Psalms 28
Wanpela Sam bilong Devit.
1¶ O BIKPELA, bikpela ston bilong mi, bai mi singaut long Yu. Yu no ken pasim maus bilong Yu long mi. Sapos Yu pasim maus bilong Yu long mi, bai mi kamap olsem ol man i go daun long dispela bikpela hul. 2Yu mas harim nek bilong ol askim mi autim, taim mi krai long Yu, taim mi litimapim ol han bilong mi i go long rum holi tru long tempel bilong Yu. 3Yu no ken karim mi i go wantaim ol man i nogut tru na wantaim ol wokman bilong sin nogut. Ol i toktok long bel isi wantaim ol man i stap klostu long ol, tasol raskol pasin i stap long ol bel bilong ol. 4Yu mas givim pe long ol bilong bihainim ol wok bilong ol na bilong bihainim ol pasin i nogut tru bilong ol wok bilong ol. Yu mas givim pe long ol bilong bihainim wok bilong ol han bilong ol. Samting i stret long ol i kisim, em Yu mas bekim long ol. 5Bikos ol i no tingting long ol wok bilong BIKPELA o ol samting han bilong Em i bin wokim, bai Em i bagarapim ol, na bai Em i no sanapim ol. 6¶ Blesing i stap long BIKPELA. Long wanem Em i bin harim nek bilong ol askim mi autim. 7BIKPELA em i strong bilong mi na hap plang bilong mi. Bel bilong mi i bin putim bilip bilong mi long Em, na Em i bin helpim mi. Olsem na bel bilong mi i amamas tru moa yet. Na long song bilong mi, bai mi litimapim nem bilong Em. 8BIKPELA em i strong bilong ol. Na Em i strong bilong kisim bek bilong man Em i bin makim. 9Yu mas kisim bek ol manmeri bilong Yu na blesim lain manmeri Papa bai givim Yu. Yu mas givim kaikai long ol tu, na litimapim ol oltaim oltaim.
Copyright information for
TpiKJPB