Psa 21 | TpiKJPB | STEP | I go long namba wan man bilong wokim Musik, Wanpela Sam bilong Devit. ¶ O BIKPELA, dispela king bai amamas tru long strong bilong Yu. Na bai em i amamas tru i bikpela moa long kisim bek bilong Yu!

Psalms 21

I go long namba wan man bilong wokim Musik, Wanpela Sam bilong Devit.

1 ¶ O BIKPELA, dispela king bai amamas tru long strong bilong Yu. Na bai em i amamas tru i bikpela moa long kisim bek bilong Yu! 2 Yu bin givim em laik bilong bel bilong em. Na Yu no tok nogat long askim bilong maus bilong em. Sela. 3 Long wanem Yu save go pas long em long ol blesing bilong pasin i mekim gut long man. Na antap long het bilong em Yu putim hat king ol i wokim long gol i klin olgeta 4 Em i bin askim Yu l ong givim laip, na Yu bin givim dispela long em, yes em planti ol de inap long oltaim oltaim. 5 Glori bilong em i bikpela insait long kisim bek bilong Yu. Yu bin putim ona na planti bilas i stap antap long em. 6 Long wanem Yu bin blesim em tru inap oltaim oltaim. Pes bilong Yu i bin mekim em i belgut tru. 7 ¶ Long wanem, king i putim bilip bilong em long BIKPELA. Na long strong bilong sori bilong Man i Antap Tru bai em i no surik. 8 Han bilong Yu bai mekim I kamap ples klia olgeta birua bilong Yu. Han sut bilong Yu bai mekim i kamap ples klia ol man i no laikim tru Yu. 9 Long taim bilong belhat bilong Yu, bai Yu mekim ol i kamap olsem hatpela aven. BIKPELA bai i daunim ol long belhat tru bilong En, na paia bai i bagarapim ol. 10 Bai Yu bagarapim pikinini bilong ol na rausim ol long dispela graun. Na bai Yu bagarapim ol tumbuna pikinini bilong ol na rausim ol namel long ol pikinini bilong ol man. 11 Long wanem ol i gat laik long mekim nogut long Yu. Ol i bin wok long tingim sampela pasin nogut, tasol ol i no inap mekim dispela. 12 Olsem na bai Yu mekim ol i tanim baksait bilong ol, taim Yu redim ol spia bilong Yu long ol rop bilong banara bilong Yu long pes bilong ol. 13 BIKPELA, long strong bilong Yu yet, Yu ken litimapim Yu yet. Olsem na bai mipela i singim song na litimapim pawa bilong Yu.