Psa 138 | Vulgate_HebPs | STEP | pro victoria David canticum Domine investigasti me et cognovisti

Psalms 138

1 pro victoria David canticum Domine investigasti me et cognovisti 2 tu cognovisti sessionem meam et surrectionem meam 3 intellexisti malum meum de longe semitam meam et accubitionem meam eventilasti 4 et omnes vias meas intellexisti quia non est eloquium in lingua mea 5 ecce Domine nosti omnia retrorsum et ante formasti me et posuisti super me manum tuam 6 super me est scientia et excelsior est non potero ad eam 7 quo ibo ab spiritu tuo et quo a facie tua fugiam 8 si ascendero in caelum ibi es tu si iacuero in inferno ades [ (Psalms 138:9) si sumpsero pinnas diluculo habitavero in novissimo maris ] [ (Psalms 138:10) etiam ibi manus tua deducet me et tenebit me dextera tua ] [ (Psalms 138:11) si dixero forte tenebrae operient me nox quoque lux erit circa me ] [ (Psalms 138:12) nec tenebrae habent tenebras apud te et nox quasi dies lucet similes sunt tenebrae et lux ] [ (Psalms 138:13) quoniam tu possedisti renes meos orsusque es me in utero matris meae ] [ (Psalms 138:14) confitebor tibi quoniam terribiliter magnificasti me mirabilia opera tua et anima mea novit nimis ] [ (Psalms 138:15) non sunt operta ossa mea a te quibus factus sum in abscondito imaginatus sum in novissimis terrae ] [ (Psalms 138:16) informem adhuc me viderunt oculi tui et in libro tuo omnes scribentur dies formatae sunt et non est una in eis ] [ (Psalms 138:17) mihi autem quam honorabiles facti sunt amici tui Deus quam fortes pauperes eorum ] [ (Psalms 138:18) dinumerabo eos et harena plures erunt evigilavi et adhuc sum tecum ] [ (Psalms 138:19) si occideris Deus impium viri sanguinum declinate a me ] [ (Psalms 138:20) qui contradicent tibi scelerate elati sunt frustra adversarii tui ] [ (Psalms 138:21) nonne odientes te Domine odivi et contra adversarios tuos distabui ] [ (Psalms 138:22) perfecto odio oderam illos inimici facti sunt mihi ] [ (Psalms 138:23) scrutare me Deus et cognosce cor meum proba me et scito cogitationes meas ] [ (Psalms 138:24) et vide si via idoli in me est et deduc me in via aeterna ]