweni eligeleza uchago loluju ukusibulala enkangala ^p, kanti lawe usuzenza umbusi phezu kwethu? ^q 14 Futhi kawusingenisanga elizweni eligeleza uchago loluju ^r, loba ukusinika ilifa lamasimu lezivini. Amehlo ala amadoda ungawakopola yini? Asiyikwenyuka. 15 UMozisi wasethukuthela kakhulu, wathi eNkosini: Unganaki umnikelo wabo ^s. Kangithathanga ubabhemi oyedwa wabo, futhi kangenzanga okubi komunye wabo ^t. 16 UMozisi wasesithi kuKora: Wena leqembu lakho lonke banini phambi kweNkosi, wena, labo, loAroni, kusasa ^u; 17 thathani, omunye lomunye umganu wakhe wokutshisela impepha, lifake kuyo impepha, liyisondeze phambi kweNkosi, kube ngulowo lalowo umganu wakhe wokutshisela impepha, imiganu yokutshisela impepha engamakhulu amabili lamatshumi amahlanu; lawe loAroni, ngulowo lalowo umganu wakhe wokutshisela impepha ^v. 18 Basebethatha, ngulowo lalowo umganu wakhe wokutshisela impepha, bafaka umlilo kuyo, babeka impepha kuyo, bema emnyango wethente lenhlangano, loMozisi loAroni. 19 UKora wasebuthanisa inhlangano yonke ukumelana labo emnyango wethente lenhlangano. Inkazimulo yeNkosi yasibonakala ebandleni lonke ^w.

20 INkosi yasikhuluma kuMozisi lakuAroni isithi: 21 Zehlukaniseni liphume phakathi kwalinhlangano ^x ukuze ngibaqede ngokucwayiza kwelihlo ^y. 22 Basebesithi mbo ngobuso babo phansi bathi ^z: Nkulunkulu, Nkulunkulu wemimoya yayo yonke inyama, kona umuntu oyedwa, ubusuthukuthelela inhlangano yonke yini? ^aa 23 INkosi yasikhuluma kuMozisi isithi: 24 Tshono enhlanganweni uthi: Yenyukani lisuke kunhlangothi zonke zomuzi kaKora, uDathani, loAbiramu. 25 UMozisi wasesukuma, waya kuDathani loAbiramu, labadala bakoIsrayeli bamlandela. 26 Wasekhuluma enhlanganweni esithi: Ake lisuke emathenteni alamadoda amabi, lingathinti lutho olungolwabo ^ab, hlezi liphetshulwe ezonweni zabo zonke ^ac. 27 Basebesenyuka besuka emzini yaboKora, uDathani loAbiramu enhlangothini zonke; oDathani loAbiramu basebephuma, bema emnyango wamathente abo labomkabo lamadodana abo labantwanyana babo ^ad. 28 UMozisi wasesithi: Ngalokhu lizakwazi ukuthi iNkosi ingithumile ukwenza yonke limisebenzi ^ae, lokuthi kakusikho okwengqondo yami ^af. 29 Uba laba besifa njengokufa kwabantu bonke, kumbe behlelwe njengokwehlelwa kwabantu bonke, iNkosi kayingithumanga ^ag. 30 Kodwa uba iNkosi idala into entsha, ukuthi umhlaba uvule umlomo wawo, ubaginye lakho konke okwabo ^ah, behlele emgodini bephila ^ai, lizaqedisisa ukuthi lamadoda ayidelele iNkosi ^aj.

31 Kwasekusithi eseqedile ukukhuluma wonke la amazwi, umhlaba owawungaphansi kwabo waqhekezeka ^ak, 32 lomhlaba wavula umlomo wawo, wabaginya lezindlu zabo, labo bonke abantu ababengabakaKora, lempahla yabo yonke ^al. 33 Basebetshona emgodini bephila bona lakho konke okwabo; umhlaba wabagqibela, babhubha besuka phakathi kwebandla. 34 UIsrayeli wonke owayebazingelezele wasebaleka ekukhaleni kwabo, ngoba bathi: Hlezi umhlaba usiginye. 35 Kwasekuphuma umlilo eNkosini, waqothula amadoda angamakhulu amabili lamatshumi amahlanu ayenikele impepha ^am.

36 INkosi yasikhuluma kuMozisi isithi: 37 Tshono kuEleyazare, indodana kaAroni umpristi, ukuthi athathe imiganu yokutshisela impepha phakathi kokutsha; uwuchithachithele umlilo laphayana, ngoba ingcwele ^an. 38 Imiganu yokutshisela impepha yalezizoni imelene lemiphefumulo yazo ^ao, kabayenze ibe yizicecedu ezibanzi zibe yisisibekelo selathi ^ap; ngoba bayinikele phambi kweNkosi, ngakho ingcwele; njalo izakuba yisibonakaliso ebantwaneni bakoIsrayeli ^aq. 39 UEleyazare umpristi wasethatha imiganu yethusi yokutshisela impepha ababenikele ngayo abatshisiweyo, basebeyikhanda yaba yizicecedu zokusibekela ilathi ^ar, 40 kube yisikhumbuzo ebantwaneni bakoIsrayeli ukuze kungabi lowemzini, ongesuye owenzalo kaAroni, osondela ukutshisa impepha phambi kweNkosi ^as, ukuze angabi njengoKora lanjengexuku lakhe, njengoba iNkosi yakhuluma kuye ngesandla sikaMozisi.

41 Kodwa kusisa inhlangano yonke yabantwana bakoIsrayeli yabasola oMozisi loAroni, isithi: Lina libabulele abantu beNkosi. 42 Kwasekusithi inhlangano isihlangene imelene loMozisi njalo imelene loAroni, baphendukela ethenteni lenhlangano, khangela-ke iyezi lalilisibekele ^at lenkazimulo yeNkosi yabonakala ^au. 43 UMozisi loAroni basebesiza ngaphambi kwethente lenhlangano. 44 INkosi yasikhuluma kuMozisi isithi: 45 Yenyukani lisuke phakathi kwalinhlangano ^av, ukuze ngibaqede ^aw njengokucwayiza kwelihlo ^ax. Basebesithi mbo ngobuso babo phansi. 46 UMozisi wasesithi kuAroni: Thatha umganu wokutshisela impepha, ufake kuwo umlilo ovela elathini, ubeke kuwo impepha, uye ngokuphangisa enhlanganweni, ubenzele inhlawulo yokuthula; ngoba ulaka seluphumile lusuka phambi kweNkosi, inhlupheko isiqalisile ^ay. 47 UAroni wasekuthatha njengokutsho kukaMozisi, wagijimela phakathi kwebandla, khangela-ke, inhlupheko yayisiqalisile phakathi kwabantu. Wafaka impepha, wabenzela abantu inhlawulo yokuthula. 48 Wasesima phakathi kwabafileyo labaphilayo. Inhlupheko yasimiswa ^az. 49 Labafayo enhluphekweni babeyizinkulungwane ezilitshumi lane lamakhulu ayisikhombisa, ngaphandle kwalabo abafa ngendaba kaKora ^ba. 50 UAroni wasebuyela kuMozisi emnyango wethente lenhlangano; lenhlupheko yayisimisiwe.