Mar 11 | TPZ | STEP | E Ieesuß me ra ma vamomhë peß to vatët ee pa tavus manuh Jerusalëm, pa vöön va Bëtfes me Bëtaniß, pare vatët ee sinten a Tope Öliv. Ke Ieesuß vanö vovoh en pa poa vamomhë peß. Kee vos e Bëtfes.

aSng 118:26

bAis 56:7

cJer 7:11

Mark 11

E Ieesuß To Vos Manuh Jerusalëm Vamanih Pa Teß Sunön

Matiu 21:1-11, me Luk 19:28-40, me Jon 12:12-19

1 E Ieesuß me ra ma vamomhë peß to vatët ee pa tavus manuh Jerusalëm, pa vöön va Bëtfes me Bëtaniß, pare vatët ee sinten a Tope Öliv. Ke Ieesuß vanö vovoh en pa poa vamomhë peß. Kee vos e Bëtfes. 2 E Ieesuß to vanö me raoe a soe to teß va non manih pan, “Eöm se nö manuh pa vöön to teß vatët non manih. Eöm se tavus pa vöön pamëh, paröm ep ohoß em pa tönkiß sekaß to nohtöön non, no ahikta pah teß to tok avoeß non manih peß. Paröm ihan eah, ko me maß eah manih peöß. 3 Ka ta pah teß se keh hi a neöm pan, ‘Eöm nok suk vamanih ataeah?’ Köm soe keah pan, ‘E Topoan to iu non poan. Eß se vanö ohoß hah en maß peß.’” 4 Ka poa vamomhë peß nö ee, pare taum e pa tönkiß sekaß to nohtöön non manih po hopaß in a iuun, pare ihan ee peß. 5 Ka ma teß varih to sun vatët ne pa sinten a iuun pamëh hi raoe pan, “Öm ihihan suk nem a tönkiß sekaß vëh ataeah?” 6 Kee piun va ee manih pa ö ne Ieesuß to soe va vu ke raoe pon, ka ma teß varih to vaneah ne pa tönkiß vaonöt ke pee pon pa me a tönkiß. 7 Ka poa vamomhë pe Ieesuß me e maß pa tönkiß sekaß manih pe Ieesuß, pare pan e pa tonun a tönkiß pa rara, ke Ieesuß peah en pa tönkiß, kee nö me ee peß. 8 Ka napan o pöh peo rakah to ihan a ma ohop rërë pee, pare panpan ee manih hanan. Ko upöm moes maß a ma pea naon, pare vahoß ee manih hanan. 9 Ka napan varih to vovoh nö ke ne e Ieesuß, me ro teß varih to suksuk nö ne maß poë, ee to tataoa nö ne maß, pare sosoe ne pan,

“Vaeö ke na e Sosoenën!
E Sosoenën se tapui a oah
suk eën to nö maß pa ëhnan e Sunön! ^a
10 E Sosoenën se tapui a matop vëh to nö maß kuru,
Eß a matop pe sipuura Devit!
Vaeö rakah, ko kë a ëhnan e Sosoenën!”
11 E Ieesuß to vos manuh Jerusalëm, pareß ho en koman Iuun Hinhin Apuh, pareß epep vah e non pa ma ta kurus va pa koman a Iuun Hinhin Apuh pamëh, ivëhkëk, a potan to kunah en, keß këh en pa Jerusalëm, pareß nö en manuh Bëtaniß me a havun me ra poa vamomhë peß.

E Ieesuß To Soe Ke O Naon Pan Eß Hikta Se Voaß Hah Non

Matiu 21:18-19

12 Ka muhin takah en, ke Ieesuß me ra ma vamomhë peß taneß hah ee maß Bëtaniß, pare vovos hah nö ne Jerusalëm, ke Ieesuß haraß en po maë. 13 E Ieesuß to ep varo en na pa pah vu naon nee to ënëën ne sih a ma voaß i neß, a ëhnaneah o fik no a uvineah to kupkup non poan. Ivëh, ke Ieesuß nö en pa ep, pan eß se ep këh to voaß, ko ëën. Ivëhkëk, eß to nö vatët pareß ep in o uvin naon varoe, suk ataeah, eß to hikta teß non pan o poen voaß po naon pamëh. 14 Ivëh, ne Ieesuß to soe suk ke a vu naon ënëën pamëh pan, “Ahikta teß to se ëën taneß hah non to voaß naon manih pën” A ma vamomhë peß to tënan e ne pa soe pamëh.

