Mark 11

Iesu i Kau na Ierusalem arae King

(Mt 21:1�11; Lk 19:28�40; Jn 12:12�19)

1Ri ka la fatat isi Ierusalem, ma aunbiing ri ka tapiek na Betfage ke Beteni na Pungpung na Olif, Iesu ka wuun ufu iwu e kalalik na fafausum kia. 2Ke ka fas ruh aragii, “Kamu la una maleh ae na famu lo kamuh. Aunbiing kamun tapiek, kamun par nenge natun dongki ae biil biitom tikas i kiis lo, ri kabet ta u aiwa. Kamu puk ufu ke kamuk date u uga. 3Male tikas in diik kamuh le, ‘Isi sanih kamu ka tel u arae?’ kamun kiliis u aragii, ‘Kumguui i ier isi, ma biil in sawin, ke ik filange fafis u sabin.’”

4Aunbiing ru ka la, ru ka par tafe dongki ae ri kabet ta u na nenge matanfel, na bulin sal, ke ru ka puk pes u. 5Fal e fanu ae ri sotih la aiwa, ri ka diik ruh aragii, “Kamu puk ufu dongki ae isi sanih?” 6Ru ka kiliis ri ini orek ae Iesu i fas ta ruh ini, ke ri ka somangat ufu usuf ruh. 7Ru ka tangne dongki ae usuf Iesu, ke ru ka tel ufu iun boboh kiruh, ke ru ka sol ini na olon dongki ae, ma Iesu ka kiis lo. 8Ke fanu fuun sabin ri ka tel ufu foron boboh kiri, ma ri ka sol ini tole sal. Fale fanu sabin ri pakat foron akan au tina potormok, ma ri ka sol ini tole sal. 9Ma fanu ae ri famu, ke fanu ae ri mih, ri ka tautau aragii,

“Osana!

Fafakalok sing God, usuf seh ae i la uga ini asa Kumguui!

10Fafakalok sing God una matanfuntih ke tama kerer Dewit ae in tapiek!

Osana ubae na mawe!”
11Aunbiing Iesu ka tapiek bae na Ierusalem, ka kau na Felun Sising. Ka par tikii ta foron tier, ke ka fis sabin una Beteni turan sangful ini u e kalalik na fafausum kia, wara le ka efef mang.

Iesu i Bo Au na Fik

(Mt 21:18�19)

12Na biing namih, aunbiing ri fis tina Beteni, Iesu ka fitol. 13Ka par nenge au na fik tina tapak, i batong rokap. Ke ka la isi par u, isi ti fal e fua. Aunbiing i tapiek aiwa na pikli, ka par u le biil ti fua, awu kanan sau, wara le biil biitom e taul fua ken fik. 14Ke ka fas au na fik ae aragii, “Tipesu igii ma namih, biil sabin tikas in ien ti fuam.” Ke berberat na fafausum kia ri ongen u i use u arae.

Iesu i Fes fasuuh Fanu tina Felun Sising

(Mt 21:12�17; Lk 19:45�48; Jn 2:13�22)

15Aunbiing ri ka tapiek na Ierusalem, Iesu ka kau na palgan ubiif kale Felun Sising, ma ka fes fasuuh fanu aiwa ae ri famam fifiil, turan fanu sabin ae ri kep foron tier isi fanu rik fiil u. Ka fabereng foron luuf ini fanu ae ri famam sokiliis pitkalang
11.15Fan Iudaia ri tikale fanu isi gong ri fafen na Felun Sising, ini pitkalang ken fan Rom ke tina fal e maleh sabin, wara le i mel e tantanwa foron king kiri ae lo. Pesu, ri sokiliis u na Felun Sising una pitkalang kiri tom.
, ke foron luuf ken fanu ae ri kep foron bun una fifiil.
16Ma biil i somangat pes fanu isi rin soleng palgan ubiif kale Felun Sising, ini foron tier una fifiil. 17Aunbiing i fausum ri, ka tarah, “Ri siit ta u na Buk na Gogoh aragii, ‘Rin foteng fel kiak le felun sising ken fanu tikii na piklinbat.’ Isau le gam ka tel u bin arae ‘salan mumun ken foron tom sisii.’”

18Foron laulaumet na pris ke foron tom fafausum ini nagogon sabin ri ka ongen u, ma ri ka tipes im sal una siimete Iesu. Ri sokeh u, wara le fanu tikii ri bitit na foron fafausum kia.

19Na efef, Iesu turan berberat na fafausum kia ri ka aptih koseng Ierusalem.

Au na Fik ka Mang

(Mt 21:20�22)

20Na biingbiing, ri ka fis sabin una Ierusalem, ke ri ka par u le au na fik ae ka mang tah tinbae na mawe ubuif sikit na foron bauli. 21Ke Pita ka wol pes orek ke Iesu ke ka fas u aragii, “Rabi! Par au na fik ae o bo ta u, ka mang tah!”

22Iesu ka kiliis u aragii, “Gamen unune lo God. 23Tekentu kanaka ia fas gam, male tikas in fas pungpung igii le, ‘Aptih, ma ok luut na palgantes,’ ke in tapiek tom arae. Isau le gong iu e wolwol kia, in unune tom le in tapiek. 24Pesu, ia ka fas gam, sanih ae gam sising tah isi, gamen unune le gam ka kep ta u, ke God ik ta u usuf gam. 25Aunbiing gam sotih ma gam ka sising, ke gam ka wol pes ti sinang laulau ae tikas i tel ta u ulo gam, gamen wol ufu, isi Tata buuii na kukulii ik pa ufu foron sinang laulau sabin kimi.”
11.25-26Fale tom tasum na Buk na Gogoh ri wol le fal e orek biitom na rina igii, i arae: Isau, male biil gam wol ufu sinang laulau kia, Tata sabin buuii na kukulii biil in pa ufu foron sinang laulau kimi.


Ri Galte Iesu isi Rakrakai ae i Tel Foim ini

(Mt 21:23�27; Lk 20:1�8)

27Ri ka tapiek sabin bae na Ierusalem, ma aunbiing Iesu ka la na palgan ubiif kale Felun Sising, foron laulaumet na pris, foron tom fafausum ini nagogon turan foron famfamu ri ka la usuf i. 28Ma ri ka diik u aragii, “Rakrakai tingah o tel foron tier igii ini? Seh i ta rakrakai sing o, isi o ka tel foron tier igii ini?”

29Iesu ka kiliis ri aragii, “Ia sabin ian diik gam ini nenge fagalte. Male gamen kiliis iau, ke ian fas gam ini rakrakai sah ae ia tel foron tier igii ini. 30Gam fas iau, tingah e bapitaiso ke Jon? Tinbae na kukulii, le sing fanu sau?”

31Ke ri ka ngurke u tom na fatpoto ri aragii, “Male keren tara le, ‘tinbae na kukulii,’ ke in diik kerer le, ‘Isi sanih biil gam unune lo?’ 32Isau, male keren tara le, ‘sing fanu,’ ke fanu rin ngaliaf ulo kerer.” Wara le fanu tikii ri unune le Jon i nenge poropet. 33Ke, ri ka kiliis Iesu sau le, “Biil keme usum lo.”

Ke Iesu ka fas ri aragii, “Iau sabin biil ian fas gam ini rakrakai tingah ia tel foron tier igii ini.”

Copyright information for TGG