1Sa 31 | TpiKJPB | STEP | ¶ Nau ol Filistin i pait birua long Isrel. Na ol man bilong Isrel i ranawe long ai bilong ol Filistin, na pundaun taim ol i kilim ol i dai long maunten Gilboa.

1 Samuel 31

1 ¶ Nau ol Filistin i pait birua long Isrel. Na ol man bilong Isrel i ranawe long ai bilong ol Filistin, na pundaun taim ol i kilim ol i dai long maunten Gilboa. 2 Na ol Filistin i ran strong long bihainim Sol na ol pikinini man bilong em. Na ol Filistin i kilim i dai Jonatan, na Abinadap, na Malkisua, ol pikinini man bilong Sol. 3 Na pait i go strong tru i birua long Sol, na ol man bilong sutim banara i sutim em. Na em i kisim bagarap tru long ol man bilong sutim banara. 4 Nau Sol i tokim man bilong karim klos pait bilong em, Kamautim bainat bilong yu, na sutim mi i go namel olgeta wantaim dispela. Nogut ol dispela lain i no katim skin i kam na sutim mi i go namel olgeta, na bagarapim mi nogut. Tasol man bilong karim klos pait bilong em i no laik. Long wanem, em i pret tru. Olsem na Sol i kisim bainat, na pundaun antap long en. 5 Na taim man bilong karim klos pait bilong em i luksave long Sol i dai pinis, em i pundaun wankain olsem antap long bainat bilong em, na dai pinis wantaim em. 6 Olsem na Sol i dai pinis, na tripela pikinini man bilong em, na man bilong karim klos pait bilong em, na olgeta soldia bilong em, dispela de stret wantaim. 7 Na taim ol man bilong Isrel husat i stap long hapsait long ples daun, na ol husat i stap long hapsait bilong wara Jordan, i luksave long ol man bilong Isrel i ranawe, na long Sol na ol pikinini man bilong em i dai pinis, ol i givim baksait long ol biktaun, na ranawe. Na ol Filistin i kam na stap long ol. 8 ¶ Na em i kamap olsem long de bihain, taim ol Filistin i kam long rausim ol kago long ol man ol i kilim i dai, long ol i lukim Sol na tripela pikinini man bilong em i pundaun long maunten Gilboa. 9 Na ol i rausim het bilong em olgeta, na rausim ol klos pait bilong em, na salim tok i go long hap bilong ol Filistin raun nabaut, long mekim dispela i kamap ples klia insait long haus bilong ol piksa god bilong ol, na namel long ol lain manmeri bilong ol. 10 Na ol i putim ol klos pait bilong em long haus bilong Astarot. Na ol i pasim bodi bilong em long banis bilong Bet-san. 11 Na taim ol man i stap long Jebes-gileat i harim long ol dispela samting ol Filistin i bin mekim long Sol, 12 Olgeta strongpela man bilong pait i kirap, na go olgeta hap bilong nait, na kisim bodi bilong Sol na ol bodi bilong ol pikinini man bilong em long banis bilong Bet-san, na kam long Jebes, na kukim ol olgeta long dispela hap. 13 Na ol i kisim ol bun bilong ol, na planim ol aninit long wanpela diwai long Jebes, na tambuim kaikai sevenpela de.