Tob 1

Tobit na Sara i gat bikpela hevi na tupela i prea long God

(Sapta 1.1—3.15)

1 Mi Tobit, mi laik stori nau long laip bilong mi. Tobiel em i papa bilong mi, na papa bilong Tobiel em Ananiel. Na Aduel em i papa bilong Ananiel. Papa bilong Aduel em Gabael, na papa bilong Gabael em Rafael. Na Rafael em i pikinini bilong Raguel. Raguel em i bilong lain bilong Asiel, em wanpela bilong ol liklik lain bilong lain Naptali. 2 Taim ^a Salmaneser i stap king bilong Asiria, ol i kalabusim mi long Tisbe, em ples bilong papa bilong mi. Dispela ples i stap long hap not bilong distrik Galili. Em i stap long hap saut bilong taun Kedes, em wanpela ples bilong lain Naptali, na em i stap klostu long tupela taun Hasor na Fogor.

Tobit i stap yangpela yet na em i go kalabus long Ninive

3 Mi ^b Tobit mi bin traim oltaim long mekim ol samting i gut na i stret. Planti taim mi bin givim mani long ol manmeri bilong lain bilong mi, em ol manmeri i sot long ol samting. Mi givim tu long ol wantok, em ol i bin kam wantaim mi olsem ol kalabusman na ol i stap long Ninive, em biktaun bilong kantri Asiria.

4 God i bin makim Jerusalem namel long ol planti taun bilong Israel, bai ol manmeri i mas kirapim haus lotu bilong em long dispela taun. Olsem bai dispela haus i ken i stap olsem haus bilong God yet inap oltaim. God i bin makim dispela haus, bai olgeta lain Israel i mas i go long en na mekim ofa. Tasol taim mi stap yangpela yet long kantri bilong ol tumbuna bilong mi stret, ol lain bilong Naptali olgeta i bin givim baksait long Jerusalem na long ol king bilong lain bilong Devit. 5 Olsem ^c na olgeta arapela lain bilong Israel na ol famili bilong ol tu, ol i save go lotuim wanpela piksa bilong bulmakau, nem bilong en Bal.

Tobit i bihainim pasin bilong lotu long God

6 Lo ^d bilong Moses i tok olsem, ‘Inap oltaim olgeta Israel i mas go long Jerusalem long olgeta bikpela de bilong lotu.” Mi wanpela tasol bilong famili bilong mi, mi bin bihainim dispela lo. Planti taim mi wokabaut i go long Jerusalem na mi givim ol samting long God. Mi givim ol kaikai i mau paslain long gaden bilong mi, na olgeta samting mi kisim mi save tilim long 10-pela hap na givim wanpela hap long God. 7 Taim ^e mi kamap long Jerusalem, mi givim ol dispela ofa long ol pikinini bilong Aron, em ol pris i save sanap klostu long alta. Oltaim mi save kisim wanpela hap bilong wit na wain na wel bilong oliv na bilong ol kain kain prut, na givim long ol Livai, em ol man i holim wok bilong God long Jerusalem. Na narapela bilong ol 10-pela hap bilong olgeta samting, mi save salim long maket na mi kisim dispela mani i go long Jerusalem na mi wokim wanpela kaikai amamas.

8 Narapela bilong ol 10-pela hap gen mi save givim long ol manmeri i sot long ol samting, olsem Debora, mama bilong papa bilong mi, i bin lainim mi.

Tobit i stap stretpela tu long taim ol i stap kalabus

9 Taim mi kamap bikpela, mi maritim Ana, em wanpela meri bilong lain bilong mi. Mitupela i gat wanpela pikinini, nem bilong em Tobaias. 10 Sampela taim bihain, ol i kalabusim mi wantaim ol wanblut na wantok na ol i kisim mipela i go long Ninive. Taim mipela i stap long Ninive, ol arapela i save kaikai olgeta kain samting bilong ol haiden. Tasol mi, nogat. Long wanem, 12 mi tingting strong long God Antap Tru, na mi tingim ol lo em i bin mekim. 13 Olsem na God i mekim king Salmaneser i belgut long mi, na king i putim mi i stap bosman bilong baim ol kaikai samting bilong famili bilong em.

14 Mi save go planti taim long hap bilong Midia na baim ol kain kain samting bilong king. Wanpela taim mi stap long biktaun Rages, long hap bilong Midia. Mi givim sampela bek mani i gat 300 kilogram silva long Gabael, em brata bilong Gabrias, bai em i ken was gut long ol dispela mani. 15 Taim Salmaneser i dai, pikinini bilong em Senakerip i kamap king. Long dispela taim i gat planti man nogut i stap nabaut long olgeta rot bilong Midia, olsem na mi no inap i go moa long dispela hap.

Tobit i planim ol man i dai pinis

16 Taim Salmaneser i stap king, mi save lukautim ol wantok bilong mi sapos ol i painim trabel. 17 Sapos ^f ol i hangre, mi givim kaikai long ol. Sapos ol i no gat klos, mi givim klos bilong mi yet long ol. Sapos wanpela wantok i dai, na ol i tromoim bodi bilong em i go ausait long banis bilong Ninive, orait mi save go na planim em.

18 Long taim Senakerip i lusim pait long Judia na em i ranawe i go bek long Midia, long rot em i kilim i dai planti manmeri bilong Israel. Tasol mi kisim ol bodi bilong ol na mi haitim na mi planim. Bihain Senakerip i laik painim ol dispela bodi, tasol ol i no stap.

19 Nau wanpela man bilong Ninive i ripot long king long mi bin planim ol dispela man. I no longtaim na mi painimaut olsem, king i wok long painim mi bai em i ken kilim mi i dai. Olsem na mi pret nogut tru na mi ranawe na mi hait. 20 King i rausim olgeta samting bilong mi na em i kisim i go long haus bilong em. Meri bilong mi, Ana, wantaim pikinini bilong mi, Tobaias, tupela tasol i stap.

Pikinini bilong brata bilong Tobit i helpim em

21 Samting olsem 7-pela wik i go pinis, na tupela pikinini man bilong King Senakerip i kilim papa i dai. Nau tupela i ranawe i go long maunten Ararat. Narapela pikinini man, nem bilong em Esarhadon, em i kamap king. Na em i makim Ahikar, em pikinini bilong brata bilong mi Anael, bilong lukautim olgeta mani na wok gavman bilong kantri bilong em. 22 Bipo tu Ahikar i bin lukautim olgeta kaikai na dring na ol mani samting. Na em i bin holim ring, em i mak bilong king. Nau Esarhadon i larim em i stap yet long dispela wok. Orait dispela Ahikar, em pikinini bilong brata bilong mi, em i toktok wantaim king, na king i orait long mi ken i kam bek long Ninive.