E Ieesuß To Veo A Napan To Vavoen Tah Ne Koman Iuun Hinhin Apuh

Matiu 21:12-17, me Luk 19:45-48, me Jon 2:13-22

15 Ee to nö ko vos hah e manuh Jerusalëm, ke Ieesuß ho en pa Iuun Hinhin Apuh, pareß taneo en pa veo tavus a napan varih to vavavoen ne a ma tah pee. Eß to koep en pa pok pa nap papanih moniß, pareß koep en pa ma ö ihihoß po teß varih to vavavoen ne o panuh. 16 Ivëh, keß soepip raoe, pareß soe pan, “Eöm se nat nem teß koe hah ke maß ta ma tah manih pa ö mahën va pa sinten Iuun Hinhin Apuh.” 17 Ke Ieesuß vavaasis non raoe, pareß soe pan, “Manih po Puk Vapenpen no a teß vanënën soe e Aisaëaß to kiun voh, to soe va non manih pan,

‘A iuun peöß eß a iuun hinhin pa napan kurus.’ ^b
Ivëhkëk, eöm to rih eah, ko nok em peß,
“A ö vavakoaan po teß kakaveo.” ^c
18 O teß susunön ësës heß, me ro o teß vavaasis to nat i ne o Vavaasis pe Mosës, to pënton a ma tah ne Ieesuß to nonok non pare taneo ee pa vaiu këh ta hanan ne se ip vamët koe e Ieesuß. Ee to nanaöp e ne pe Ieesuß, suk a nap peo to iu e ne pa ma vavaasis peß to teß me non o kikis. 19 Pa matanpoen ne Ieesuß me a ma vamomhë peß to këh ee pa Jerusalëm, pare nö ee.

A Teß To Vaman Rakah Non Ko Hinhin Non, Eß Se Kon En Pa Tah Neß To Iu Non

Matiu 21:20-22

20 Pa pöstakah rakah ne Ieesuß me ra ma vamomhë peß to oßoah nö ne, pare ep hah ee pa vu fik pamëh. Eß to rak taneß maß manuh pa uvineah, ko öök e non maß pa ma aan. 21 E Pitaß to koman hah na a soe vaßih ne Ieesuß to soe a teß vavoh in a vu naon pamëh, ivëh, keß soe ke Ieesuß pan, “Ep këk ah, Apuh, po naon vëh nën to siröß ateß na nopoen to rak en.” 22 Ivëh, ke Ieesuß soe ke ra ma vamomhë peß pan, “Ta pah teß se keh teß rakah me non o vaman manih pe Sosoenën, pareß taß a tope vëh pan, ‘Sun ah, parën vi kunah koman hah keoß manuh koman tahiß.’ Ivëh, ka teß pamëh se keh teß kikis rakah non po vaman me a hin, pareß nat non susunë non po kokoman peß. Eß se keh hinhin suk non ta pah tah, pareß vaman rakah non manih pa hin peß, a, e Sosoenën se heß en peß. 25 Eöm se keh sun pa hin, paröm koman a hat no a meh teß to nok manih peöm, eöm se ihan anoe këh eah pa hat pamëh. Ivëh, ke Tamëneöm vöh pa vöön va kin se ihan anoe me en pa ma teß hat peöm. 26 Eöm se keh hikta ihan anoe a ma hat po upöm teß, e Tamëneöm vöh pa vöön va kin eß me se hikta ihan anoe non a ma teß hat peöm.”

Ee To Hi E Ieesuß Pan Eteh To To Heß Eah A Tasun

Matiu 21:23-27, me Luk 20:1-8

27 E Ieesuß me ra ma vamomhë peß to hah ee manuh Jerusalëm, ke Ieesuß ho ko nönö vah non koman a Iuun Hinhin Apuh, ko teß susunön ësës heß, me ro teß vavaasis to nat i ne o Vavaasis pe Mosës, me ro teß susunön po Jiuß to nö ee maß manih pe Ieesuß. 28 Pare hi poë pan, “A tasun taeah nën to teß me nom, parën nonok nom a ma kiu varih? Eteh to heß a oah a tasun pamëh?” 29 Ke Ieesuß piun raoe, pareß soe pan, “Eöß me se hi voh a neöm a siß pah hi ro, ke eöm se keh heß em peöß pa piun, eöß me se soe tavus keoß peöm pa tasun nöß to teß me noß, paröß nonok noß a ma kiu apaßpuh varih. 30 Soe voh ka neoß öm, a tasun vëh pa pupui a napan ne Jon Tövapupui to heß voh, taneß maß pe Sosoenën, keß, eß taneß maß manih pa napan ah?” 31 Ko teß susunön ësës heß, me ro teß vavaasis to nat i ne o Vavaasis pe Mosës, me ro teß susunön po Jiuß to vavasoe koman e ne pan, “Ea se poß soe ataeah, ea se keh soe pan eß to taneß maß manuh pe Sosoenën, keß soe en pan, ‘Vahvapoßnih ka hikta vaman no e Jon?’ 32 Ke ea se keh soe pan, o kikis pamëh to taneß maß pa teß, a, a soe pamëh hikta antoen non, suk ataeah, a napan kurus to vaman e ne pe Jon a teß vanënën soe.” 33 Ivëh, kee piun e Ieesuß, pare soe pan, “Emöm to hikta nat nem.” Ke Ieesuß soe ke raoe pan, “Eöß me to hikta se soe tavus ka noß neöm a tasun ne eöß to teß me noß, ko nonok noß a ma kiu varih.”