Luk 24 | TPZ | STEP | Ka manih po poen vamomoaan in o nënkikiu, pa pöstakah rakah no köövo to nö po vapeepe to teß non pa top vös. Ee to teß nö ne a ma vanom ovoavuh vih varih nee to vamatop voh.

Luke 24

E Ieesuß To Sun Hah En

Matiu 28:1-10, me Mak 16:1-8, me Jon 20:1-10

1 Ka manih po poen vamomoaan in o nënkikiu, pa pöstakah rakah no köövo to nö po vapeepe to teß non pa top vös. Ee to teß nö ne a ma vanom ovoavuh vih varih nee to vamatop voh. 2 Pare taum ee pa vös nee to vahuk këh ee po hopaß in o vapeepe. 3 Pare ho ee, ivëhkëk, ee to hikta ep in a sionin e Sunön Ieesuß. 4 Ee to sun ko kokoman vörep e ne pa tah pamëh, to nun rakah ee, pare ep in a poa teß to sun vatët ne, a ma ohop pee pon to kötköt rakah e ne maß. 5 A kën köövo to naöp vörep ko ves e ne po oeh. Ivëhkëk, a poa teß poë varih to soe ke raoe pan, “Suk ataeah, köm vavaiu vah e nem pa teß to teß toßtoß e non manih pa ö teßteß pa nap mët? 6 Eß to hikta teß non manih, eß to sun hah en. Eöm se koman hah na a soe vaßih neß to heß voh a neöm pa ö neß to teß voh non maß Galiliß. 7 Eß to soe voh ka neöm pan, ‘Ee se heß e Koaß Teß Pa Napan Kurus manih pa koreera nap hat kee ni poë pa kuruse, ko vakön poen neß se toß ko sun hah en.’”

8 Ko köövo nat hah poß ee pa soe vëh ne Ieesuß to soe voh ke raoe. 9 A ma köövo poë varih to hah taneß maß po vapeepe, ivarih, e Mariaß va Makdalaß, ke Joanan, ke Mariaß sinan e Jëmis. A ma meh köövo to teß vaßpeh me voh ne raoe to vahutët ke ra havun me a paeh me a ma meh aposol a ma tah kurus varih to tanok. 11 Ivëhkëk, o aposol pe Ieesuß to koman ne pan, o köövo to vavaakö e ne, ivëh, kee hikta vaman ne a soe pee. 12 Ivëhkëk, e Pitaß to vavaveo rakah en manuh po vapeepe, pareß kop ko ves hop na ko ep in a ma rara varoe to pet ne. E Pitaß to hah en iuun, ko pah kokoman vörep e non pa tah vëh to tanok.

A Poa Teß To Ep In E Ieesuß Pa Hanan Va Ëmeus

Mak 16:12-13

13 Ka manih po poen avoeß pamëh a poa teß va pee to nönö ne pa siß vöön nee to pokaß ne Ëmeus. A hanan pamëh to taneß non Jerusalëm, ko vos non Ëmeus to varo va non manih pa havun me a paeh kiromitaß. 14 Ee pon to nönö nö ne, pare vavahutët suk nö ne a ma tah kurus varih to tanok. 15 Ee pon to vaiihi nö ne, ke Ieesuß nö maß, ko nönö nö me e non pee pon. 16 Ee to nönö nö e ne, ivëhkëk, ee to hikta nat ne eß eteh, suk e Sosoenën to vapopoen e non pa matëëre, kee hikta inan ne poë. 17 Ke Ieesuß hi raoe pon, “Eöm vavahutët nö nem ataeah no man?” Eß to soe vamanih kee sun ee, no kokoman pee to punis, kee ep vatamak e ne. 18 A paeh va pee pon a ëhnaneah e Kliopas to piun a soe peß, ko hi poan pan, “Eën varoe rakah kuru a pah teß va Jerusalëm to hikta nat nom pa ma tah varih to tavus pa ma poen varih to oah, ha?”

19 E Kliopas to soe va nën ke Ieesuß hi raoe pan, “A ma taneah poë varih?” Kee to piun poë, pare soe pan, “A ma tah varih to tavus manih pe Ieesuß va Nasarët. Eß a teß vanënën soe pamëh ne Sosoenën to vaonöt voh poan pan eß se öt a kiu va pa teß vanënën soe, me a ma tah kurus neß to nonok non. Ivëh, ka napan to nat ne poë ko ep ne peß to teß me non o kikis va pa nok a ma tah kurus. 20 Ko teß susunön ësës heß, me ro teß susunön pea o Jiuß to vateß poë pa koren a kaman, pan eß se mët. Ka kaman vaonöt in a ö nee se ni poë pa kuruse. 21 Moaan voh emöm to vaman nem pan, eß kuru a teß vëh ne Sosoenën to vateß voh maß se hehe a napan va Israël. Kuru eß o vakön poen pa ö no a tah pamëh to tavus. 22 A meh tah me, vu pa pöstakah no köövo va po vakum pemöm to vatoksean a möm pa ö ne to nö pa ep pa top vös. 23 Pare hikta ep in a sionin e Ieesuß, pare hah maß ko soe vamanih pan, ‘Eöm to ep maß o ankeroß pe Sosoenën, kee soe ka möm pan, e Ieesuß to teß toßtoß e non.’ 24 Ka ma upöm teß va po vakum pemöm nö ee manuh pa top vös, pare ep va ee maß manih pa ö no köövo to soe ava. Ivëhkëk, ee to hikta ep in a sionin e Ieesuß.”

