Psa 76 | TwiNAK | STEP | Wonim Onyankopɔn wɔ Yuda. Wɔhyɛ ne din anuonyam wɔ Israel.

Psalms 76

Nkonimdifo Nyankopɔn

1 Wonim Onyankopɔn wɔ Yuda.
Wɔhyɛ ne din anuonyam wɔ Israel.
2 Ɔwɔ ofi wɔ Yerusalem; ɔte Sion Bepɔw so.
3 Ɛhɔ na obubuu atamfo agyan, wɔn kyɛm, wɔn nkrante ne wɔn akode nyinaa.
4 O Onyankopɔn, wʼanuonyam so!
Wufi mmepɔw no a wudii wʼatamfo so no so reba wo tumi so.
5 Woagye wɔn asraafo akokoduru no ho nneɛma nyinaa ama wɔada awufo nna.
Wɔn ahoɔden ne wɔn nyansa nyinaa yɛɛ kwa.
6 Wobɔɔ wɔn hu no,
O Yakob Nyankopɔn, apɔnkɔ no ne wɔn sotefo nyinaa wuwui.
7 Na wo Awurade de, obiara suro wo.
Sɛ wo bo fuw a, obi ntumi nnyina wʼanim.
8 Wubu atɛn fi soro; wiase suroe na ɛyɛɛ dinn,
9 bere a wosɔre buu atɛn a wode gyee wɔn a wɔhyɛ wɔn so no no.
10 Nnipa abufuw de ayeyi a ɛdɔɔso brɛɛ wo.
Wɔn a wɔanwu ɔko no mu no, bɛhyɛ wo fa no nyinaa bi.
11 Nea wode ahyɛ Awurade wo Nyankopɔn bɔ no, fa ma no.
Aman a mobɛn nyinaa mommrɛ no akyɛde.
12 Onyankopɔn ma nnipa suro no; ɔbrɛ ahenemma ahantanfo ase, na ɔbɔ ahene akɛse hu.