Neh 8 | TpiKJPB | STEP | ¶ Na olgeta manmeri i bungim ol yet wantaim olsem wanpela man i go long dispela rot i stap long ai bilong dua bilong banis wara. Na ol i toktok i go long man bilong rait Esra bilong bringim buk bilong lo bilong Moses, dispela BIKPELA i bin tok strong long Isrel.

Nehemiah 8

1 ¶ Na olgeta manmeri i bungim ol yet wantaim olsem wanpela man i go long dispela rot i stap long ai bilong dua bilong banis wara. Na ol i toktok i go long man bilong rait Esra bilong bringim buk bilong lo bilong Moses, dispela BIKPELA i bin tok strong long Isrel. 2 Na pris Esra i bringim lo long ai bilong bung bilong ol manmeri, ol man na ol meri wantaim, na olgeta husat i inap long harim wantaim gutpela save, long namba wan de bilong namba seven mun. 3 Na em i ritim insait long en long ai bilong dispela rot i stap long ai bilong dua bilong banis wara, i stat long moning i go inap long belo, long ai bilong ol man na ol meri, na ol husat i inap long kisim save. Na ol ia bilong olgeta manmeri i stap op long dispela buk bilong lo. 4 Na man bilong rait Esra i sanap antap long wanpela pulpit diwai, dispela ol i bin wokim bilong dispela wok. Na klostu long em Matitaia, na Sema, na Anea, na Yuraisa, na Hilkaia, na Measeaia i sanap, long han sut bilong em. Na long han kais bilong em, Pedea, na Misel, na Malkaia, na Hasum, na Hasbadana, Sekaraia, na Mesulam i sanap. 5 Na Esra i opim dispela buk long hap ol ai bilong olgeta manmeri i ken lukim. (Long wanem, em i stap antap moa long olgeta manmeri.) Na taim em i opim dispela, olgeta manmeri i sanap. 6 Na Esra i blesim BIKPELA, dispela bikpela God. Na olgeta manmeri i bekim tok, Amen, Amen, taim ol i litimapim ol han bilong ol. Na ol i lindaunim ol het bilong ol, na lotuim BIKPELA taim ol pes bilong ol i go long graun. 7 Na tu Jesua, na Bani, na Serebaia, Jamin, Akup, Sabetai, Hodaija, Measeaia, Kelita, Asaraia, Josabat, Hanan, Pelea, na ol lain Livai, i mekim ol manmeri bilong kisim save long lo. Na ol manmeri i sanap long ples bilong ol. 8 Olsem na ol i ritim long buk bilong lo bilong God klia, na givim ol mining, na mekim ol long kisim save long dispela rit. 9 ¶ Na Niemaia, husat i stap Tirsata, na pris Esra, man bilong rait, na ol lain Livai husat i skulim ol manmeri, i tokim olgeta manmeri, Tude em i holi i go long BIKPELA, God bilong yupela. No ken soim sori, o krai tru. Long wanem, olgeta manmeri i krai tru, taim ol harim ol toktok bilong lo. 10 Nau em i tokim ol, Go long rot bilong yupela, kaikai samting i gris, na dringim samting i switpela, na salim ol hap skel i go long ol husat i no gat wanpela samting wanpela i redim long ol. Long wanem, tude em i holi i go long Bikpela bilong yumi. Na tu yupela i no ken stap sori. Long wanem, amamas tru bilong BIKPELA em i strong bilong yupela. 11 Olsem na ol lain Livai i mekim olgeta manmeri long stap isi, i spik, Pasim maus bilong yupela, long wanem, dispela de em i holi. Na tu yupela no ken gat bel sori. 12 Na olgeta manmeri i go long rot bilong ol long kaikai, na long dring, na long salim ol hap skel, na long wokim bikpela amamas, bilong wanem, ol i bin kisim save long ol dispela toktok ol i tokaut long ol. 13 ¶ Na long namba tu de ol nambawan hetman bilong ol papa bilong olgeta manmeri i bung wantaim, ol pris, na ol lain Livai, i go long man bilong rait Esra, yes, long kisim save long ol toktok bilong lo. 14 Na ol i lukim insait long dispela rait bilong lo BIKPELA i bin tok strong long han bilong Moses, long ol pikinini bilong Isrel i mas stap long ol haus win long bikpela kaikai bilong namba seven mun. 15 Na long ol i mas mekim i kamap ples klia na autim toksave long olgeta biktaun bilong ol, na long Jerusalem, i spik, Go ausait i go long maunten, na kisim ol han bilong diwai oliv, na ol han bilong diwai pain, na ol han bilong diwai mirtel, na ol han bilong diwai palmen, na ol han bilong diwai bilong ol patpela diwai, bilong wokim ol haus win, olsem rait i stap pinis. 16 Olsem na ol manmeri i go ausait, na bringim ol, na wokim bilong ol yet ol haus win, olgeta wan wan antap long rup bilong haus bilong em, na long ol ples op bilong ol, na long ol ples op bilong haus bilong God, na long ol rot bilong dua bilong banis wara, na long rot bilong dua bilong banis Ifraim. 17 Na olgeta bung bilong ol manmeri bilong ol husat i kam gen ausait long kalabus i wokim ol haus win, na sindaun aninit long ol dispela haus win. Long wanem, i stat long ol de bilong Jesua, pikinini man bilong Nun, i kam inap long dispela de, ol pikinini bilong Isrel i no bin mekim olsem. Na i gat amamas i bikpela tru i. 18 Na tu, olgeta wan wan de, i stat long namba wan de i go inap long las de, em i ritim long buk bilong lo bilong God. Na ol i holimpas bikpela kaikai sevenpela de. Na long namba et de, wanpela bung holi i stap, bilong bihainim pasin bilong en.