Psa 47 | TwiNAK | STEP | Nnipa nyinaa, mommɔ mo nsam ahosɛpɛw so! Monto nnwom dennen nkamfo Onyankopɔn.

Psalms 47

Ɔhene Tumfo

1 Nnipa nyinaa, mommɔ mo nsam ahosɛpɛw so!
Monto nnwom dennen nkamfo Onyankopɔn.
2 Ɛsɛ sɛ wosuro Awurade, ɔsorosoroni no.
Ɔyɛ ɔhene kɛse a odi wiase nyinaa so.
3 Ɔma yedii nnipa so nkonim.
Ɔma yedii aman so.
4 Oyii asase a yɛte so yi maa yɛn.
Ɛyɛ agyapade a ne nkurɔfo a ɔdɔ wɔn de hoahoa wɔn ho.
5 Onyankopɔn aforo nʼahengua.
Ahosɛpɛw nteɛteɛm ne torobɛnto nne ba hɔ bere a Awurade rekɔ soro no.
6 To ayeyi dwom ma Onyankopɔn.
To ayeyi dwom ma yɛn hene!
7 Onyankopɔn yɛ wiase nyinaa hene.
Momfa nnwom nyi nʼayɛ.
8 Onyankopɔn tena nʼahengua kronkron no so.
Odi aman so.
9 Aman so difo ne Onyankopɔn nkurɔfo a wɔyɛ Abraham asefo bɔ gua.
Ne tumi sen asraafo Nyinaa.
Ɔyɛ Otumfoɔ.