25 Ke Ieesuß soe ke raoe pan, “Eöm pom to hikta maaka voh nem pa soe no teß vanënën soe to soe voh. A komëneöm to ponkiß avoeß e non. 26 Eß teß vah va non nih? Eöm pom to hikta nat pöß nem pa ö ne Kristo se teß o kamis po vamomoaan, ka amot e Sosoenën se kunkuin taneß hah poan pa nap mët, ko kë a ëhnaneah manuh pa vöön va kin.” 27 Ke Ieesuß vamaaka ken pee pa ma soe to teß suk koman hah e non peß, taneo no maß po Vavaasis pe Mosës, me o Vavaasis po Teß Vanënën Soe.

28 Kee öök vatët ee maß pa vöön vaßih nee to nönö ne pon, ke Ieesuß nok va manih pan, eß to iu oah e non. 29 Ivëhkëk, ee pon to soepip ee pe Ieesuß, ko soe pan, “Eën se teß vaßpeh me a no nös möm. A potan to kunah en, ka siß ö hat keß poen en.” Ivëh, ke Ieesuß vos en vöön, ko teß vaßpeh me e non pee iuun. 30 Kee ihoß ee to ëën, ke Ieesuß kon a taëën, pareß soe vavihvih ke na e Sosoenën ko kökök ko heß raoe se ëën. 31 Eß to nok va nën ka poa matëëre maaka rakah, kee inan poß poë eß e Ieesuß, keß pah ro këh en pee. 32 Kee vavaasoe koman e ne pan, “Ea to vavarion nö vu no maß hanan, keß heß en pea pa ma soe, pareß vatvus rakah ken pea pa pusun in a soe va po Puk Vapenpen. Ivëh, ka ma kupu pea pah vaeö suntan rakah ee.”

33 Varuß vakomanih ee pon to sun ko nö hah ee manuh Jerusalëm. Pare taum ee po havun me a paeh vamomhë, me a ma vakamöß pee, kee teß tönun e ne. 34 Kee soe ke raoe pan, “Pöh man rakah, e Sunön Ieesuß to sun hah en, eß to tavus en pe Saëmon.” 35 Ivëh, kee vamaaka ke pa ma meh pee pa ma tah kurus to tavus maß manuh hanan. Ee to soe pan, “E Ieesuß to kökök a taëën kemöm inan eah.”

E Ieesuß To Tavus O Vamomhë Peß

Matiu 28:16-20, me Mak 16:14-18, me Jon 20:19-23

36 O vamomhë to vaiihi suk avoeß e ne pa ma tah poë varih ke Ieesuß koman to nö maß, pareß sun topnin e non pee. Pareß soe ke raoe pan, “A komëneöm se teß moomo non.”

37 Ivëhkëk, eße to töhkak ko naöp rakah ee, ko koman ne pan, eß a apen a teß to mët voh, ivëh nee to ep in. 38 Ke Ieesuß soe ke raoe pan, “Suk ataeah, köm töhkak ka komëneöm ponkiß? 39 Ep koman öm pa koreneoß me a moneoß vaßih. Vaket öm manih peöß paröm nat. A apen a teß to mët voh to hikta teß me non to sionin me to soaß vamanih pa ö nöm to ep va ka nem neoß.”

40 Eß to soe vamanih pareß vataare en pa koren me a moneah manih pee. 41 Ee to pah vaeö suntan rakah ee pa ö nee to ep in e Ieesuß, ivëhkëk, eße to hikta vaman avoeß ne. Ee to pah kokoman vörep e ne, ke Ieesuß hi raoe pan, “Eöm to teß me pöß e nem ta ma taëën to pet non, ha?” 42 Kee heß ee peß pa ö iian makah. 43 Ke Ieesuß öt a ö iian makah ko ëën en, ee he ep ne.

44 Keß soe ke raoe pan, “Moaan voh eöß to teß vaßpeh me voh a noß neöm ko soe voh keoß peöm. A ma tah kurus nee to kiun suk voh a neoß manih po Vavaasis pe Mosës me manih po puk Vavaasis po Teß Vanënën Soe me manih pa ma Vaëhëh, a ma tah kurus poë varih se tavus vaman rakah ee.”

45 Keß vöhioß ko vamaaka ken pee pa pusun in a soe pe Sosoenën to kiun non manih po Puk Vapenpen. 46 Pareß soe ke raoe pan, “O Puk Vapenpen to soe va non manih pan, E Kristo se teß o kamis ko vakön poen neß se toß taneß hah pa nap mët. 47 Ka manih po ëhnan pamëh o vavaasis va pa taateß panih no a napan varih po oeh kurus se vatet, ke Sosoenën se ihan anoe a ma hat pee. Eöm se taneo o vavaasis pamëh manih Jerusalëm. 48 Paröm vatvus rakah a ma tah vamanih pa ö nöm to ep vavoh. 49 Eöß koman se vanö maß manih peöm a Tuvuh Vasioß, moaan voh ne Tamön to soe vaman voh. Ivëhkëk, eöm se teß anoeh rakah nem pa vöön vëh keß onöt a ö no o kikis va manuh pa vöön va kin se nö maß manih peöm.”

E Sosoenën To Me Hah E Ieesuß Manuh Pa Vöön va Kin

Mak 16:19-20, me Aposol 1:9-12

50 Ke Ieesuß me en pa ma vamomhë peß manuh sinten Bëtaniß, pareß kë a koreneah ko tapui raoe. 51 E Ieesuß to tatapui non raoe, e Sosoenën he me peah en peß manuh pa vöön va kin. 52 Kee vaeö rakah ko kë ee pa ëhnaneah ko vos hah ee manuh Jerusalëm. 53 Pa ma poen kurus rakah nee to teß vaßpeh ne pa Iuun Hinhin Apuh pa kë tamoaan a ëhnan e Sosoenën.