Lev 24 | TpiKJPB | STEP | ¶ Na BIKPELA i toktok long Moses, na tok,

Leviticus 24

1 ¶ Na BIKPELA i toktok long Moses, na tok, 2 Givim strongpela tok long ol pikinini bilong Isrel, long ol i mas bringim i kam long yu klinpela wel oliv ol i paitim bilong givim lait, long mekim ol lam i lait olgeta taim. 3 Eron mas putim dispela long apinun tru inap long moningtaim ausait long laplap bilong testimoni insait long haus sel holi bilong bung bilong ol manmeri, na long pes bilong BIKPELA olgeta taim. Dispela mas i stap wanpela lo i stap long buk oltaim oltaim long ol lain tumbuna pikinini bilong yupela. 4 Em i mas putim ol lam antap long dispela lek bilong kandel i klin olgeta na i stap long pes bilong BIKPELA olgeta taim. 5 Na yu mas kisim gutpela plaua na kukim twelpela bret long aven long dispela. Wan wan bret mas i stap tupela hap bilong tenpela hap dil plaua. 6 Na yu mas putim ol long tupela lain, em sikispela long wanpela lain antap long dispela tebol i klin olgeta na i stap long pes bilong BIKPELA. 7 Na yu mas putim sanda frankinsens i klin olgeta antap long tupela lain, bai dispela i ken stap antap long bret bilong kirapim tingting, em wanpela ofa yu mekim long paia na i go long BIKPELA. 8 Olgeta sabat em i mas lainim dispela long pes bilong BIKPELA olgeta taim na em i mas kisim dispela long ol pikinini bilong Isrel long wanpela kontrak i stap oltaim oltaim. 9 Na dispela mas i stap bilong Eron na ol pikinini man bilong em. Na ol i mas kaikai dispela long ples holi. Long wanem dispela i stap holi olgeta long em bilong ol ofa bilong BIKPELA em i mekim long paia long wanpela lo i stap long buk olgeta taim. 10 ¶ Na pikinini man bilong wanpela meri Isrel na papa bilong em i man Isip, em i go na stap namel long ol pikinini bilong Isrel. Na dispela pikinini man bilong dispela meri Isrel na wanpela man bilong Isrel i pait wantaim long kem, 11 Na dispela pikinini man bilong meri Isrel i tok bilas long nem bilong BIKPELA na em i tok nogut. Na ol i bringim em long Moses. (Na nem bilong mama bilong em i Selomit, em pikinini meri bilong Dibri i bilong lain bilong Dan.) 12 Na ol i putim em long kalabus, bai BIKPELA i ken soim ol tingting bilong Em. 13 Na BIKPELA i toktok long Moses na tok, 14 Bringim dispela man i bin tok bilas long em i kam ausait long kem, na larim olgeta i bin harim em putim ol han bilong ol antap long het bilong em, na larim olgeta bilong bung bilong ol manmeri i tromoi ol ston long em. 15 Na yu mas toktok long ol pikinini bilong Isrel na tok, Wanem man o meri i tok bilas long God bilong em, em yet i mas karim sin bilong em. 16 Na man i tok bilas long nem bilong BIKPELA, tru tumas yupela mas kilim i dai pinis em, na olgeta bilong bung bilong ol manmeri i mas strong long tromoi ol ston long em. Dispela i tru long ol man bilong narapela kantri na long man mama i bin karim em long dispela hap graun, taim em i tok bilas long nem bilong BIKPELA, yupela mas kilim em i dai pinis. 17 Na man i kilim i dai pinis narapela man, tru tumas yupela mas kilim i dai pinis em. 18 Na man i kilim i dai pinis wanpela animal, em i mas bekim dispela, wankain animal bilong bekim long animal. 19 Na sapos wanpela man i mekim mak nogut i kamap long man i stap klostu long em, olsem em i bin mekim, olsem tasol yupela mas mekim long em. 20 Em, wankain bun i bruk bilong bekim bun i bruk, na ai bilong bekim ai, na tit bilong bekim tit. Olsem em i bin kirapim wanpela bagarap long narapela man, yupela i mas mekim olsem long em gen. 21 Na man i kilim i dai pinis wanpela animal em i mas bekim dispela. Na man i kilim i dai pinis wanpela man, tru tumas yupela mas kilim em i dai pinis. 22 Yupela mas i gat wanpela kain lo tu bilong man bilong narapela kantri i olsem lo bilong wanpela bilong kantri bilong yupela yet. Long wanem Mi stap BIKPELA na God bilong yupela. 23 Na Moses i toktok long ol pikinini bilong Isrel, long ol i mas bringim dispela man i bin tok bilas ausait long kem na kilim i dai pinis em long ol ston. Na ol pikinini bilong Isrel i mekim olsem BIKPELA i givim strongpela tok long Moses.